លោកឧបនាយករដ្ឋមន្ត្រី ប៊ិន ឈិន ៖ ចាប់តាំងពីរបបខ្មែរក្រហម ត្រូវបានដួលរលំនៅថ្ងៃ៧ ខែមករា ឆ្នាំ១៩៧៩ កម្ពុជាមិនដែលមានការស្ទាក់ស្ទើរក្នុងការស្វែងរកយុត្តិធម៌ជូនជនរងគ្រោះឡើយ ដើម្បីបញ្ចប់និទណ្ឌភាព
ភ្នំពេញ ៖ តាមការគ្រោងទុក កាលពីព្រឹកថ្ងៃទី១៦ ខែវិច្ឆិកា ឆ្នាំ២០១៨ អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានប្រកាសសាលក្រមលើសំណុំរឿង០០២ វគ្គ២ ពាក់ព័ន្ធនឹងជនជាប់ចោទ នួន ជា និង ខៀវ សំផន ដែលត្រូវបានចោទប្រកាន់ពីបទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងការបំពារបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវឆ្នាំ១៩៤៩ ហើយបើតាមសាលក្រមនោះ ចៅក្រមបានសម្រេចផ្តន្ទាទោសនួន ជា និង ខៀវ សំផន ដាក់ពន្ធនាគារអស់មួយជីវិត ហើយក៏បានបើកផ្លូវឲ្យជនជាប់ចោទប្តឹងជំទាស់តាមទម្រង់ច្បាប់ផងដែរ។
ពិធីប្រកាសសាលក្រមលើសំណុំរឿង០០២/០២ ដែលមានជនត្រូវចោទ នួន ជា និង ខៀវ សំផន នេះ មានអ្នកចូលរួមប្រមាណ១០០០នាក់ មកពីគ្រប់មជ្ឈដ្ឋានទាំងអស់ រួមមាន ជនរងគ្រោះ សិស្ស យុវជន ឥស្សរជនជាន់ខ្ពស់ និងបណ្តាអង្គទូតនានា ហើយព្រឹត្តិការណ៍ជាតិប្រវត្តិសាស្ត្រនេះ ក៏មានការផ្សាយផ្ទាល់តាមទូរទស្សន៍ជាតិកម្ពុជា ទ.ទ.ក (TVK) និងទូរទស្សន៍ឯកជនដទៃទៀតផងដែរ។ ជាមួយគ្នានោះ ក៏មានការអញ្ជើញចូលរួមពីឯកឧត្តមកិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានក្រុមការងាររាជរដ្ឋាភិបាលសម្រាប់ទ្រទ្រង់ដំណើរការអង្គជំនុំជម្រះវិសាមញ្ញក្នុងតុលាការកម្ពុជា និងលោក Miguel de Serpa Soares អគ្គលេខាធិការរងអង្គការសហប្រជាជាតិផងដែរ។ សវនាការការប្រកាសសាលក្រមនេះ បានចាប់ផ្តើមនៅម៉ោង៩ និង៣០នាទី រហូតដល់ម៉ោង ១១ និង៤០នាទីព្រឹក ដោយលោកចៅក្រម និល ណុន បានអានសេចក្តីសន្និដ្ឋានសង្ខេបលើសំណុំរឿងនេះ ហើយក្រោយពីអានសេចក្តីសន្និដ្ឋានលើសំណុំរឿង០០២/០២នេះ បានប្រកាសផ្តន្ទាទោសនួន ជា និង ខៀវ សំផន ដាក់ពន្ធនាគារអស់មួយជីវិត។
