ព្រឹត្តិការណ៍ដណ្តើមពានរង្វាន់ជើងឯក TV5 Boxing Knock Out Series by K.cement ទម្ងន់៦០គីឡូក្រាមនៅសង្វៀន TV5 ព្រែកកំពឹស នាយប់ថ្ងៃទី១៣ តុលា ២០១៨នេះ បានឈានមកដល់វគ្គផ្ដាច់ព្រ័ត្រហើយ។
លាភ រដ្ឋា អ្នកប្រដាល់ក្លិបដីឡូតិ៍មានរិទ្ធ និង លន បញ្ញា អ្នកប្រដាល់សមាគមកីឡាប្រដាល់ក្រសួងការពារជាតិ ពួកគេទាំងពីរនឹងត្រូវប្រជែងគ្នា ដើម្បីយកតំណែងជាម្ចាស់ពានរង្វាន់ជើងឯក TV5 Knock Out Series ទម្ងន់៦០គីឡូក្រាមនេះ ។
លាភ រដ្ឋា ឆ្លងកាត់ការប្រកួតជម្រុះ៤ដំណាក់កាលកន្លងមក គេវាយឈ្នះទាំង៤ប្រកួត។ លើកទី១ គេឈ្នះ ចាន់ រក្សា អ្នកប្រដាល់ក្លិបអេភូថងកីឡាដោយពិន្ទុ , លើកទី២ ឈ្នះម៉ន ព្រហ្មម៉ាញ ក្លិបការិយាល័យទី៥កងទ័ពជើងគោក ដោយពិន្ទុដែរ, លើកទី៣ ឈ្នះកំពែង ខ្មៅ សមាគមកីឡាប្រដាល់ក្រសួងកសិកម្មដោយពិន្ទុ និង លើកទី៤ ដែលជាការប្រកួតពាក់កណ្តាលផ្តាច់ព្រ័ត្រនោះ លាភ រដ្ឋា បានឈ្នះឡុង រ៉ាមី ក្លិបខ្លារខិនមានរិទ្ធ ដោយពិន្ទុ ។
ចំពោះ អ្នកប្រដាល់លន បញ្ញា វិញ គេឈ្នះទាំង៤ដំណាក់កាលដូចគ្នាដែរ។ លើកទី១ បញ្ញាវាយឈ្នះអ្នកប្រដាល់នួន រ៉ាថេន ក្លិបតាឯកដំបងដែកខេត្តព្រៃវែងដោយពិន្ទុ , លើកទី២ ឈ្នះសេន កុសល ក្លិបមោងឫស្សីមរតកគុនខ្មែរ ដោយពិន្ទុ, លើកទី៣ ឈ្នះម៉ឺន មេឃា ក្លិបមនោរម្យភ្នំតូច ដោយពិន្ទុ និង លើកទី៤ ប្រកួតពាក់កណ្តាលផ្តាច់ព្រ័ត្រ វាយឈ្នះលិញ ភារម្យ ក្លិបភារម្យគុនខ្មែរ ក្នុងទឹកទី៣ ។
រវាង លាភ រដ្ឋា និង លន បញ្ញា នេះ តាមការរំពឹងទុកនោះ លាភ រដ្ឋាប្រហែលជាមិន អាចឈ្នះលន បញ្ញា ក្នុងការប្រកួតផ្តាច់ព្រ័ត្រនេះទេ ? ។ តាមការកត់សម្គាល់នោះ អ្នកប្រដាល់ទាំងពីររូបនេះ មានប្រវត្តិធ្លាប់ជួបគ្នាម្តងហើយកន្លងមក(២៨មេសា២០១៨) ដោយរដ្ឋា ចាញ់បញ្ញាក្នុងទឹកទី២ ។
លន បញ្ញា គេមានប្រៀបឈ្នះលាភ រដ្ឋា ដោយសារគេខ្ពស់ជាង ដៃជើងវែង ហើយស្នៀតជង្គង់និងកែងរបស់គេ គឺរដ្ឋាមិនអាចទប់ទល់បានឡើយ ។ ចាំមើល អ្នកដែលជាម្ចាស់ពានរង្វាន់ជើងឯក Knock Out TV5 Series ទម្ងន់៦០ គីឡូក្រាមនេះ អាចជាលន បញ្ញា ហើយ ? ។
សូមបញ្ជាក់ថា លន បញ្ញា គេបានឡើងមកដល់វគ្គផ្តាច់ព្រ័ត្រពានរង្វាន់ជើងឯក Knock Out TV5 Seriesនេះ ម្តងរួចមកហើយ កាលពីរដូវកាលមុនទម្ងន់៥៧គីឡូក្រាម តែបានទទួលត្រឹមជាជើងឯករងប៉ុណ្ណោះ ដោយវាយចាញ់ធន់ មករា សិស្សរួមគ្រូជាមួយដោយពិន្ទុ ។
ចំពោះ ឡុង រ៉ាមី អ្នកប្រដាល់ក្លិបខ្លារខិនមានរិទ្ធ ដែលត្រូវប្រកួតដណ្តើមយកលេខ ៣ ជាមួយ លិញ ភារម្យ ក្លិបភារម្យគុនខ្មែរ នោះវិញ ពុំដឹងថា បានទៅនរណានោះដែរ ។
លិញ ភារម្យ គេជាអ្នកប្រដាល់មានឈ្មោះបោះសម្លេង ជាជើងខ្លាំងជើងចាស់ ដូច្នេះមិនប្រាកដថាគេចាញ់ឡុង រ៉ាមី នោះទេ ។ តែភារម្យ ក៏មិនច្បាស់ថាឈ្នះរ៉ាមី ដែរ ។ ដូច្នេះ ចាំមើលតើ លិញ ភារម្យ ឬ ឡុង រ៉ាមី ដែលឈ្នះបានប្រាក់រង្វាន់លេខ៣ នេះ ? ។
គួរបញ្ជាក់ថា សម្រាប់អ្នកទទួលបានពានរង្វាន់ជើងឯក TV5 Knock Out Series ទម្ងន់៦០ គីឡូក្រាមនេះ នឹងទទួលបានពាន១ និង ទឹកប្រាក់រង្វាន់ចំនួន៤.០០០ដុល្លារ លេខ២ បានពាន១ និងរង្វាន់អម ២.០០០ដុល្លារ លេខ៣ ពាន និងរង្វាន់អម៧៥០ដុល្លារ ហើយលេខ៤ បាន៥០០ដុល្លារ៕
Source: Kampuchea Thmey Daily
0 Comments