អ្នកប្រដាល់ព្រឿង សុជាតិ ក្លិបកងពលធំអន្តរាគមន៍លេខ២ បានវាយចាញ់ អ្នកប្រដាល់ថៃ Nuth Kor.Kesanon ក្នុងទឹកទី១ ក្នុងការជួបប្រកួតជម្រុះជុំទី៣ ដណ្តើមខ្សែក្រវាត់ខារ៉ាបាវរដូវកាលថ្មីទម្ងន់៦០គីឡូក្រាម នៅសង្វៀនបាយ័នស្ទឹងមានជ័យ កាលពីយប់ថ្ងៃអាទិត្យទី២១ ខែតុលា ឆ្នាំ២០១៨។
Nuth Kor. បានធ្វើអោយព្រឿង សុជាតិត្រូវអាជ្ញាកណ្តាលរាប់ដល់១០ ខណៈដែលការប្រកួតទើបបានប្រហែល១នាទីនោះ ។ ការចាញ់លើកនេះទៀត ព្រឿង សុជាតិ ទំនងជាអស់ឪកាសបានឡើងទៅប្រកួតនៅពាក់កណ្តាលផ្តាច់ព្រ័ត្រហើយ ព្រោះចាញ់៣ជុំទៅហើយនោះ ។ចំណែក Nuth Korពូលកីឡាករថៃ បើទោះបីឈ្នះមួយប្រកួតនេះក្តី ក៏គេមិនប្រាកដថាបានឡើងទៅពាក់កណ្តាលផ្តាច់ព្រ័ត្រដែរ ត្បិតក្នុង៣ជុំកន្លងនេះ គេឈ្នះ បាន១ប្រកួត និងចាញ់២ប្រកួត ។
ចំពោះ អ៊ូច ធារិទ្ធ អ្នកប្រដាល់ក្លិបអាណាចក្រគុនខ្មែរ បានវាយចាញ់អ្នកប្រដាល់ថៃYodpayak Kor.Adisorn ដោយពិន្ទុនោះ គឺជាការប្រកួតលក្ខណៈមិត្តភាពអន្តរជាតិប៉ុណ្ណោះ ។ អ្នកប្រដាល់ថៃ Yodpayak Kor.Adisorn គេជាសមាសភាពគូខ្សែក្រវាត់ម្នាក់ដែរ គេត្រូវជួបប្រកួតជាមួយរិទ្ធ ភូលូ ក្លិបអាណាចក្រគុនខ្មែរ សម្រាប់ការប្រកួតជម្រុះជុំទី៣នេះ តែដោយសាររិទ្ធ ភូលូ គេមានរបួសជើងមិនអាចឡើងប្រកួតបាន គណៈកម្មការបច្ចេកទេស ក៏ប្តូរអោយអ៊ូច ធារិទ្ធឡើងប្រកួតជំនួសវិញ ប៉ុន្តែពុំមែនជាការប្រកួតជម្រុះខ្សែក្រវាត់នោះទេ គឺជាការប្រកួតជាលក្ខណៈមិត្តភាពអន្តរជាតិប៉ុណ្ណោះ ។
វ៉ាន់ វឿន អ្នកប្រដាល់ក្លិបឃ្លាំងមឿងកីឡាខេត្តពោធិសាត់ បានផ្តួល សង គង់ អ្នកប្រដាល់ក្លិបអេភូថងកីឡា អោយសន្លប់ក្នុងទឹកទី៣ ដោយស្នៀតជង្គង់អុកចូលចុងដង្ហើម ។
ដោយឡែក ការប្រកួតលក្ខណៈមិត្តភាពអន្តរជាតិ កាលពីល្ងាចថ្ងៃទី២០តុលា នៅសង្វៀនបាយ័នស្ទឹងមានជ័យនេះដែរ អ្នកប្រដាល់កម្ពុជាក៏វាយចាញ់អ្នកប្រដាល់ថៃទាំងពីរនាក់ដែរ ។
ក្នុងនោះ វង្ស ណយ អ្នកប្រដាល់ក្លិបកុលបុត្រគុនខ្មែរខណ្ឌទួលគោក បានវាយចាញ់ Kamlaipetch ដោយពិន្ទុ ។ វង្ស ណយ គេឡើងសងសឹក Kamlaipetch តែសងសឹកមិនបានសម្រេចនោះឡើយ ។
ចំណែក ប៉ោ ភារិទ្ធឬយ៉េន ឌីណា អ្នកប្រដាល់សមាគមកីឡាប្រដាល់ក្រសួងកសិកម្មវិញ បានវាយឈ្នះអ្នកប្រដាល់ថៃFanimit Phran ដោយពិន្ទុដែរ ក្នុងការជួបប្រកួតគ្នាទម្ងន់៦៣,៥០០គីឡូក្រាម ។នៅក្នុងការប្រកួតគ្នា៥ទឹកនោះ ប៉ោ ភារិទ្ធ បានមានប្រៀបលើFanimit Phran តែមួយទឹកដំបូងប៉ុណ្ណោះ ខណៈដែល៤ទឹកចុងក្រោយ គឺចាញ់ប្រៀបថៃតែម្តង ដែលធ្វើអោយចប់ការប្រកួត៥ទឹកប៉ោ ភារិទ្ធចាញ់Fanimit Phranដោយពិន្ទុ។
ដោយឡែក ចាន់ គឹមលន់ អ្នកប្រដាល់ក្លិបនិរោធមានជ័យ បានវាយចាញ់អេ រ៉ាវ៉ាន់ចាន់រាជ អ្នកប្រដាល់ក្លិបកុសលកីឡាដោយពិន្ទុ ហើយអេលីត សុខហេងអ្នកប្រដាល់ក្លិបឆ្មាសសែនសុខគុនខ្មែរ បានប្រកួតឈ្នះ រិទ្ធ សារ៉ន អ្នកប្រដាល់ក្លិបអាណាចក្រគុនខ្មែរ ក្នុងទឹកទី៤៕
Source: Kampuchea Thmey Daily
0 Comments