ក្រោយប្រកាសសាលក្រមខាងលើនេះ អង្គជំនុំជម្រះវិសាមញ្ញក្នុងតុលាការកម្ពុជា ក៏បានចេញសេចក្តីប្រកាសព័ត៌មានមួយ ដោយបានបញ្ជាក់ថា អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) បានសម្រេចផ្ដន្ទាទោសអតីតមេដឹកនាំជាន់ខ្ពស់ខ្មែរក្រហម នួន ជា និងខៀវ សំផន ពីបទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងការបំពារបំពានយ៉ាងធ្ងន់ធ្ងរទៅលើអនុសញ្ញាទីក្រុងហ្សឺណែវឆ្នាំ១៩៤៩ ដែលឧក្រិដ្ឋកម្មទាំងនេះ ត្រូវបានប្រព្រឹត្តនៅតាមទីកន្លែងនានា នៅទូទាំងប្រទេសកម្ពុជា ក្នុងអំឡុងរបបកម្ពុជាប្រជាធិបតេយ្យ ចាប់ពីថ្ងៃទី១៧ ខែមេសា ឆ្នាំ១៩៧៥ ទៅដល់ថ្ងៃទី០៦ ខែមករា ឆ្នាំ១៩៧៩ និងបានបញ្ជាក់ថា សវនាការជាសាធារណៈនៅថ្ងៃសុក្រទី១៦ ខែវិច្ឆិកា ឆ្នាំ២០១៨ បានសម្រេចផ្តន្ទាទោសជនជាប់ចោទ នួន ជា និង ខៀវ សំផន ដាក់ពន្ធនាគារអស់មួយជីវិត។
បន្ទាប់ពីលឺការប្រកាសសាលក្រមនេះ ក៏មានប្រជាពលរដ្ឋមួយចំនួនបានបញ្ចេញយោបល់ផងដែរ ដោយខ្លះពេញចិត្ត និងខ្លះទៀតមិនពេញចិត្ត ដោយសំអាងថា មានមនុស្សច្រើនទៀតបានពាក់ព័ន្ធក្នុងសំណុំរឿងនេះ មិនមែនមានតែ២នាក់នេះទេ។
ចំណែកឯកឧត្តមកិត្តិនីតិកោសលបណ្ឌិត ប៊ិន ឈិន ដែលបានចូលរួមតាមដានព្រឹត្តិការណ៍នោះ បានមានប្រសាសន៍ថា ការប្រកាសសាលក្រមនៅថ្ងៃនេះ គឺជាប្រវត្តិសាស្ត្រមួយទៀតសម្រាប់ប្រជាជនកម្ពុជា និងសម្រាប់មនុស្សជាតិទាំងមូល ពាក់ព័ន្ធនឹងដំណើរការស្វែងរកយុត្តិធម៌ នៅក្នុងក្របខ័ណ្ឌនៃឧក្រិដ្ឋកម្មព្រហ្មទណ្ឌជាតិ និងអន្តរជាតិ ។ នៅក្នុងរយៈកាលជិត៤ ទសវត្សរ៍ ចាប់តាំងពីរបបកម្ពុជាប្រជាធិបតេយ្យហៅកាត់ថា “របបខ្មែរក្រហម” ត្រូវបានដួលរលំនៅថ្ងៃ៧ ខែមករា ឆ្នាំ១៩៧៩ មក កម្ពុជាមិនដែលមានការស្ទាក់ស្ទើរក្នុងការស្វែងរកយុត្តិធម៌ម្ដងណាឡើយ ដើម្បីបញ្ចប់និទណ្ឌភាព ចំពោះឧក្រិដ្ឋកម្ម ដែលបានប្រព្រឹត្តនៅក្នុងរបប៣ឆ្នាំ៨ ខែ២០ថ្ងៃ ដែលធ្វើអោយប្រជាជនរបស់យើងរាប់លាននាក់បានបាត់បង់ជីវិត។
រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃបំផុតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបង្កើតអង្គជំនុំជម្រះវិសាមញ្ញក្នុងតុលាការកម្ពុជាហៅកាត់ថា អ.វ.ត.