លោកប្រធានាធិបតី Donald Trump កាលពីថ្ងៃអង្គារបានព្រមានដល់ប្រទេសហុងឌូរ៉ាសថា លោកនឹងកាត់ជំនួយរាប់លានដុល្លារប្រសិនបើក្រុមជនចំណាកស្រុកមានគ្នាប្រហែល២,០០០នាក់ត្រូវបានអនុញ្ញាតឲ្យចូលសហរដ្ឋអាមេរិក។
ក្បួនជនអន្តោប្រវេសន៍មួយបានចាប់ផ្តើមកាលពីថ្ងៃសៅរ៍ចេញពីប្រទេសដែលមានភាពក្រីក្រនិងពោរពេញដោយអំពើហិង្សាមួយនេះហើយធ្វើដំណើរទៅភាគខាងជើងតាមរយៈការធ្វើដំណើរដ៏វែងឆ្ងាយឆ្លងកាត់ប្រទេសហ្គាតេម៉ាឡានិងម៉ិកស៊ិកទៅកាន់ព្រំដែនសហរដ្ឋអាមេរិក។
លោក Trump ដែលកំណត់យកការបង្ក្រាបលើការធ្វើអន្តោប្រវេសន៍ខុសច្បាប់ជាគន្លឹះនៃតំណែងប្រធានាធិបតីរបស់គាត់បានបង្ហោះ Twitter ថា ជំនួយអាមេរិកចំពោះប្រទេសហុងឌូរ៉ាសដែលគ្រោងនឹងឈានដល់ជិត៦៦លានដុល្លារនៅក្នុងឆ្នាំ២០១៩គឺនឹងបញ្ចប់។
លោកបាននិយាយថា “សហរដ្ឋអាមេរិកសូមជូនដំណឹងដល់ប្រធានាធិបតីនៃប្រទេសហុងឌូរ៉ាសថា ប្រសិនបើក្បួននៃមនុស្សដ៏ធំដែលកំពុងធ្វើដំណើរទៅសហរដ្ឋអាមេរិកមិនត្រូវបានបញ្ឈប់ហើយត្រឡប់ទៅប្រទេសហុងឌូរ៉ាសវិញទេនោះ ប្រាក់ឬជំនួយនឹងមិនត្រូវបានផ្តល់ទៅឲ្យហុងឌូរ៉ាសទេ”។
ក្រោយមក លោកប្រធានាធិបតីបានព្រមានប្រទេសហ្គាតេម៉ាឡានិងអែលសាល់វ៉ាឌ័រថា ពួកគេនឹងប្រឈមនឹងលទ្ធផលដូចគ្នានេះ។
លោកបាននិយាយថា “យើងបានជូនដំណឹងដល់ប្រទេសហុងឌូរ៉ាស ហ្គាតេម៉ាឡានិងអែលសាល់វ៉ាឌ័រនៅថ្ងៃនេះថា ប្រសិនបើពួកគេអនុញ្ញាតឲ្យពលរដ្ឋរបស់ពួកគេឬអ្នកដទៃធ្វើដំណើរឆ្លងកាត់ព្រំដែនរបស់ពួកគេទៅកាន់សហរដ្ឋអាមេរិកជាមួយគោលបំណងចូលមកប្រទេសរបស់យើងដោយខុសច្បាប់នោះ ការចំណាយទាំងអស់ដែលផ្តល់ឲ្យពួកគេនឹងបញ្ឈប់!”។
ប្រទេសហ្គាតេម៉ាឡាបានប្រកាសថា ខ្លួននឹងបញ្ឈប់ក្រុមនេះមិនឲ្យចូលប្រសិនបើពួកគេមិនមានទិដ្ឋាការត្រឹមត្រូវ។
ហុងឌូរ៉ាសគឺជាប្រទេសមួយដែលមានប្រជាជន៩លាននាក់ប៉ុន្តែប្រជាជនហុងឌូរ៉ាសប្រហែល ១លាននាក់បានរស់នៅក្នុងសហរដ្ឋអាមេរិកដែលភាគច្រើនគឺខុសច្បាប់៕ AFP
Source: Kampuchea Thmey Daily
0 Comments