អ្នកប្រដាល់ជើងខ្លាំងកម្ពុជាឡៅ ចន្ទ្រា ក្លិបកងពលតូចទ័ពឆ័ត្រយោង៩១១ ដែលមុននេះ ត្រូវជួបប្រកួតជាមួយអ្នកប្រដាល់ថៃ Kamlaypit លើសង្វៀនSEATV នារសៀលថ្ងៃសៅរ៍ទី០៦ ខែតុលាឆ្នាំ២០១៨នោះ ត្រូវបានប្តូរអោយជួបជាមួយKhum Phit វិញហើយ។
លោកញាណ សុធី អ្នកផ្គូផ្គងកីឡាករប្រដាល់ប្រចាំSEATV បានប្រាប់អោយដឹងថា មូលហេតុដែលប្តូរកីឡាករថៃពីKamlayphit មកដាក់Khum Phit វិញនេះ ដោយសារតែពិនិត្យឃើញអ្នកប្រដាល់ថៃKamlayphitរូបនេះ ទើបតែប្រកួតកាលពីសប្តាហ៍មុនជាមួយធឿន ធារ៉ា ហើយមួយសប្តាហ៍មុននេះ គេក៏ឡើងប្រកួតជាមួយឡៅ ចន្ទ្រាម្តងហើយដែរ គឺគេប្រកួតជាប់ៗគ្នាពេកសឹងតែរាល់សប្តាហ៍ទៅហើយ។
Khum Phit នេះ គេធ្លាប់មកប្រកួតនៅស្រុកខ្មែរម្តងហើយកាលពី២ឆ្នាំមុន ដោយវាយចាញ់រឿង សោភ័ណ្ឌ ក្លិបមកុដរាជសីហ៍ ត្រឹមពិន្ទុប៉ុណ្ណោះ ។ យ៉ាងណា Khum Phit ជាជើងខ្លាំងមួយរូបនៅស្រុកថៃ និងជាម្ចាស់ខ្សែក្រវាត់ផងដែរ។ នេះបើតាមប្រវត្តិរបស់Khum Phit ។
ទោះជាយ៉ាងណា ការប្រកួតលើកនេះ ឡៅ ចន្ទ្រា មិនអាចធ្វេសប្រហែសនឹងKhum Phit បានឡើយ ព្រោះអ្នកប្រដាល់ថៃរូបនេះ មិនសាមញ្ញនោះទេ ឆ្លងតាមការប្រកួតជាមួយរឿង សោភ័ណ្ឌ កន្លងមកនោះ។
លោក ញាណ សុធី បានឲ្យដឹងទៀតថា Khum Phitនេះ មានប្រវត្តិប្រកួតតែចំនួន៦៩លើកប៉ុណ្ណោះ ក្នុងនោះវាយឈ្នះ៥៧លើក ចាញ់១០លើក និងស្មើ០២លើក។ ចំណែក ឡៅ ចន្ទ្រា មានកំនត់ត្រាប្រកួតចំនួន១១០លើក ឈ្នះ១០០លើក ចាញ់១០លើក មិនដែលស្មើ។
យ៉ាងណាសម្រាប់ការជួបគ្នារវាងឡៅ ចន្ទ្រា និង Khum Phit នេះ គេរំពឹងថា ឡៅ ចន្ទ្រា នឹងឈ្នះការប្រកួតនេះ។ ដូច្នេះចាំមើល តើឡៅ ចន្ទ្រា អាចយកឈ្នះKhum Phit បានមែនឬអត់សម្រាប់ជំនួបលើកដំបូងនេះ ?៕
Source: Kampuchea Thmey Daily
0 Comments