ក ដោយមានការចូលរួមពីសហគមន៍អន្តរជាតិ ដែលគឺជាកិច្ចខិតខំប្រឹងប្រែងមួយមិនធ្លាប់មានពីមុនមក។ គោលបំណងរបស់យើង គឺដើម្បីស្វែងរកយុត្តិធម៌ ក្នុងក្របខណ្ឌសន្តិភាពស្ថេរភាពនយោបាយ និងការបង្រួបបង្រួមជាតិ ដែលជាមធ្យោបាយដ៏សំខាន់មួយក្នុងការគោរព និងការចងចាំដល់ជនរងគ្រោះទាំងអស់ ដើម្បីជួយពង្រឹងនីតិរដ្ឋនៅក្នុងប្រទេស និងដើម្បីធានាកុំឲ្យមានសោកនាដកម្មបែបនេះកើតឡើងសាជាថ្មីនៅប្រទេសកម្ពុជា ឬនៅទីណាៗទាំងអស់ក្នុងពិភពលោក។
រហូតមកដល់ពេលនេះ អ.វ.ត.ក បានបញ្ចប់ជាស្ថាពរនូវសំណុំរឿងចំនួន ៣ រួមមាន ទី១. សំណុំរឿង០០១ ចំពោះពិរុទ្ធជន កាំងហ្កេចអ៊ាវ ហៅឌុច ដែលបាននឹងកំពុងអនុវត្តទោសមួយជីវិតនៅពន្ធនាគារ ទី២. សំណុំរឿង០០២ ដំណាក់កាលទី១ ចំពោះជនជាប់ចោទ នួន ជា និងខៀវ សំផន ដែលត្រូវបានអង្គជំនុំជំរះតុលាការនេះ ផ្តន្ទាទោសឲ្យជាប់ពន្ធនាគារអស់មួយជីវិតកាលពីថ្ងៃទី២៣ ខែវិច្ឆិកា ឆ្នាំ២០១៦ កន្លងមកនេះ និងទី៣. សំណុំរឿង០០៤ វគ្គ១ ចំពោះជនសង្ស័យ អ៊ឹម ចែម ដែលត្រូវបានលើកលែងការចោទប្រកាន់កាលពីខែមិថុនា ឆ្នាំ២០១៨ កន្លងមក។
ចំពោះសំណុំរឿង០០២ ដំណាក់កាលទី២ អង្គជំនុំជម្រះសាលាដំបូងបានធ្វើសវនាការរយៈពេលចំនួន២៨៣ថ្ងៃ លើភស្តុតាងពាក់ព័ន្ធនឹងបទចោទប្រកាន់ស្ដីពីឧក្រិដ្ឋកម្មប្រឆាំងមនុស្សជាតិ អំពើប្រល័យពូជសាសន៍ និងការបំពារបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវប្រឆាំង នឹងជនជាប់ចោទ នួន ជា និង ខៀវ សំផន។ នៅក្នុងអំឡុងពេលសវនាការនេះ អង្គជំនុំជម្រះសាលាដំបូងបានស្ដាប់សក្ខីកម្មពីបុគ្គលសរុបចំនួន១៨៥នាក់ ក្នុងនោះមានសាក្សីបញ្ជាក់អង្គហេតុចំនួន១១៤នាក់ ដើមបណ្ដឹងរដ្ឋប្បវេណីចំនួន៦៣នាក់ និងអ្នកជំនាញចំនួន៨នាក់។ សវនាការនេះ មានការចាប់អារម្មណ៍យ៉ាងខ្លាំងពីសាធារណជន ដោយមានសាធារណជនចូលរួមស្តាប់ និងតាមដានដោយផ្ទាល់សរុបចំនួន៨២៧៨០នាក់។ សំណុំរឿង០០២ ត្រូវបានគេចាត់ទុកថាជាសំណុំរឿងដ៏សំខាន់ជាងគេបង្អស់ នៅក្នុងសាវតានៃប្រព័ន្ធយុត្តិធម៌អន្តរជាតិចាប់តាំងពីការជំនុំជំរះក្តីនៅ នូរិមប៊ើក ប្រទេសអាឡឺម៉ង់ ដោយហេតុថា សាលាក្តីបានចោទប្រកាន់មេដឹកនាំជាន់ខ្ពស់របស់កម្ពុជាប្រជាធិបតេយ្យដែលនៅមានជីវិតចំនួន៤រូបតែម្ដង។ តែគួរឲ្យសោកស្ដាយជនជាប់ចោទចំនួនពីររូប គឺ អៀង សារី និងអៀង ធីរិទ្ធ មិនបានរស់នៅ ដើម្បីប្រឈមមុខជាមួយតុលាការទេ ខណៈដែលជនរងគ្រោះជាច្រើនទៀត ក៏បានលាចាកលោកដោយពុំបានឃើញយុត្តិធម៌សម្រាប់ពួកគេនៅឡើយ។
