រដ្ឋបាលរាជធានីភ្នំពេញ បួងសួងសុំម្ចាស់ទឹក ម្ចាស់ដី ដើម្បី សេចក្តីសុខក្នុងព្រះរាជពិធីបុណ្យ អុំទូក និងចែកអំណោយដល់ចំណុះទូកនៅរមណីយដ្ឋានវត្តភ្នំ

Cambodia News November 19, 2018

ភ្នំពេញ ៖ រដ្ឋបាលរាជធានីភ្នំពេញ បានរៀបចំពិធីបួងសួងសុំសេចក្តីសុខចម្រុងចម្រើន និងសុំពរ ជ័យតាមបែបសាសនាពីបារមីលោកយាយដូនពេញ ដែលជាស្ថាបនិករាជធានីភ្នំពេញ នៅរមណីយដ្ឋានវត្តភ្នំនាព្រឹកថ្ងៃទី១៩ ខែវិច្ឆិកា ឆ្នាំ២០១៨ សម្រាប់ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុកដើម្បីឲ្យពិធីបុណ្យនេះប្រព្រឹត្តទៅប្រកបដោយក្តីសប្បាយរីករាយ និងជៀស ផុតពីគ្រោះចង្រៃទាំងពួងដែលប្រុងនឹងបៀតបៀន ហើយក្នុងឱកាសនោះក៏បានចែកអំណោយដល់ចំណុះទូកផងដែរ។

ពិធីនេះប្រព្រឹត្តទៅដោយមានការចូលរួមជាអធិបតីភាពលោកម៉ប់ សារិនប្រធានក្រុមប្រឹក្សារាជធានីភ្នំពេញ លោកហួត ហៃ អភិបាលរងរាជធានីភ្នំពេញ តំណាងអោយលោកឃួង ស្រេង អភិបាលរាជធានីភ្នំពេញនិងមានការចូលរួមពីមន្ត្រីរាជការក្រោមឱវាទ និងកីឡាករចំណុះទូកជាច្រើនរយនាក់ថែមទៀត។

លោកម៉ប់ សារិន បានមានប្រសាសន៍ថា បុណ្យអុំទូកមានតាំងពីសម័យ អង្គរ ពិសេសនៅសម័យលង្វែក ទ័ពជើងទឹកយើងខ្លាំង។ ឆ្នាំនេះនឹងធ្វើឡើងធំ ដោយសារប្រទេសយើងមានសន្តិភាពក្រោមការដឹកនាំរបស់សម្តេចអគ្គមហាសេនាបតីតេជោហ៊ុន សែន។ សម្រាប់អាជ្ញាធររាជធានីភ្នំពេញក្នុង ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុកឆ្នាំនេះ បានយកចិត្តទុកដាក់ណាស់ រួមទាំងកិច្ចការពារសន្តិសុខសណ្ដាប់ធ្នាប់ និងការរៀបចំតុបតែងភ្នំពេញ ឃើញថា ល្អណាស់ពិសេសនៅពេលយប់មើលទៅទាក់ទាញភ្នែកតែម្តង។

លោកម៉ប់ សារិនក្នុងឱកាសនោះក៏បានសូមអោយកីឡាករទាំងអស់ ចេះជួយគ្នា សាមគ្គីភាពគ្នា រក្សាអនាម័យហូបស្អាត ផឹកស្អាត ដើម្បីសុខភាពយើងល្អ ឈានទៅដណ្ដើមជ័យជំនះ និងបញ្ចប់ព្រះរាជពិធីទៅទទួលបាននូវរីករាយនិងជោគជ័យ។

សូមបញ្ជាក់ថា រាជធានីភ្នំពេញមានទូកចំនួន៤៦ទូក ក្នុងនោះប្រភេទទូកអុំបុរស មានចំនួន៣២ទូក,ទូកចែវបុរសមាន៤ទូក,ប្រភេទទូកខ្នាតអន្តរជាតិបុរសមាន១០ទូក សម្រាប់ចូលរួមប្រកួតក្នុងព្រះរាជពិធីបុណ្យអុំទូកឆ្នាំនេះ ដោយមានកីឡាករ កីឡាការនី សរុបចំនួន៣២៣៤នាក់។

ព្រះរាជពិធីបុណ្យអុំទូកថ្នាក់ជាតិឆ្នាំនេះ សម្រាប់ទូទាំងប្រទេសទូកង ដែលត្រូវចូលរួមប្រកួតប្រជែងមានចំនួន២៩៨ទូក ខណៈដែលឆ្នាំ២០១៧មានទូក ងត្រឹមតែ២៧០ទូក និង មានទីឡាករជិត២ម៉ឺននាក់។ សម្រាប់ប្រទីបឆ្នាំនេះមានចំនួន១៥ លើសពីឆ្នាំទៅផងដែរ៕