នាយករដ្ឋមន្ត្រីម៉ាឡេស៊ីលោក Mahathir Mohamad បាននិយាយនៅថ្ងៃចន្ទថា ប្រទេសម៉ាឡេស៊ីបានដោះលែងជនជាតិភាគតិចមូស្លីមអ៊ុយហ្គ័រចំនួន១១នាក់ដែលបានរត់ភៀសខ្លួនទៅកាន់ប្រទេសអាស៊ីអាគ្នេយ៍មួយនេះ បន្ទាប់ពីការរត់ហែកគុកពីប្រទេសថៃកាលពីឆ្នាំមុនព្រោះពួកគេមិនបានធ្វើអ្វីខុសនោះទេ។
ដោយដកស្រង់សម្តីមេធាវីរបស់បុរសទាំងនោះ, Reuters បានរាយការណ៍កាលពីសប្តាហ៍មុនថា ម៉ាឡេស៊ីបានដោះលែងអ្នកទោសទាំង១១នាក់ពីមន្ទីរឃុំឃាំងនិងបញ្ជូនពួកគេទៅកាន់ប្រទេសទួរគីដោយមិនខ្វល់ពីសំណើរបស់ប្រទេសចិនដែលឲ្យប្រគល់ពួកគេទៅកាន់ទីក្រុងប៉េកាំងឡើយ។
លោក Mahathir បាននិយាយនៅក្នុងការធ្វើអត្ថាធិប្បាយខ្លីៗទៅកាន់អ្នកយកព័ត៌មានក្នុងរដ្ឋសភាថា “ពួកគេមិនបានធ្វើអ្វីខុសទេនៅក្នុងប្រទេសនេះដូច្នេះពួកគេត្រូវបានដោះលែង”។
ការដោះលែងនេះទំនងជាធ្វើឲ្យប៉ះពាល់ដល់ទំនាក់ទំនងជាមួយប្រទេសចិនដែលត្រូវបានធ្វើតេស្តរួចទៅហើយចាប់តាំងពីលោក Mahathir ទទួលបានជ័យជំនះក្នុងការបោះឆ្នោតដ៏គួរឲ្យភ្ញាក់ផ្អើលកាលពីខែឧសភាហើយបានលុបចោលគម្រោងដែលមានតម្លៃជាង២០ពាន់លានដុល្លាររបស់ក្រុមហ៊ុនចិន។
ប្រទេសចិនដែលបានស្នើសុំធ្វើបត្យាប័នពួកគេបាននិយាយកាលពីថ្ងៃសុក្រថា ខ្លួនសូមជំទាស់យ៉ាងដាច់ខាតចំពោះការសម្រេចចិត្តរបស់ប្រទេសម៉ាឡេស៊ីក្នុងការដោះលែងជនជាតិអ៊ុយហ្គ័រទាំង១១នាក់និងបញ្ជូនពួកគេទៅកាន់ប្រទេសទួរគី។
មេធាវីរបស់ពួកគេបាននិយាយថា ព្រះរាជអាជ្ញានៅក្នុងប្រទេសម៉ាឡេស៊ីដែលមានជនជាតិមូស្លីមភាគច្រើនបានទម្លាក់ការចោទប្រកាន់ប្រឆាំងជនជាតិអ៊ុយហ្គ័រលើមូលដ្ឋានមនុស្សធម៌។
គួរបញ្ជាក់ថា បុរសទាំងនោះត្រូវបានឃុំខ្លួននិងចោទប្រកាន់ពីបទចូលទៅក្នុងប្រទេសម៉ាឡេស៊ីដោយខុសច្បាប់បន្ទាប់ពីការហែកគុកកាលពីខែវិច្ឆិកា៕ REUTERS
Source: Kampuchea Thmey Daily
0 Comments