តាមឯកឧត្តមឧបនាយករដ្ឋមន្ត្រី ប៊ិន ឈិន ក្រៅពីទិដ្ធភាពយុត្តាធិការ សាលាក្តីនេះ ក៏សម្រេចបាននូវសមិទ្ធផលមិនមែនផ្នែកតុលាការមួយចំនួនទៀត ដូចជា ទី១. កេរ្តិ៍ដំណែលរបស់ អ.វ.ត.ក ត្រូវបានចាត់ទុកជាកត្តាដ៏សំខាន់បំផុត ដែលគួរថែរក្សាទុក និងផ្ដល់ឱកាសសម្រាប់មនុស្សជំនាន់ក្រោយ ដែលរួមមាន ការចងចាំ ការទប់ស្កាត់របបប្រល័យពូជសាសន៍ និងការអប់រំ ក៏ដូចជាការកសាងសមត្ថភាព និងការពង្រឹងស្ថាប័ន ក្នុងវិស័យយុត្តិធម៌។ នៅពេលថ្មីៗនេះរាជរដ្ឋាភិបាលបានកំណត់យកថ្ងៃទី២០ ខែឧសភា ជារៀងរាល់ឆ្នាំជាទិវាជាតិ នៃការចងចាំ និងជាថ្ងៃឈប់សម្រាកសាធារណៈផងដែរ។
ទី២. អ.វ.ត.ក ត្រូវបានទទួលស្គាល់ជាអន្តរជាតិថា ជាតុលាការកូនកាត់គំរូមួយសម្រាប់ធ្វើការវិនិច្ឆ័យ និងឧក្រិដ្ឋកម្ម និងការសម្លាប់រង្គាល។ មានប្រទេសខ្លះ កំពុងស្ថិតក្នុងដំណាក់កាលគិតគូរ និងប្រទេសខ្លះទៀតបាននឹងកំពុងបង្កើតជាបណ្ដើរៗដូចជា បង់ក្លាដេស ស្រីលង្កា កេនយ៉ា សេណេហ្គាល់ និងអាហ្វ្រិកកណ្តាលជាដើម។
ទី៣. ជនរងគ្រោះប្រមាណ៤ពាន់នាក់ ត្រូវបានទទួលស្គាល់ជាដើមបណ្តឹងរដ្ឋប្បវេណី នៅក្នុងសំណុំរឿង០០២ ហើយក៏ត្រូវបានអនុញ្ញាតឲ្យចូលរួមដោយផ្ទាល់នៅក្នុងដំណើរការជំរះព្រមទាំងមានសិទ្ធិទាមទារសំណងផ្លូវចិត្ត និងជាសមូហភាពផងដែរ។ ត្រង់ចំណុចនេះ អ.វ.ត.កបានផ្ដល់ជាគំរូមួយ នឹងក្លាយជាជំហាននាំមុខដ៏សំខាន់ជាងគេ បើប្រៀបធៀបទៅនឹងតុលាការព្រហ្មទណ្ឌអន្តរជាតិដទៃទៀត។
ទី៤. សាធារណៈជនកម្ពុជាជាងកន្លះលាននាក់ បានមកឃើញដំណើរការស្វែងរកយុត្តិធម៌នៅសាលាក្តី ដោយផ្ទាល់ ឬតាមរយៈសកម្មភាពផ្សព្វផ្សាយ ដែលរៀបចំដោយផ្នែកកិច្ចការសាធារណៈ អង្គភាពគាំពារជនរងគ្រោះ និងសហមេធាវីនាំមុខតំណាងដើមបណ្តឹងរដ្ឋប្បវេណី។
ទី៥. មជ្ឈមណ្ឌលតម្កល់ឯកសារច្បាប់ពាក់ព័ន្ធនឹងសាលាដទៃត្រូវបានបង្កើតឡើងតាំងពីចុងឆ្នាំ២០១៥ ដែលមានតួនាទីតម្កល់ឯកសារច្បាប់ និងឯកសារពាក់ព័ន្ធស្តីពីដំណើរការជំនុំជម្រះក្តីរបស់ អ.វ.ត.ក សម្រាប់ឲ្យសាធារណជនអ្នកស្រាវជ្រាវជាតិ និងអន្តរជាតិ មកសិក្សាស្វែងយល់។
