បន្ទាយមានជ័យ ៖ កម្លាំងនគរបាល នៃស្នងការនគរបាលខេត្តបន្ទាយមានជ័យ ស្រាវជ្រាវឃាត់ខ្លួនបានហើយ ឃាតកដែលរឹតកសម្លាប់ស្ត្រីម្នាក់ នៅស្រុកព្រះនេត្រព្រះ កាលពីចុងសប្ដាហ៍កន្លងទៅនេះ។
លោក ខែម សុភ័ណ នាយការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តបន្ទាយមានជ័យបានឲ្យដឹងថា ក្រោមការដឹកនាំបញ្ជាផ្ទាល់របស់លោកឧត្ដមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ដោយមានការសម្របសម្រួលនីតិវិធីរបស់ លោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ បានចុះធ្វើការស្រាវជ្រាវ លើករណីឃាតកម្មសម្លាប់ស្ត្រី ឈ្មោះ ឃូន ឃីន អាយុ៤៩ឆ្នាំ កាលពីថ្ងៃទី១៦ ខែវិច្ឆិកា ឆ្នាំ២០១៨ កម្លាំងនគរបាលខេត្តបន្ទាយមានជ័យ សហការជាមួយកម្លាំងនគរបាលស្រុកព្រះនេត្រព្រះ បានធ្វើការស្រាវជ្រាវរហូតដល់ថ្ងៃទី១៨ ខែវិច្ឆិកា ឆ្នាំ២០១៨ បានឃាត់ខ្លួនជនសង្ស័យ ឈ្មោះ ប៊ុន សុខ ភេទប្រុស អាយុ៤២ឆ្នាំ ជនជាតិខ្មែរ មុខរបរកសិករ រស់នៅភូមិឈ្នួរ សង្កាត់ឈ្នួរមានជ័យ ព្រះនេត្រព្រះ ខេត្តបន្ទាយមានជ័យ។
លោកបន្តថា នៅមុខសមត្ថកិច្ច ជនសង្ស័យសារភាពថា ខ្លួនពិតជាបានសម្លាប់ជនរងគ្រោះប្រាកដមែន ព្រោះខឹងជនរងគ្រោះចាប់ត្រីក្នុងស្រែរបស់ខ្លួន ធ្វើឲ្យខូចខាតស្រូវក្នុងស្រែ។ ជនសង្ស័យក្រោយឃាត់ខ្លួន ត្រូវបានកម្លាំងជំនាញកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់៕
Source: Kampuchea Thmey Daily
0 Comments