កីឡាករ George Bisanជនជាតិនីហ្សេរីយ៉ាសមាជិករបស់ក្រុមណាហ្គាវើល បានឈរនៅតំបន់កំពូលតារាងអ្នករកគ្រាប់បាល់បញ្ចូលទីបានច្រើនជាងគេ ក្រោយបញ្ចប់រដូវកាលឆ្នាំ២០១៨ នៃពានរង្វាន់ជម្រើសជើងឯកជាតិ ឆ្នាំ២០១៨ (Metfone Cambodian League 2018)គឺរហូតដល់២៨គ្រាប់ម្នាក់ឯង ខណៈកីឡាកររូបនេះក៏ជាផ្នែកមួយដែលបានជួយក្រុមលើកពានប្រចាំរដូវកាលផងដែរ។
កីឡាកររូបនេះបានលើកឡើងថា «សម្រាប់ខ្ញុំរឿងបន្តអាជីពនៅណាហ្គាវើល គឺស្រេចតែលើកិច្ចសន្យារវាងខ្ញុំនឹងក្លិប។ ប្រសិនបើអ្វីដែលពួកគេផ្ដល់ឲ្យខ្ញុំ វាសមស្របនោះ។ ប៉ុន្តែខ្ញុំសង្ឃឹមថា ខ្ញុំអាចបន្តនៅទីនេះទៀត ខ្ញុំសប្បាយចិត្តក្នុងការលេងឲ្យណាហ្គាវើលដ៍។ ជាកន្លែងដ៏ល្អ ជាកន្លែងដ៏រីករាយ។ ការរួមគ្នា នឹងធ្វើឲ្យយើងកាន់តែខ្លាំង»។
សរុបគ្រាប់ក្រោយបញ្ចប់រដូវកាលនេះក្រុមសមាជិកទាំង១២អាចទាត់បញ្ជូលទីគ្នាបាន៤៩៥គ្រាប់។គ្រាប់បាល់២៨គ្រាប់របស់កីឡាករ George Bisan បានទាត់ចូលក្រុមវេស្ទើនភ្នំពេញ ៦គ្រាប់ (ជើងទី២ចំនួន១គ្រាប់) ហើយទាត់ចូលក្រុមអគ្គស្នងការដ្ឋាននគរបាលជាតិ ៥គ្រាប់ (ជើងទី២ចំនួន៤គ្រាប់) អគ្គីសនីកម្ពុជា ៤គ្រាប់ (ជើងទី១ចំនួន៣គ្រាប់) ទាត់ចូលក្រុមព្រះខ័នរាជស្វាយរៀង, អាស៊ីអឺរ៉ុប, សូលទីឡូអង្គរ និងក្រសួងការពារជាតិ ចំនួន៣គ្រាប់ (ជើងទី២ចំនួន១គ្រាប់) ទាត់ចូលក្រុមវិសាខា ២គ្រាប់ និងទាត់ចូលក្រុមភ្នំពេញក្រោន១គ្រាប់។
មុនមកដល់កម្ពុជានៅឆ្នាំ ២០១២ កីឡាករ Bisan George លេងបាល់នៅឈុតយុវជនថ្នាលមួយក្នុងប្រទេសកំណើតរបស់ខ្លួន។ មកដល់កម្ពុជាដំបូងគេនៅឆ្នាំ២០១២ រូបគេចូលជាសមាជិកនៅក្នុងក្រុមចម្ការកៅស៊ូបឹងកេត (បឹងកេតអង្គរ) ប៉ុន្ដែគ្រានោះ ត្រូវក្លិបឆ្លាមសមុទ្រខ្ចីជើងជាបណ្ដោះអាសន្ន។ ចូលដល់រដូវកាល២០១៣ កីឡាកររូបនេះបានចូលលេងឲ្យបឹងកេតអង្គរ ពេញសិទ្ធិ ខណៈរដូវកាល ២០១៤ រូបគេបានប្ដូរទៅចូលរួមជាមួយក្រុមភ្នំពេញក្រោន រហូតដល់រដូវកាល ២០១៥ កន្លងទៅ។ តែនៅជើងទី១រដូវកាល២០១៦ រូបគេបានចេញទៅចូលរួមជាមួយក្លិប Than Quảng Ninh F.C សមាជិកក្នុងលីកកំពូលប្រទេសវៀតណាម ហើយជើងទី២រូបគេបានត្រឡប់មកកាន់កីឡដ្ឋាន RSN Stadium របស់ភ្នំពេញក្រោន វិញ។ ចូលដល់រដូវកាលឆ្នាំ២០១៧ រូបគេចេញទៅចូលរួមជាមួយក្រុមអាស៊ីអឺរ៉ុប ក្នុងជើងទី១ ហើយជើងទី២ បានបន្តទៅចូលរួមជាមួយក្រុមព្រះខ័នរាជស្វាយរៀង និងឆ្នាំ២០១៨ បានចូលរួមជាមួយក្រុមណាហ្គាវើល វិញម្តង។
កីឡាកររូបនេះធ្លាប់ជោគជ័យជាមួយក្លិបភ្នំពេញក្រោន ក្រោយរួមរស់រយៈពេល ២ ឆ្នាំ ពោលគឺគេជាផ្នែកមួយជួយឲ្យក្រុមឈ្នះជើងឯកលីកកំពូលកម្ពុជា ២ ឆ្នាំជាប់គ្នា នៅរដូវកាល ២០១៤ និង ២០១៥ ខណៈគ្រាប់បាល់ ២ គ្រាប់របស់គេលើក្រុម Hoang Anh Attapeu របស់ឡាវ បានជួយភ្នំពេញក្រោន ឈ្នះចំណាត់ថ្នាក់លេខ ៣ ពានរង្វាន់ Toyota Mekong Club Championship 2014 ផងដែរ។ ចំណែកនៅឆ្នាំ២០១៨ នេះរូបគេជាផ្នែកមួយជួយឲ្យណាហ្គាវើល ឈ្នះជើងឯកពានរង្វាន់លីគកំពូលកម្ពុជាឆ្នាំ២០១៨ ផងដែរ៕
Source: Kampuchea Thmey Daily
0 Comments