ភ្នំពេញ ៖ អង្គការមូលនិធិថែទាំសុខភាពអ្នកជំងឺអេដស៍ (AHF) នឹងសហការជាមួយអាជ្ញាធរជាតិប្រយុទ្ធនឹងជំងឺអេដស៍ រៀបចំទិវាពិភពលោកប្រយុទ្ធនឹងជំងឺអេដស៍នៅថ្ងៃ០១ធ្នូ លក្ខណៈទ្រង់ទ្រាយធំបំផុត នៅមជ្ឈមណ្ឌលកោះពេជ្រ ដោយមានការចូលរួមពីស្ថាប័នរដ្ឋាភិបាល និងសហគមន៍ប្រមាណជិត១ពាន់នាក់។
ថ្លែងនៅក្នុងសន្និសីទសារព័ត៌មាន ស្ដីពីការប្រកាសការរៀបចំទិវាពិភពលោកប្រយុទ្ធនឹងជំងឺអេដស៍នៅថ្ងៃ០១ធ្នូ កាលពីព្រឹកថ្ងៃទី១៦ ខែវិច្ឆិកា ឆ្នាំ២០១៨ នៅសណ្ឋាគារសាន់ អ៊ែនមួន លោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ី នៃអង្គការមូលនិធិថែទាំសុខភាពអ្នកជំងឺអេដស៍ បានមានប្រសាសន៍ថា សម្រាប់ឆ្នាំ២០១៨នេះ អង្គការ AHF នឹងរៀបចំទិវាពិភពលោកប្រយុទ្ធនឹងជំងឺអេដស៍ថ្ងៃ០១ធ្នូ ដ៏ធំ នៅមជ្ឈមណ្ឌលកោះពេជ្រ ក្រោមអធិបតីភាពលោកទេសរដ្ឋមន្ត្រី អៀង ម៉ូលី ប្រធានអាជ្ញាធរជាតិប្រយុទ្ធនឹងជំងឺអេដស៍ ដោយមានការចូលរួមពីស្ថាប័នរដ្ឋាភិបាល និងសហគមន៍ប្រមាណជិត១ពាន់នាក់។
លោកវេជ្ជបណ្ឌិតបានបន្តថា នៅក្នុងទិវានោះ ក៏មានការរៀបចំដង្ហែក្បួននៅក្នុងបរិវេណមជ្ឈមណ្ឌលកោះពេជ្រ ការរាំកន្ត្រាក់អារម្មណ៍ ការរាំហែក្បួន និងការធ្វើតេស្តឈាមរកមេរោគអេដស៍ ព្រមទាំងនៅពេលរាត្រី ក៏មានការប្រគំតន្ត្រី ដែលមានការចូលរួមដោយតារាល្បីៗ ដូចជាលោក ខេមរៈ សេរីមន្ត ក្រុមកំប្លែង និងតារាជាច្រើនទៀត។
លោកវេជ្ជបណ្ឌិតបានបន្តថា ការរៀបចំទិវាអេដស៍ពិភពលោកនៅថ្ងៃទី០១ធ្នូខាងមុខនេះធ្ វើឡើងក្នុងគោលបំណង ដើម្បីក្រើនរំលឹកដល់មនុស្សជាតិថា សង្គ្រាមប្រយុទ្ធនឹងជំងឺអេដស៍ នៅមិនទាន់បញ្ចប់ទេ ដោយជារៀងរាល់ឆ្នាំ មានមនុស្សប្រមាណ១លាននាក់ បានស្លាប់ដោយសារជំងឺនេះ និងជាង១លាន៨សែននាក់ បានឆ្លងជំងឺអេដស៍ ក្នុង១ឆ្នាំ។
លោកបានឲ្យដឹងទៀតថា ព្រឹត្តិការណ៍ នៃទិវានេះ នឹងជួយបង្ហាញដល់ប្រជាពលរដ្ឋកម្ពុជាថា មេរោគអេដស៍អាចការពារ និងព្យាបាលបាន ហើយចំពោះអ្នកដែលរស់នៅជាមួយមេរោគអេដស៍ ពួកគេនៅតែអាចរស់នៅបានប្រកបដោយសុខភាពល្អ ដោយមានការជួយគាំពារ និងទទួលបានថ្នាំព្យាបាលជំងឺអេដស៍យ៉ាងត្រឹមត្រូវ។
ជាក់ស្ដែងបច្ចុប្បន្ន មានមនុស្សប្រមាណជា៦៧.០០០នាក់ នៅប្រទេសកម្ពុជា កំពុងរស់នៅជាមួយមេរោគអេដស៍ ក្នុងនោះមានអ្នកជំងឺជាងពាក់កណ្ដាល កំពុងទទួលបានការគាំពារ និងព្យាបាលដោយមានការគាំទ្រពីអង្គការAHF។
