ភ្នំពេញ ៖ លោកបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡាបានជំរុញឲ្យក្រុមប្រឹក្សាភិបាល គណៈកម្មការប្រតិបត្តិ និងគណៈគ្រប់គ្រងនៃវិទ្យាល័យព្រះស៊ីសុវត្ថិត្រូវយកចិត្តទុកដាក់លើការគ្រប់គ្រងសំរាម នៅក្នុងបរិវេណសាលាដើម្បីលើកសោភ័ណ្ឌភាពក៏ដូចជាបរិស្ថានសាលាឲ្យកាន់តែស្រស់បំព្រងថែមទៀត។
លោកបណ្ឌិតសភាចារ្យ ហង់ ជួនណារ៉ុន បានលើកឡើងបែបនេះ កាលពីរសៀលថ្ងៃទី២៤ ខែតុលា ឆ្នាំ២០១៨នេះ ក្នុងឱកាសដែលលោករដ្ឋមន្ត្រីបានអញ្ជើញចូលរួមប្រកាសសមាសភាពក្រុមប្រឹក្សាភិបាល គណៈកម្មការប្រតិបត្តិ និងគណៈគ្រប់គ្រងនៃវិទ្យាល័យព្រះស៊ីសុវត្ថិ។
ជាមួយគ្នានេះដែរ លោករដ្ឋមន្ត្រីក៏បានចុះត្រួតពិនិត្យការបង្រៀន ការសិក្សារបស់សិស្សានុសិស្ស នៅសាលារៀនជំនាន់ថ្មី នៃវិទ្យាល័យព្រះស៊ីសុវត្ថិ ដើម្បីស្វែងយល់អំពីការអភិវឌ្ឍន៍ ការបង្រៀន និង រៀន បែបសតវត្សទី២១ និងឈានទៅអភិវឌ្ឍសាលារៀន ដទៃនៅទូទាំងប្រទេស។
មានប្រសាសន៍នៅក្នុងឱកាសនោះ លោកបណ្ឌិតសភាចារ្យ ហង់ ជួនណារ៉ុន បានមានប្រសាសន៍ថា រយៈពេល០៥ឆ្នាំមកនេះ ក្រសួងអប់រំ បានបង្កើនថវិកាជាច្រើន ដើម្បីពង្រឹងនៅតាមសាលារៀននីមួយៗ នៅទូទាំងប្រទេស ជាពិសេសដើម្បីពង្រឹងប្រសិទ្ធភាព និងស័ក្ដិសិទ្ធិភាព នៃការដឹកនាំ និងគ្រប់គ្រង ក្នុងន័យឈានទៅលើកកម្ពស់គុណភាព នៃការអប់រំ តាមរយៈការបង្កើតលទ្ធផលសិក្សារបស់សិស្ស។
លោករដ្ឋមន្ត្រី បានបន្តថា «ភារកិច្ចដំបូង គឺជួយសំអាតសាលា អញ្ចឹងតាំងពីថ្ងៃប្រជុំមកខ្ញុំងាកតាមមាត់បង្អួច ឃើញសំរាមច្រើនណាស់នៅខាងក្រោយនេះ អញ្ចឹងខ្ញុំបានឲ្យគេមកសំអាតហើយ អញ្ចឹងជាបឋមខ្ញុំជួយសំអាតបរិស្ថាន ខ្ញុំមិនលូកដៃចូលកិច្ចការងារបច្ចេកទេសទេ ប៉ុន្តែខ្ញុំជួយអភិវឌ្ឍសាលាបន្តទៀត»។
លោកបណ្ឌិតសភាចារ្យ ហង់ ជួនណារ៉ុន បានណែនាំដល់ក្រុមប្រឹក្សាភិបាល គណៈកម្មការប្រតិបត្តិ និងគណៈគ្រប់គ្រងនៃវិទ្យាល័យព្រះស៊ីសុវត្ថិ តើត្រូវធ្វើយ៉ាងម៉េចឲ្យសាលាស្អាតជាមុនសិន ហើយបន្ទាប់ពីការប្រកាសក្រុមប្រឹក្សាភិបាលនេះ។
ទន្ទឹមនឹងនេះ លោករដ្ឋមន្ត្រីក៏បានស្នើសុំឲ្យគណៈគ្រប់គ្រងសាលាចុះត្រួតពិនិត្យតាមថ្នាក់រៀន ដើម្បីធ្វើយ៉ាងណាឲ្យបន្ទប់សិក្សារបស់សិស្ស មានផាសុកភាព ស្អាត ហើយកន្លែងណាដែលអាចរៀនបានត្រូវជួសជុលកែតម្រូវ និងដាក់ជាវិន័យដើម្បីឲ្យសិស្សានុសិស្សចូលរួមថែទាំសម្ភារៈ នៅក្នុងសាលារៀនទាំងអស់គ្នា។
លោកបណ្ឌិតសភាចារ្យ ហង់ ជួនណារ៉ុន បានបញ្ជាក់ថា ជាមួយគ្នានេះដែរ ក្រុមប្រឹក្សាភិបាលតើត្រូវធ្វើដូចម្ដេច ដើម្បីឲ្យសាលារៀនព្រះស៊ីសុវត្ថិ ជាសាលារៀនគំរូមួយដែលស្អាត និងមានសោភ័ណ្ឌភាពយ៉ាងដូចម្ដេច ប្រសិនបើយើងក្រឡេកទៅមើលនៅទសវត្សឆ្នាំ៥០ និង៦០ វិញ គឺជាសាលារៀនមួយមានអាយុ១០០ឆ្នាំជាង ដូច្នេះត្រូវធ្វើយ៉ាងណាឲ្យអ្នកចូលទស្សនា សិស្សានុសិស្សចូលក្នុងបរិវេណ មិនឃើញមានសំរាមបោះចោលពាសវាលពាសកាល ដែលសាកសមជាទីកន្លែងអប់រំ និងបណ្តុះបណ្តាលផងដែរ៕
Source: Kampuchea Thmey Daily
0 Comments