ទី៦. ប្រវត្តិសាស្ត្រស្ដីពីរបបខ្មែរក្រហមត្រូវបានដាក់បញ្ចូលក្នុងកម្មវិធីសិក្សាថ្នាក់ទី ១២ កម្រិតវិទ្យាល័យ សម្រាប់ឱ្យសិស្ស និងយុវជនជំនាន់ក្រោយធ្វើការសិក្សាស្វែងយល់អំពីប្រវត្តិសាស្ត្រដ៏ខ្មៅងងឹតរបស់ខ្លួន។
ទី៧. ទស្សនទាន ស្ដីពីរដ្ឋបាលតុលាការ ដែលយកគំរូតាមសាលាក្តីត្រូវបានបង្កើតឡើង និងបញ្ចូលទៅក្នុងច្បាប់អង្គការទាំងបី នៃប្រព័ន្ធយុត្តិធម៌ នឹងត្រូវបានដាក់ឱ្យអនុវត្តនូវប្រព័ន្ធតុលាការជាតិ។ បច្ចុប្បន្ននេះតុលាការជាតិ គ្រប់លំដាប់ថ្នាក់ មានអង្គភាពអចិន្ត្រៃយ៍មួយហៅថា រដ្ឋបាលតុលាការ ដើម្បីធ្វើអោយសេវាសាធារណៈផ្នែកយុត្តិធម៌ កាន់តែមានប្រសិទ្ធភាពដល់អ្នកប្រើប្រាស់។
ឯកឧត្តមឧបនាយករដ្ឋមន្ត្រី ប៊ិន ឈិន បានលើកឡើងទៀតថា ទោះបីជាដំណើរការកាត់ក្តី របស់បានប្រព្រឹត្តទៅយូរជាងការរំពឹងទុក និងរហូតមកដល់ពេលនេះ បានចំណាយថវិកាអស់ប្រមាណ២៩៧លានដុល្លារអាមេរិក ដែលទទួលបានពីរាជរដ្ឋាភិបាលកម្ពុជា និងបណ្ដាប្រទេសផ្ដល់ជំនួយជាង៣៥ ប្រទេសទៀតផងក៏ដោយ ក៏គ្រប់ភាគីពាក់ព័ន្ធទាំងអស់រួមមានរាជរដ្ឋាភិបាលកម្ពុជា អង្គការសហប្រជាជាតិ និងបណ្តាប្រទេសផ្តល់ជំនួយទាំងអស់ បានសំដែងទស្សនៈដូចគ្នាថា អ.វ.ត.ក បាននឹងកំពុងសម្រេចនូវសមិទ្ធផលទាំងផ្នែកយុត្តាធិការ និងមិនមែនផ្នែកយុត្តាធិការយ៉ាងច្រើន។ ជាងនេះទៅទៀតសាលាក្តី ក៏បាននិងកំពុងបន្សល់ទុកកេរដំណែលដ៏ល្អ នៅក្នុងសង្គមកម្ពុជាផងដែរ ហើយក៏បានផ្ទេរចំណេះដឹង និងបទពិសោធន៍ ទៅតុលាការជាតិ និងស្ថាប័នរដ្ឋាភិបាលពាក់ព័ន្ធផ្សេងទៀតផងដែរ ព្រមទាំងបង្កើតបានជាយុទ្ធសាស្ត្រមួយចំនួនសម្រាប់រួមចំណែកក្នុងប្រព័ន្ធយុត្តិធម៌អន្តរជាតិ។
ជាមួយគ្នានោះឯកឧត្តមឧបនាយករដ្ឋមន្ត្រី ប៊ិន ឈិន បានសំដែងការកោតសរសើរយ៉ាងជ្រាលជ្រៅចំពោះអ្នកទាំងឡាយ ដែលបានចូលរួមចំណែកនៅក្នុងដំណើរការនេះ រួមមានចៅក្រម មេធាវី មន្ត្រីច្បាប់ និងបុគ្គលិកសាលាក្តីទាំងអស់ ទាំងភាគីជាតិ និងអន្តរជាតិ ព្រមទាំងប្រជាជន និងបណ្ដារដ្ឋាភិបាលនានា ដែលបានផ្ដល់ថវិកា ហើយជាសក្ខីកម្មជាក់ស្ដែងនៅពេលប្រកាសសាលក្រមសំណុំរឿង០០២ ដំណាក់កាលទី២ នេះ ក៏មានការចូលរួមពីអគ្គលេខាធិការរងអង្គការសហប្រជាជាតិផងដែរ។