លោកបានបន្ថែមថា ជាមួយគ្នានេះដែរ ទិវានេះក៏ដើម្បីបង្ហាញពីសកម្មភាពនានា ដែលអង្គការAHFបានធ្វើដោយជោគជ័យកន្លងមកដូចជា បានជួយគាំពារដល់អ្នករស់នៅជាមួយមេរោគអេដស៍ប្រមាណ១លាននាក់ ក្នុងពេលបច្ចុប្បន្ន និងបើកសម្ពោធគម្រោងតេស្តឈាមរកមេរោគអេដស៍ ដោយរថយន្តចល័តរបស់អង្គការនៅកម្ពុជា។
លោកវេជ្ជបណ្ឌិត ឈឹម សារ៉ាត់ សង្ឃឹមថា «ទិវាពិភពលោកប្រយុទ្ធនឹងជំងឺអេដស៍នេះ នឹងធ្វើឲ្យយុទ្ធនាការប្រយុទ្ធនឹងជំងឺអេដស៍ កាន់តែប្រសើរទាំងនៅប្រទេសកម្ពុជា និងទូទាំងពិភពលោក»។
លោកវេជ្ជបណ្ឌិត តែង គន្ធី អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍បានមានប្រសាសន៍នៅក្នុងសន្និសីទសារព័ត៌មានឲ្យដឹងដែរថា ទិវាពិភពលោកប្រយុទ្ធនឹងជំងឺអេដស៍០១ ខែធ្នូ ឆ្នាំ២០ ១៨ ដែលជាឆ្នាំទី២៥នេះ អាជ្ញាធរជាតិប្រយុទ្ធនឹងជំងឺអេដស៍ នឹងរៀបចំទិវានេះនៅសាលសន្និសិទចតុមុខ។
ទន្ទឹមនឹងមានការប្រារព្ធពិធីនោះ យើងក៏មានការធ្វើបដាចងនៅតាមដងផ្លូវទូទាំងប្រទេសចំនួន២៥០បដា ដើម្បីក្រើនរំលឹកដល់សាធារណជន បានយល់ដឹង និងការពារខ្លួន កុំឲ្យឆ្លងជំងឺអេដស៍។
លោកវេជ្ជបណ្ឌិតបានបន្តថា ជាមួយគ្នានេះដែរ អាជ្ញាធរជាតិ ក៏បានរៀបចំការប្រគំតន្ត្រីនៅវត្តភ្នំដោយមានការចូលរួមពីតារាចម្រៀងជាច្រើន ដើម្បីច្រៀង និងសំដែង ជូនដល់សាធារណជន។
ជាងនេះទៅទៀត បានសហការជាមួយក្រសួងប្រៃសណីយ៍ និងទូរគមនាគមន៍ ដើម្បីផ្ញើសារអប់រំស្ដីពីជំងឺអេដស៍តាមរយៈទូរស័ព្ទផងដែរ។
ចំណែកលោក ខេរៈ សេរីមន្ត ឯកអគ្គរាជទួតសុឆន្ទៈ នៃអង្គការមូលនិធិថែទាំសុខភាពអ្នកជំងឺអេដស៍ប្រចាំនៅកម្ពុជា បានប្ដេជ្ញាថា នឹងជួយផ្សព្វផ្សាយអប់រំ ស្ដីពីជំងឺអេដស៍នេះ នៅតាមការប្រគំតន្ត្រីផ្សេងៗ និងធ្វើជាសាអប់រំខ្លីបង្ហោះនៅលើបណ្ដាញសង្គម និងស្នើឲ្យសាធារណជន ក៏ដូចជាយុវវ័យរួមគ្នាប្រយុទ្ធ និងលុបបំបាត់ជំងឺនេះឲ្យអស់ពីកម្ពុជា។
គួរបញ្ជាក់ថា តាមរបាយការណ៍របស់មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ បានឲ្យដឹងថា កាលឆ្នាំ២០១៧កន្លងទៅ មានប្រជាពលរដ្ឋកម្ពុជាឆ្លងជំងឺអេដស៍ថ្មីចំនួន៥៧២នាក់ ក្នុងនោះមានស្ត្រីមេផ្ទះ និងយុវវ័យ៕
Source: Kampuchea Thmey Daily
0 Comments