ភ្នំពេញ ៖ រាជរដ្ឋាភិបាលកម្ពុជាបានសម្រេចដំឡើងប្រាក់ឈ្នួលអប្បបរមារបស់កម្មករនិយោជិតក្នុងវិស័យកាត់ដេរឆ្នាំ២០១៩ចំនួន១៨២ដុល្លារបូករួមទាំងថវិកាបន្ថែមរបស់សម្តេចតេជោហ៊ុនសែនចំនួន៥ដុល្លារកើនឡើងចំនួន១២ដុល្លារ បើធៀបនឹងប្រាក់ឈ្នួលឆ្នាំ២០១៨ ដែលមានត្រឹមតែ១៧០ដុល្លារប៉ុណ្ណោះ។
ថ្លែងក្រោយបើកកិច្ចប្រជុំគណៈកម្មការប្រឹក្សាការងារកាលពីល្ងាចថ្ងៃទី៥ ខែតុលា ឆ្នាំ២០១៨នៅទីស្តីការក្រសួង លោកបណ្ឌិត អ៊ិតសំហេងរដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈនិងជាប្រធានគណៈកម្មការប្រឹក្សាការងារបានមានប្រសាសន៍ថា រាជរដ្ឋាភិបាលបានសម្រេចដំឡើងប្រាក់ឈ្នួលចំនួន១៨២ដុល្លារបូករួមទាំងសម្តេចតេជោហ៊ុនសែនបន្ថែមចំនួន៥ដុល្លារដោយចាប់ផ្តើមអនុវត្តចាប់ថ្ងៃទី០១ ខែមករា ឆ្នាំ២០១៩ ខាងមុខនេះតទៅ។
លោករដ្ឋមន្ត្រីបានបន្តថា ការដំឡើងប្រាក់ឈ្នួលចំនួន១៨២ដុល្លារនេះ ដោយយើងនៅតែរក្សានូវប្រាក់អត្ថប្រយោជន៍ផ្សេងៗជូនដល់កម្មករនិយោជិតឲ្យនៅដដែលដូចជាប្រាក់ដឹកជញ្ជូននិងស្នាក់នៅចំនួន១៧ដុល្លារប្រាក់រង្វាន់ការងារទៀងទាត់១០ដុល្លារ ប្រាក់អតីតភាព ដែលមានពី២ដុល្លារដល់១១ដុល្លាររួមទាំងប្រាក់ថែមម៉ោងថែមទៀត ធ្វើឲ្យប្រាក់ចំណូលរបស់កម្មករប្រសើរឡើងជាងឆ្នាំ២០១៨ទៅទៀត។
លោករដ្ឋមន្ត្រីបានឲ្យដឹងទៀតថា «ការដំឡើងប្រាក់ឈ្នួលថ្មីនេះគឺជាកាដូមួយដែលរាជរដ្ឋាភិបាលបានផ្តល់ជួនដល់កម្មករនិយោជិតក៏ដូចជាប្រជាពលរដ្ឋនៅក្នុង ឱកាសបុណ្យភ្ជុំបិណ្ឌដែលនឹងឈានចូលមកដល់នឹពេលដ៏ខ្លីខាងមុខនេះ»។
ជាមួយគ្នានេះដែរ លោកបណ្ឌិត អ៊ិត សំហេង បានបន្ថែមទៀតថា រាជរដ្ឋាភិបាលបានជួយដោះស្រាយដំណើររបស់ភាគីនិយោជកដែលបានស្នើសុំបញ្ចុះតម្លៃអគ្គិសនីមកនៅត្រឹម០,០១៤៧ដុល្លារក្នុង១គីឡូវ៉ាត់ម៉ោងដើម្បីឲ្យនិយោជកយកថវិកាដែលចំណាយលើថ្លៃអគ្គិសនីមកចំណាយលើប្រាក់ឈ្នួលវិញ។
