ការប្រកួតជម្រុះដណ្តើមខ្សែក្រវាត់ជើងឯកWurkz ទម្ងន់៦៧គីឡូក្រាម នៅសង្វៀនទូរទស្សន៍ SEA TV នារសៀលថ្ងៃអាទិត្យទី០៧ ខែតុលា ឆ្នាំ២០១៨នេះ ជាការប្រកួតសប្តាហ៍ទី៣ ជុំទី២ រវាងអ្នកប្រដាល់កម្ពុជា ពុទ្ធ ឆាយរិទ្ធី ក្លិបពុទ្ធសេរីវង្សកីឡា និងអ្នកប្រដាល់ថៃ Keo Kongvan ហើយអ្នកប្រដាល់ កម្ពុជាមាជ សុខរ៉ា ក្លិបតាព្រហ្មមានជ័យ និង អ្នកប្រដាល់ថៃ Keng Kat។
សម្រាប់ជំនួបក្នុងជុំទី២នេះ រវាងពុទ្ធ ឆាយរិទ្ធី និង Keo Kongvan នេះ ពួកគេទាំងពីរនាក់នេះ មិនធ្លាប់ជួបគ្នាទេកន្លងមក ។ ឆាយរិទ្ធី និង Keo Kongvan នេះ គេមានសមត្ថភាពប្រហាក់ប្រហែលគ្នាទេ ហើយមាឌ និងកម្ពស់ ក៏ប្រហែលគ្នាដែរ ដោយថៃគេមានកម្ពស់១,៧០ម៉ែត្រ ខណះ ពុទ្ធ ឆាយរិទ្ធី គេ១,៧១ ម៉ែត្រ ។
Keo Kongvan គេមានកំនត់ត្រាប្រកួតចំនួន៨៦លើក ឈ្នះ៦៨លើក ចាញ់១៦លើក និង ស្មើ០២លើក ។ចំណែក ពុទ្ធ ឆាយរិទ្ធី គេមានកំនត់ត្រាប្រកួត១០៨លើក ឈ្នះ៨៣លើក ចាញ់២៣ លើក និងស្មើ០២លើក។
ទោះជាយ៉ាងណាក្តី សម្រាប់ការជួបគ្នានេះ ពុំអាចសន្និដ្ឋានមុនថា អ្នកណាឈ្នះ អ្នកណាចាញ់នោះឡើយ ហើយពីរនាក់នេះ ក៏មិនអាចអ្នកណាមើលស្រាលអ្នកណាបានដែរ ។គួរបញ្ជាក់ថា ឆ្លងកាត់មួយប្រកួតកន្លងមក ឆាយរិទ្ធី បាន១ពិន្ទុ(ចាញ់) ហើយ Keo Kongvan បាន៣ពិន្ទុ(ឈ្នះ) ។
ចំពោះការជួបគ្នារវាងមាជ សុខរ៉ា និង Keng Kat វិញ ប្រហែលជាមិនពិបាកទស្សន៍ទាយនោះទេ ។ ត្បិតថា អ្នកប្រដាល់ Keng Kat ល្អនិងខ្លាំងជាងមាជ សុខរ៉ា បើតាមការកត់សម្គាល់ការប្រកួតរបស់ពួកគេកាលពីពេលកន្លងមកនោះ ។
មាជ សុខរ៉ា ទោះបីគេជាជើងខ្លាំងជើងចាស់ក្តី តែកម្រិតសមត្ថភាពបច្ចេកទេសរបស់គេគឺមិនដល់ថៃនោះទេ ។ សុខរ៉ា គេមានស្នៀតប្រដាល់ល្អ របៀបវាយរបស់គេក៏ល្អដែរ ហើយថែមទាំងវាយមានភាពរហ័សរហួនទៀតផង តែកម្លាំងទឹកចិត្តរបស់គេរាងតូចបន្តិច ។
ប៉ុន្តែយ៉ាងណា មាជ សុខរ៉ា ជួប Keng Kat នៅក្នុងព្រឹត្តិការណ៍ខ្សែក្រវាត់ជុំទី២នេះ គេប្រហែលជាពុំមានសំណាងល្អនោះទេ ព្រោះ Keng Kat ជាអ្នកប្រដាល់ថៃជើងចាស់និងធ្លាប់វាយឈ្នះអ្នកប្រដាល់កម្ពុជាច្រើននាក់ហើយ ។
Keng Kat គេមានប្រវត្តិប្រកួតចំនួនចំនួន១០៤លើក ឈ្នះ៩១ លើក ចាញ់១២លើក និងស្មើ០១លើក ។ អ្នកប្រដាល់ថៃរូបនេះ មានរបៀបវាយល្អ គឺវាយដោយមិនបង្ខំ គេវាយចេញមួយៗតែច្បាស់ហើយវាយចេញភាគច្រើនចំគោលដៅបានល្អ ។ ដូច្នេះ ចាំមើល ការប្រកួតក្នុងជុំទី២នេះ តើមាជ សុខរ៉ា អាចយកឈ្នះ Keng Kat បានឬអត់នោះ ? ។
ចំពោះ ការប្រកួតក្រៅពីគូខ្សែក្រវាត់នេះ សេន កុសល អ្នកប្រដាល់ក្លិបមោងឫស្សីមរតកគុនខ្មែរ នឹងឡើងប្រកួតជាមួយកូយ ឡាយ អ្នកប្រដាល់ក្លិបកងពលតូចទ័ពឆ័ត្រយោង៩១១។ សម្រាប់ការជួបគ្នារវាងអ្នកប្រដាល់ទាំងពីរនាក់នេះ គេមិនហ៊ានទស្សន៍ទាយមុនថា នរណាឈ្នះ នរណាចាញ់នោះឡើយ ព្រោះថានេះជាការជួបគ្នាលើកដំបូងប៉ុណ្ណោះ ។
កូយ ឡាយ គេប្រកួតលើកចុងក្រោយនេះ វាយឈ្នះសុខ សុវណ្ណក្លិបកងពលធំអន្តរាគមន៍លេខ២ដោយពិន្ទុ ឯ សេន កុសល ប្រកួតចុងក្រោយគេវាយចាញ៉អ្នកប្រដាល់ស្រករក្រោយលន បញ្ញា អ្នកប្រដាល់ក្លិបក្រសួងការពារជាតិ ដោយពិន្ទុ។
សេក វណ្ណះ អ្នកប្រដាល់ក្លិបអង្គរមានជ័យខេត្តសៀមរាប នឹងជួបប្រកួតជាមួយ គ្រី សុខលីន អ្នកប្រដាល់ជើងថ្មី ក្លិបយុវវាលស្បូវខណ្ឌច្បារអំពៅ ដោយប្រកួតក្នុងទម្ងន់៦៣,៥០០គីឡូក្រាម។ពួកគេពីរនាក់នេះ មិនដែលជួបគ្នាទេកន្លងមក ។ ចាំមើល រវាងសេក វណ្ណះ និង គ្រី សុខលីន នេះ តើនរណាឈ្នះ ?៕
Source: Kampuchea Thmey Daily
0 Comments