ភ្នំពេញ ៖ ប្រជាពលរដ្ឋមិនតិចជាង២ម៉ឺននាក់ទេ ដែលបានទទួលសេវាជិះរថយន្តក្រុងទៅស្រុកកំណើត ដោយមិនអស់ប្រាក់តាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាក្នុងឱកាសភ្ជុំបិណ្ឌនេះ។ នេះបើតាមការបញ្ជាក់ពីលោកម៉េត មាសភក្តីអ្នកនាំពាក្យរដ្ឋបាលរាជធានីភ្នំពេញ។
លោកម៉េត មាសភក្តី ឲ្យដឹងថា ក្នុងរយៈពេល៥ថ្ងៃនៃពិធីបុណ្យភ្ជុំបិណ្ឌមានប្រជាពលរដ្ឋមិនតិចជាង២ម៉ឺននាក់ទេដែលបានជិះរថយន្ត(Citybus)របស់រដ្ឋបាលរាជធានីភ្នំពេញទៅស្រុកកំណើតដោយមិនគិតថ្លៃពីថ្ងៃទី៦ដល់ថ្ងៃទី១១តុលា។
រដ្ឋបាលរាជធានីភ្នំពេញបានរៀបចំរថយន្តក្រុងចំនួន២១៥គ្រឿងសម្រាប់បម្រើ សេវាដឹកជញ្ជូនប្រជាពលរដ្ឋពីរាជធានីភ្នំពេញទៅតាមបណ្តាខេត្តក្រុងនានា និងពីខេត្តក្រុងមករាជធានីភ្នំពេញវិញក្នុងឱកាសបុណ្យភ្ជុំបិណ្ឌនេះដើម្បីសម្រួលដល់ការចំណាយរបស់ប្រជាពលរដ្ឋក្នុងការធ្វើដំណើរទៅលេងស្រុកកំណើតនាឱកាសបុណ្យភ្ជុំបិណ្ឌនេះតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាលើការគិតគូរពីសុខទុក្ខរបស់ប្រជាពលរដ្ឋ។
រថយន្តទាំង២១៥គ្រឿងនេះ រដ្ឋបាលរាជធានីភ្នំពេញ បានបែងចែកជា២ផ្នែកគឺ១ផ្នែកចំនួន៩៥គ្រឿងសម្រាប់ដឹកជញ្ជូនប្រជាពលរដ្ឋក្នុងរយៈពេល៣ថ្ងៃពីថ្ងៃទី៨ដល់ថ្ងៃទី១០តុលា,ចំណែក១ផ្នែកទៀតមានរថយន្ត១២០ គ្រឿងសម្រាប់ដឹកជញ្ជូនប្រជាពលរដ្ឋពីរាជធានីភ្នំពេញទៅតាមបណ្តាខេត្ត និងពី តាមបណ្តាខេត្តមករាជធានីភ្នំពេញវិញតាមតម្រាយផ្លូវជាតិលេខ១,លេខ២,លេខ៣ លេខ៤,លេខ៥,លេខ៦,លេខ៧និងផ្លូវជាតិលេខ៨ដែលបានធ្វើអោយប្រជាពលរដ្ឋ អ្នកទទួលសេវារថយន្តក្រុងនេះបង្ហាញពីក្តីសប្បាយរីករាយ និងថ្លែងអំណរគុណយ៉ាងជ្រាលជ្រៅដល់សម្តេចតេជោនាយករដ្ឋមន្ត្រី ក៏ដូចរដ្ឋបាលរាជធានីភ្នំពេញ ដែលបានរៀបចំរថយន្តក្រុងសម្រាប់ប្រជាពលរដ្ឋជិះទៅមកស្រុកកំណើតដោយមិនយកប្រាក់។
សូមបញ្ជាក់ថា ក្រៅពីការជិះរថយន្តក្រុងមិនគិតថ្លៃសម្រាប់បុណ្យ ភ្ជុំបិណ្ឌនេះ កន្លងមកថ្មីៗនេះសម្តេចអគ្គមហាសេនាបតីតេជោហ៊ុនសែន ធ្លាប់បានប្រកាសហើយថា រាជរដ្ឋាភិបាលបានសម្រេចពន្យារពេលនៃការយកប្រាក់ថ្លៃសំបុត្រជិះកាណូតលឿនភ្នំពេញ.តាខ្មៅ និងសំរាប់ជិះរថភ្លើងពីភ្នំពេញទៅប៉ោយប៉ែត ស៊ីសុផុនខេត្តបន្ទាយមានជ័យដោយឆ្លងកាត់ខេត្តកណ្តាល,កំពង់ឆ្នាំង,ពោធិ៍សាត់ បាត់ដំបង និងបន្ទាយមានជ័យរហូតដល់ដំណាច់ឆ្នាំ២០១៨៕
Source: Kampuchea Thmey Daily
0 Comments