ចំពោះសំណើខាងភាគីសហជីពក៏ត្រូវបានដោះស្រាយផងដែរដូចជាស្នើឲ្យសម្តេចបន្តចុះជួបកម្មករបន្តទៀត តបណ្តាញទឹកនិងអគ្គិសនីដល់ផ្ទះស្នាក់នៅនិងផ្ទះជួលរបស់កម្មករនិយោជិតនិងការកែប្រែឥរិយាបថរបស់ក្រុមគ្រូពេទ្យក្នុងការផ្តល់សេវាដល់កម្មករដែលការងារនេះក្រសួងនឹងត្រូវធ្វើការពិភាក្សាបន្តជាមួយភាគីពាក់ព័ន្ធដទៃទៀតដើម្បីឲ្យកម្មករទទួលបានសេវាសុខាភិបាលកាន់តែល្អប្រសើរ។
លោកអាត់ធនប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជានៅមិនទាន់គាំទ្រទាំងស្រុងចំពោះការដំឡើងប្រាក់ឈ្នួលចំនួន១៨២ដុល្លារនេះនៅឡើយទេ។
តែយ៉ាងណាក៏ដោយលោកបានមានប្រសាសន៍ថា «ប្រាក់ឈ្នួលថ្មីនេះវាសមល្មមហើយដែលយើងទាំងអស់គ្នាអាចទទួលយកបានទោះបីជាមិនបានដូចអ្វីដែលបានទាមទារកន្លងមកក៏ដោយ»។
ជាមួយគ្នានេះដែរ លោកស្នើឲ្យរាជរដ្ឋាភិបាលធ្វើយ៉ាងណាទប់ស្កាត់កុំឲ្យទំនិញចំណីអាហារនិងម្ចាស់ផ្ទះជួលដំឡើងថ្លៃដើម្បីកុំឲ្យកម្មករចំណាយបន្ថែមទៀត បន្ទាប់ពីដំឡើងប្រាក់ឈ្នួលថ្មីនោះ។
លោកបណ្ឌិត អ៊ិត សំហេង បានគាំទ្រទៅនឹងសំណើនេះដោយលោករដ្ឋមន្ត្រីបានធ្វើការអំពាវនាវដល់ម្ចាស់ផ្ទះជួលទាំងឡាយសូមបន្តការគោរពទៅតាមច្បាប់ភតិសន្យាសម្រាប់ការគ្រប់គ្រងថ្លៃឈ្នួលផ្ទះនេះកុំដំឡើងថ្លៃផ្ទះជួល និង ទំនិញនិងម្ហូបអាហារផ្សេងៗត្រូវរក្សាតម្លៃនៅដដែល ដើម្បីកុំឲ្យប៉ះពាល់ដល់ចំណូលរបស់កម្មករពេលដែលប្រាក់ឈ្នួលកម្មករត្រូវបានដំឡើងនោះ។
ចំណែកលោក កាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជាបានមានប្រសាសន៍ថា ប្រាក់ឈ្នួលថ្មីចំនួន១៨២ដុល្លារនេះ វាជាចំនួនមួយដ៏ច្រើនហើយក៏ជាបន្ទុកមួយដ៏ធ្ងន់សម្រាប់ភាគីនិយោជកដែរ។
ប៉ុន្តែលោកបានស្នើថា ទន្ទឹមនឹងប្រាក់ឈ្នួលដំឡើងហើយ គ្រប់ភាគីពាក់ព័ន្ធត្រូវតែផ្តោតទៅលើភាពប្រកួតប្រជែងរបស់ប្រទេសកម្ពុជាដែលត្រូវធ្វើបន្តទៀត។
លោកកាំងម៉ូនីកាបានថ្លែងអំណរគុណចំពោះប្រមុខរាជរដ្ឋាភិបាល ដែលបានបញ្ចុះតម្លៃអគ្គិសនីសម្រាប់និយោជន ដែលចាប់ផ្តើមអនុវត្តពីឆ្នាំ២០១៩ តទៅបើទោះបីជាមិនបាន១០០ភាគរយក៏ដោយដែលបានជួយសម្រួលដល់សម្ពាធក្នុងការដំឡើងប្រាក់ឈ្នួលថ្មីនេះ៕
Source: Kampuchea Thmey Daily
0 Comments