សូមរម្លឹកថា សវនាការដេញដោល ពិនិត្យភ័ស្តុតាងលើសំណុំរឿង០០២ ដំណាក់កាលទី២ នេះបានចាប់ផ្តើម ដោយការធ្វើសេចក្តីសន្និដ្ឋានចោទប្រកាន់ កាលពីថ្ងៃទី១៧ ខែតុលា ឆ្នាំ២០១៤ និងបានបញ្ចប់នៅថ្ងៃទី១១ ខែមករា ឆ្នាំ២០១៧។ សរុបមក ការជំនុំជម្រះ រួមទាំងការស្តាប់សេចក្តីសន្និដ្ឋាន បិទបញ្ចប់កិច្ចពិភាក្សាដេញដោល លើសំណុំរឿង០០២/០២ មានរយៈពេលចំនួន២៨៣ ថ្ងៃ។ ក្នុងអំឡុងពេលសវនាការនេះ អង្គជំនុំជម្រះសាលាដំបូង បានស្តាប់សក្ខីកម្មពីបុគ្គលសរុបចំនួន១៨៥ នាក់ ក្នុងនោះ មានសាក្សីបញ្ជាក់អង្គហេតុចំនួន១១៤ នាក់ ដើមបណ្តឹងរដ្ឋប្បវេណីចំនួន៦៣ នាក់ និងអ្នកជំនាញចំនួន៨ នាក់។ ជនជាប់ចោទ ដែលត្រូវជំនុំជម្រះ ក្នុងសំណុំរឿង០០២ ដំណាក់កាលទី២ មាន នួន ជា ដែលជាអនុលេខាបក្សកុម្មុយនីស្តកម្ពុជា និង ខៀវ សំផន ជាប្រមុខរដ្ឋនៃរបបកម្ពុជាប្រជាធិបតេយ្យ។
បទចោទនៅក្នុងសំណុំរឿង០០២ ដំណាក់កាលទី០២ គឺឧក្រិដ្ឋកម្មប្រឆាំងនឹងមនុស្សជាតិ អំពើប្រល័យពូជសាសន៍ និងការបំពារបំពានយ៉ាងធ្ងន់ធ្ងរ ទៅលើអនុសញ្ញាទីក្រុងហ្សឺណែវ ពាក់ព័ន្ធទៅនឹងទីតាំងឧក្រិដ្ឋកម្ម និងការចោទប្រកាន់លើអង្គហេតុ ដូចជា ការដ្ឋានការងារ និងសហករណ៍ នៅត្រាំកក់ ខេត្តតាកែវ និងការដ្ឋានព្រលានយន្តហោះ នៅខេត្តកំពង់ឆ្នាំង ជាដើម។ អង្គជំនុំជម្រះ ក៏បានបើកសវនាការដេញដោលពិនិត្យភស្តុតាងលើការចោទប្រកាន់អំពីលក្ខណៈ នៃជម្លោះប្រដាប់អាវុធ រវាងកម្ពុជាប្រជាធិបតេយ្យ និងសាធារណរដ្ឋសង្គមនិយម វៀតណាម តួនាទីរបស់ជនជាប់ចោទ នៅក្នុងរដ្ឋាភិបាល រួមទាំងភ័ស្តុតាង ស្តីពីរចនាសម្ព័ន្ធ រដ្ឋបាល និងប្រព័ន្ធទំនាក់ទំនងនៅក្នុងរបបកម្ពុជាប្រជាធិបតេយ្យ។
លោក នួនជា និងលោក ខៀវ សំផន ត្រូវបានតុលាការខ្មែរក្រហម សម្រេចផ្តន្ទាទោស ដាក់ពន្ធនាគារមួយជីវិត នៅក្នុងសំណុំរឿង០០២ ដំណាក់កាលទី១ (០០២/០១ ) កាលពីឆ្នាំ២០១៤ ពាក់ព័ន្ធនឹងឧក្រិដ្ឋកម្មប្រឆាំងមនុស្សជាតិ ដែលមានការជម្លៀសប្រជាជន និងសម្លាប់មនុស្សក្នុងរបបខ្មែរក្រហម ចន្លោះពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ១៩៧៩៕
Source: Kampuchea Thmey Daily
0 Comments