ភ្នំពេញ ៖ បុរសម្នាក់បែកក្បាលស្លាប់ភ្លាមៗក្នុងថ្លុកឈាម បន្ទាប់ពីជិះម៉ូតូ វ៉ាជែងមិនផុតក៏ទាក់ដៃចង្កូតដួលចូលកង់រថយន្តកុងតឺន័របើកច្រាសទិសគ្នាបណ្ដាលឲ្យកិនបែកក្បាលស្លាប់ភ្លាម កាលពីវេលាម៉ោង១២និង៣០នាទីរសៀល ថ្ងៃទី២២ ខែតុលា ឆ្នាំ២០១៨ ស្ថិតនៅលើកំណាត់ផ្លូវជាតិលេខ៤ខាងលិចអគ្គបញ្ជាការកងទ័ពជើងគោកភូមិព្រៃបឹងសង្កាត់កន្ទោក ខណ្ឌពោធិ៍សែនជ័យ។
ជនរងគ្រោះមិនទាន់ស្គាល់អត្តសញ្ញាណ ភេទប្រុស អាយុជាង២០ឆ្នាំជិះម៉ូតូ ម៉ាក ZOOMER ពណ៌ខ្មៅលាយទឹកក្រូច ពាក់ស្លាកលេខ ភ្នំពេញ 1GE-1902 ។ ចំណែករថយន្តកុងតៃន័រ ម៉ាកហ៊ីយ៉ាន់ដាយ ពណ៌លឿងពាក់ស្លាកលេខភ្នំពេញ3C-0949 ដឹកទំនិញអ្នកបើកបរមិនស្គាល់អត្តសញ្ញាណ ក្រោយកើតហេតុបានចុះគេចខ្លួនបាត់។
តាមប្រភពពីអ្នកឃើញហេតុការណ៍បានឲ្យដឹងថា មុនពេលកើតហេតុ ខណៈដែលមេឃកំពុងធ្លាក់ភ្លៀងជនរងគ្រោះជិះម៉ូតូធ្វើដំណើរពីកើតទៅលិច វ៉ាជែងរថយន្តខាងមុខជាបន្តបន្ទាប់ ដោយបើកចូលបំណែកផ្លូវម្ខាងទៀត លុះដល់ចំណុចខាងលើ វ៉ាមិនផុត ស្រាប់តែទាក់ដៃចង្កូតជាមួយរថយន្តកុងតឺន័រទើបបានដួលបោកក្បាលចូលក្រោមកង់រថយន្ដខាងក្រោយផ្នែកខាងឆ្វេងបណ្តាលឲ្យកិនស្លាប់បែកក្បាលស្លាប់ ក្នុងថ្លុកឈាមតែម្តង ។ពេលនោះដោយឃើញសភាពការណ៍មិនស្រួលអ្នកបើកបររថយន្តបានចតឈប់ស្ងៀមហើយចុះរត់គេចទៅបាត់ស្រមោល។
ក្រោយកើតហេតុសមត្ថកិច្ចមូលដ្ឋាន និង ជំនាញចុះទៅសម្រួលចរាចរណ៍ជៀសវាងកកស្ទះ ហើយប្រគល់ឲ្យការិយាល័យចរាចរណ៍ជើងគោកដើម្បីយករថយន្តនិងម៉ូតូទៅរក្សាទុករង់ចាំដោះស្រាយពេលក្រោយ ចំណែកសាកសពត្រូវ សមត្ថកិច្ចពិនិត្យស្លាកស្នាមរួច បន្តស្រាវជ្រាវស្វែងរកសាច់ញាតិដើម្បីដឹកយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments