ភ្នំពេញ ៖ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងប្រតិភូអមដំណើរកាលពីរសៀលថ្ងៃពុធ ១៥កើត ខែអស្សុជ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៤ ខែតុលា ឆ្នាំ២០១៨ បានអញ្ជើញចូលជួបពិភាក្សាការងារពាក់ព័ន្ធនឹងប្រធានបទនៃចលនាបង្កើនកិច្ចអន្តរាគមន៍អាហារូបត្ថម្ភ (Scaling Up Nutrition Movement) ជាមួយ លោកស្រី Gerda Verburg អគ្គលេខាធិការរងអង្គការសហប្រជាជាតិ និងជាអ្នកសម្របសម្រួលចលនាបង្កើនកិច្ចអន្តរាគមន៍អាហារូបត្ថម្ភ។
ក្រសួងបញ្ជាក់ថា ចលនាបង្កើនកិច្ចអន្តរាគមន៍អាហារូបត្ថម្ភនេះ ជាចលនានៃទស្សនវិស័យក្នុងការធានានូវការកាត់បន្ថយទាំងស្រុងនូវកង្វះអាហារូបត្ថម្ភត្រឹមឆ្នាំ២០៣០ ដែលទាមទារឲ្យមានការចូលរួមពីភាគីពាក់ព័ន្ធដូចជា រដ្ឋាភិបាល សង្គមស៊ីវិល វិស័យឯកជន គ្រឹះស្ថានស្រាវជ្រាវ និងអ្នកពាក់ព័ន្ធផ្សេងទៀត ដែលចូលរួមដោះស្រាយនូវបញ្ហាសន្តិសុខស្បៀង និងអាហារូបត្ថម្ភ។
តាមការសិក្សារបស់សេដ្ឋវិទូមួយចំនួនបានបង្ហាញថា ការកាត់បន្ថយកង្វះអាហារូបត្ថម្ភបានផ្តល់នូវផលប្រយោជន៍ជាច្រើនដូចជា ការកើនឡើងនូវផលិតផលក្នុងស្រុកសរុប ទប់ស្កាត់បាននូវមរណភាពកុមារប្រចាំឆ្នាំពីកង្វះអាហារូបត្ថម្ភ ការប្រសើរឡើងនូវគុណភាពអប់រំ ការកើនឡើងនូវប្រាក់បៀវត្ស កាត់បន្ថយភាពក្រីក្រតាមវ័យ និងការកើនឡើងនូវចំនួនស្ត្រីក្នុងការធ្វើអាជីវកម្ម។
មានប្រសាសន៍នៅក្នុងកិច្ចជំនួបនេះ លោកស្រី Gerda Verburg បានបង្ហាញនូវទស្សនៈវិជ្ជមានជាច្រើននៅកម្ពុជាក្នុងការអភិវឌ្ឍន៍នូវវិស័យកសិកម្ម ជាពិសេសទៅលើការអភិវឌ្ឍន៍ និងវិនិយោគផ្នែកសន្តិសុខស្បៀងនិងអាហារូបត្ថម្ភ ព្រោះកម្ពុជាជាទឹកដីដែលអំណោយផលសម្រាប់វិស័យកសិកម្ម។ លោកស្រីក៏បានសង្កត់ធ្ងន់ទៅលើការរៀបចំប្រព័ន្ធស្បៀងអាហារ រវាងកសិកម្ម ជលផល និងព្រៃឈើ នៅកម្ពុជាដោយត្រូវធ្វើការកំណត់ភូមិសាស្ត្រនៃការអភិវឌ្ឍន៍ ការកំណត់ប្រភេទដំណាំ ការពិនិត្យមើលស្ថានភាពនៃការគ្រប់គ្រងទឹក ស្ថានភាពនៃការប្រែប្រួលអាកាសធាតុ និងប្រព័ន្ធជីវចម្រុះ ដើម្បីធ្វើការវាយតម្លៃនូវសក្តានុពលនៃការអភិវឌ្ឍន៍និងការវិនិយោគ។
លោកស្រីបានបន្តថា យើងត្រូវរួមគ្នាគាំទ្រដល់ភាពជាដៃគូនៃចលនាបង្កើនកិច្ចអន្តរាគមន៍អាហារូបត្ថម្ភ ដោយចាប់ផ្តើមពីតម្រង់ទិសតាមប្រទេសនីមួយៗ ដើម្បីចូលរួមកាត់បន្ថយភាពអត់ឃ្លាន និងកង្វះអាហារូបត្ថម្ភនៅក្នុងឆ្នាំ២០៣០ ទាំងអស់គ្នា។ នាពេលខាងមុខ អង្គការសហប្រជាជាតិ នឹងមានរៀបចំវគ្គបណ្តុះបណ្តាលអំពីការកាត់បន្ថយភាពអត់ឃ្លាន និងកង្វះអាហារូបត្ថម្ភ នៅទីក្រុងបាងកក ហើយលោកស្រី សង្ឃឹមថាក្រសួងកសិកម្ម រុក្ខាប្រមាញ់ និងនេសាទនឹងចាត់មន្ត្រីបង្គោលចូលរួមផងដែរ។
ឆ្លៀតក្នុងឱកាសនេះ លោក រដ្ឋមន្ត្រី បានថ្លែងអំណរគុណចំពោះអង្គការសហប្រជាជាតិ ដែលបានផ្តល់កិច្ចសហការល្អជាមួយកម្ពុជា ហើយលោករដ្ឋមន្ត្រី ក៏បានសម្តែងនូវការស្វាគមន៍ចំពោះគម្រោងអភិវឌ្ឍនានា និងការវិនិយោគក្នុងវិស័យកសិកម្មនៅកម្ពុជាផងដែរ។ ទន្ទឹមនឹងនេះកម្ពុជាក៏ដូចជាបណ្តាប្រទេសក្នុងតំបន់កំពុងផ្តោតលើការយកចិត្តទុកដាក់ក្នុងការពង្រឹងសន្តិសុខស្បៀង សុវត្ថិភាព និងគុណភាពចំណីអាហារ ដើម្បីចូលរួមចំណែកសម្រេចឲ្យបាននូវទស្សនវិស័យសាកលក្នុងការកាត់បន្ថយភាពអត់ឃ្លាន និងកង្វះអាហារូបត្ថម្ភ ក៏ដូចជាកាត់បន្ថយនូវភាពក្រីក្រ និងភាពងាយរងគ្រោះរបស់ប្រជាពលរដ្ឋផងដែរ។
នាឱកាសនេះ លោក រដ្ឋមន្ត្រី បានបញ្ជាក់ថា រាជរដ្ឋាភិបាលកម្ពុជាបានបន្តយកចិត្តទុកដាក់ទៅលើការលើកទឹកចិត្តដល់វិស័យឯកជន ជាពិសេសការវិនិយោគទៅលើវិស័យកសិកម្ម ហើយក្រសួងកសិកម្ម រុក្ខាប្រមាញ់ និងនេសាទក៏មានឆន្ទៈក្នុងការសហការ និងគាំទ្រដល់គម្រោងអភិវឌ្ឍ និងការវិនិយោគកសិកម្មនៅកម្ពុជា ព្រោះកម្ពុជាត្រូវការធនធានជាច្រើនទៀតដើម្បីពង្រឹងសក្តានុពលទាំងក្នុងផលិតកម្ម ការកែច្នៃ និងនាំចេញនូវផលិតផលកសិកម្ម។ ចំពោះវគ្គបណ្តុះបណ្តាលស្តីពីការកាត់បន្ថយភាពអត់ឃ្លាន និងកង្វះអាហារូបត្ថម្ភ ក្រសួងកសិកម្ម រុក្ខាប្រមាញ់ និងនេសាទ នឹងចាត់ចែងទៅតាមការអញ្ជើញរបស់អង្គការសហប្រជាជាតិ ហើយលោករដ្ឋមន្ត្រី បានស្នើឲ្យអង្គការសហប្រជាជាតិបន្តកិច្ចសហប្រតិបត្តិការឲ្យកាន់ជិតស្និទ្ធបន្ថែមទៀតក្នុងការជំរុញចលនាបង្កើនកិច្ចអន្តរាគមន៍អាហារូបត្ថម្ភនៅកម្ពុជា៕
Source: Kampuchea Thmey Daily
0 Comments