ភ្នំពេញ ៖ បុរស២នាក់ជាកម្មករបម្រើការងារនៅក្នុងក្រុមហ៊ុនឯកជនជាមួយគ្នា បានបង្កទំនាស់វាយតប់កាប់ចាក់គ្នា បណ្តាលអោយអ្នកចាញ់រងរបួសធ្ងន់ដេកពេទ្យ ចំណែកឯអ្នកឈ្នះត្រូវបានសមត្ថកិច្ចចាប់វាយខ្នោះបញ្ចូលគុកភ្លាមៗកាលពីល្ងាចថ្ងៃទី០៥ ខែតុលា ឆ្នាំ២០១៨ នៅភូមិបន្លាស្អិត សង្កាត់ឃ្មួញ ខណ្ឌសែនសុខ។
គូភាគីបង្កទំនាស់ដោយអំពើហិង្សាដាក់គ្នាទាំង២នាក់ខាងលើ ជនដែលត្រូវបានចាប់ខ្លួនសង្ស័យជាជនបង្ក ឈ្មោះ ខឹម ស៊ន អាយុ២៥ឆ្នាំ មុខរបរបើកបរម៉ូតូរ៉ឺម៉កកង់បី និងស្នាក់នៅក្នុងឃ្លាំងផ្ទុកសម្ភារៈអគ្គិសនី ចំណុចកើតហេតុខាងលើ។
ចំណែកឯភាគីជនរងគ្រោះឈ្មោះ ជួន សារ៉េម អាយុ២៩ឆ្នាំ មុខរបរបើកបររថយន្ត បម្រើការងារអោយក្រុមហ៊ុនជាមួយគ្នា ស្នាក់នៅផ្ទះជួលនៅម្តុំអូរដឹម សង្កាត់ចោមចៅ ខណ្ឌពោធិ៍សែនជ័យ។
លោកអនុសេនីយ៍ឯក ញាណ នន នាយប៉ុស្ដិ៍នគរបាលរដ្ឋបាលឃ្មួញ ខណ្ឌសែនសុខ បានមានប្រសាសន៍ថា ៖ យោងតាមចម្លើយបំភ្លឺពីជនទាំង២ បានអោយដឹងថា នៅមុនពេលកើតហេតុ កន្លងមកប្រហែលជា៣ខែមកហើយ ពួកគេតែងមានទំនាស់កាច់កុងការងារគ្នានៅក្នុងក្រុមហ៊ុន ក្រោយមក នៅថ្ងៃកើតហេតុវេលាម៉ោង១៦ល្ងាច ភាគីឈ្មោះ ជួន សារ៉េម បានយកកង្ហារមកបើកដាក់អង្គុយកន្លែងគាត់ធ្វើការរៀបចំអំពូលភ្លើងតែម្នាក់ឯង ដោយមិនចុចអោយកង្ហាររេបក់ខ្យល់មករកភាគីឈ្មោះ ខឹម ស៊ន ដែលកំពុងអង្គុយធ្វើការដូចគ្នា។ ឈ្មោះ ខឹម ស៊ន ក៏បានមកចំណុចកង្ហារអោយរេ តែត្រូវឈ្មោះ ជួន សារ៉េម មិនអោយចុចកង្ហារនោះ ក៏ឈ្លោះគ្នា ដោយឈ្មោះ ជួន សារ៉េម បានទាញកៅអីជ័រមកវាយលើឈ្មោះ ខឹម ស៊ន បាក់ជើងកៅអី នៅពេលនោះ ឈ្មោះ ខឹម ស៊ន បានស្ទុះរត់ទៅយកកាំបិតបុ័ងតោរបស់ខ្លួន មកកាប់សងសឹកតបតមកលើឈ្មោះជួន សារ៉េម វិញបណ្តាលអោយរងរបួសត្រូវត្រង់កញ្ចឹងក ជើង និងដៃរបួសធ្ងន់ធ្ងរតែម្តង។
លោក នាយប៉ុស្តិ៍បានបញ្ជាក់ថា នៅពេលពួកគេកំពុងឈ្លោះគ្នានោះ ខាងបុគ្គលិកក្រុមហ៊ុនបានរាយការណ៍ កម្លាំងសមត្ថកិច្ចរបស់លោក ជួយអន្តរាគមន៍ភ្លាមៗដោយឃាត់ខ្លួនឈ្មោះ ខឹម ស៊ន មិនអោយរត់គេចខ្លួនទាន់ និងបានចាត់ចែងដឹកជនរងគ្រោះ ទៅមន្ទីរពេទ្យដើម្បីសង្គ្រោះបន្ទាន់ភ្លាមៗផងដែរ ដោយសារស្ថានភាពរបួសធ្ងន់ធ្ងរ។
ប៉ូលិសនិយាយថា ករណីនេះជាអំពើហិង្សាដោយចេតនា ដែលទំនាស់តិចតួចមិនចេះយោគយល់អធ្យាស្រ័យអោយគ្នាទៅវិញទៅមក មានតែការឌឺដងកាច់កុងគ្នា រហូតប្រើអំពើហិង្សា លទ្ធផលអ្នកចាញ់ដេកពេទ្យ ឯអ្នកឈ្នះជាប់ខ្នោះ ដេកគុកបាត់បង់ការងារ បង្កទុក្ខលំបាកខ្លួនឯងនិងក្រុមគ្រួសារទាំងសងខាង៕
Source: Kampuchea Thmey Daily
0 Comments