ភ្នំពេញ ៖ សមាគមគ្រូបង្រៀនកម្ពុជាឯករាជ្យ កាលពីព្រឹក ថ្ងៃទី០៥ ខែកញ្ញា ឆ្នាំ២០១៨ បានរៀបចំអបអរសាទរទិវាគ្រូបង្រៀនពិភពលោក ដែលពិធីនេះរៀបចំឡើងនៅទីលានប្រជាធិបតេយ្យថ្មី ក្នុងខណ្ឌឫស្សីកែវ ក្រោមប្រធានបទ “សិទ្ធិទទួលបានការអប់រំ និងសិទ្ធិទទួលបានគ្រូបង្រៀនមានគុណភាព” ដោយមានអ្នកចូលរួមប្រមាណ៧០នាក់។
ថ្លែងទៅកាន់អ្នកចូលរួមលោក រ៉ុង ឈុន បានលើកឡើងថា ការប្រារព្ធទិវាគ្រូបង្រៀនពិភពលោកនេះ មិនមែនសម្រាប់តែកម្ពុជាទេ គឺទូទាំងពិភពលោក ដើម្បីរំលឹកពីតួនាទីដ៏សំខាន់របស់លោកគ្រូ អ្នកគ្រូ ដែលបានផ្ទេរចំណេះដឹងដល់សិស្សានុសិស្ស ក៏ដូចជាប្រជាពលរដ្ឋទូទាំងពិភពលោក។ ជាមួយនឹងការលើកឡើងខាងលើនេះ លោក រ៉ុង ឈុន បានរិះគន់ផងដែរទាក់ទងការផ្តល់សៀវភៅ និងសម្ភារៈសិក្សានៅតាមសាលា។
លោក រ៉ុង ឈុន លើកឡើងទៀតថា ថ្មីៗនេះទំនិញ ក៏ដូចជាប្រេងសាំងបានឡើងថ្លៃយ៉ាងខ្ពស់ លើសទៅនឹងអ្វីដែលរដ្ឋាភិបាលបានផ្តល់ជូនគ្រូបង្រៀនទៅទៀត ដូច្នេះត្រូវពិនិត្យមើលតម្លៃទំនិញផង ដើម្បីឲ្យមន្ត្រីរាជការ លោកគ្រូ អ្នកគ្រូ មានជីវភាពសមរម្យ។ ដោយសារតែបញ្ហានេះហើយ បានជាលោកគ្រូ អ្នកគ្រូនៅភ្នំពេញ តែងតែប្រមូលលុយពីសិស្ស ដែលបញ្ហានេះ ធ្វើឲ្យប៉ះពាល់ដល់វិស័យអប់រំ។
នៅក្នុងពិធីនោះ សមាគមគ្រូបង្រៀនកម្ពុជាឯករាជ្យបានលើកឡើងនូវចំណុចជាច្រើន ដើម្បីឲ្យរាជរដ្ឋាភិបាលជួយដោះស្រាយ ដែលរួមមាន ដំឡើងប្រាក់ខែគោលអប្បបរមា២លានរៀលជូនគ្រូបង្រៀន, ត្រូវមានវិធានការទប់ស្កាត់ និងស៊ើបអង្កេតអំពើពុករលួយនៅក្នុងស្ថាប័នគ្រប់កំរិត និងដំឡើងប្រាក់អត្ថប្រយោជន៍ផ្សេងៗ និងដំឡើងប្រាក់ឧបត្ថម្ភដល់កូន ប្រពន្ធជាដើម ហើយនៅចុងបញ្ចប់នៃកម្មវិធី សមាគមគ្រូបង្រៀនកម្ពុជាឯករាជ្យក៏បានប្រគល់ញត្តិជូនស្ថាប័នពាក់ព័ន្ធ ដើម្បីជួយដោះស្រាយផងដែរ។
សូមបញ្ជាក់ថា នៅព្រឹកថ្ងៃទី០៥ ខែកញ្ញា ឆ្នាំ២០១៨នោះដែរ ក្រសួងអប់រំ ក៏បានរៀបចំទិវានេះផងដែរ ក្រោមប្រធានបទ “គុណភាពគ្រូ ជាគុណភាពមូលធនមនុស្ស សម្រាប់ការអភិវឌ្ឍប្រកបដោយចីរភាព”។
សម្តេចតេជោ ហ៊ុន សែន ដែលអញ្ជើញជាអធិបតីក្នុងពិធីនោះ បានសំដែងការសប្បាយរីករាយ និងបានថ្លែងអំណរគុណចំពោះក្រសួងអប់រំយុវជន និងកីឡាដែលតែងតែរៀបចំពិធីអបអរសាទរទិវាទគ្រូបង្រៀននេះ និងបានបញ្ជាក់ថា សម្តេចបានផ្តួចផ្តើមគំនិតបង្កើតទិវាគ្រូបង្រៀនដំបូងនៅកម្ពុជា ដើម្បីជាការរំឭកគុណគ្រូតាមរយៈការបង្កើតទិវាគ្រូបង្រៀន កាលពីថ្ងៃ ទី៣ ខែកញ្ញា ឆ្នាំ១៩៩៧ ដោយកំណត់យកថ្ងៃទី៥ ខែតុលា ជារៀងរាល់ឆ្នាំ ដើម្បីប្រារព្ធទិវាគ្រូបង្រៀននៃព្រះរាជាណាចក្រកម្ពុជា។ ទិវានេះ គឺមានគោលបំណងបំផុសឡើងវិញនូវវប្បធម៌ និងប្រពៃណីរបស់សិស្សានុសិស្សទាំងឡាយ ឲ្យរំឭកនូវគុណូបការៈដ៏ថ្លៃថ្លារបស់គ្រូបង្រៀននៅទូទាំងប្រទេស ដែលពួកគាត់ជារៀមច្បងក្នុងការងារអប់រំ បណ្តុះបណ្តាល ធនធានមនុស្ស សម្រាប់ការពារ កសាង និងអភិវឌ្ឍមាតុភូមិលើគ្រប់វិស័យ ដែលពួកគាត់បាន និងកំពុងបំពេញការងារជាអ្នកអប់រំ និងជាសិល្បករផ្ទេរចំណេះដឹងផងដែរ៕
Source: Kampuchea Thmey Daily
0 Comments