ក្រសួងវប្បធម៌រកឃើញម្ចាស់ជ័យលាភី៣រូបពីការប្រកួតមហោស្រពភាពយន្ដខ្នាតខ្លីកម្ពុជាលើកទី២

Cambodia News November 17, 2018

ភ្នំពេញ ៖ ក្រសួងវប្បធម៌ និងវិចិត្រសិល្បៈរកឃើញម្ចាស់ជ័យលាភី៣រូបពីលេខ១ដល់លេខ៣ពីការប្រកួតមហោស្រពភាពយន្ដខ្នាតខ្លីកម្ពុជាលើកទី២ហើយ បន្ទាប់ពីបានធ្វើការប្រកួតប្រជែងយ៉ាងស្វាតស្វាញរួចមក។

រឿងដែលទទួលបានជ័យលាភីទាំង៣នេះ សុទ្ធសឹងតែជារឿងដែលផ្ដោតទៅលើគំនិតអប់រំ, វប្បធម៌, សិល្បៈរួមជាមួយការផ្ដល់ពិន្ទុយ៉ាងសុក្រិតពីគណៈកម្មការ។

ការប្រកួតប្រជែងមហោស្រពភាពយន្ដខ្នាតខ្លីកម្ពុជាលើកទី២នេះ ត្រូវបានជម្រុះនិងប្រកាសលទ្ធផលផ្ដាច់ព្រ័ត្រកាលពីយប់ថ្ងៃទី១៦ ខែវិច្ឆិកា ឆ្នាំ២០១៨ ដោយមានការចូលរួមពីលោក សោម សុគន្ធ រដ្ឋលេខាធិការក្រសួងវប្បធម៌ និងវិចិត្រសិល្បៈ សិល្បៈករ-សិល្បៈការិនីជាច្រើនរូបផងដែរ។

ភាពយន្តខ្នាតខ្លី ដែលទទួលបានជ័យលាភីលេខ១គឺបានទៅលើរឿង «ម្ចាស់របាំងមុខ» ជាស្នាដៃនិពន្ធរបស់លោក ឡុង ឡយ ទទួលបានពានរង្វាន់មាស១ និងទឹកប្រាក់ចំនួន៣ពាន់ដុល្លារ។

ជ័យលាភីលេខ២បានទៅលើរឿង «នារីសក់ខ្លី» ជាស្នាដៃផលិតរបស់លោក ស្វាយ លីម៉េង ទទួលបានពានរង្វាន់ប្រាក់១ និងទឹកប្រាក់២ពាន់ដុល្លារ និងជ័យលាភីលេខ៣បានទៅលើរឿង «ផ្ដើមស្នេហ៍លើឡានក្រុង» ជាស្នាដៃនិពន្ធដោយយុវជន ជ័យ វិសាល ទទួលបានពានរង្វាន់សំរិត១ និងទឹកប្រាក់១ពាន់ដុល្លារ។

លោក ប៉ុក បូរក្ស ប្រធាននាយកដ្ឋាន សិល្បៈភាពយន្ត និងផ្សព្វផ្សាយវប្បធម៌នៃក្រសួងវប្បធម៌ និងវិចិត្រសិល្បៈបញ្ជាក់ថាការប្រកួត ភាពយន្ដខ្នាតខ្លីនេះមានមានអ្នកចូលរួមដាក់ពាក្យសុំចូលរួម ប្រកួតចំនួន៤១ស្នាដៃ។ ក្នុងចំណោម៤១ស្នាដៃនេះត្រូវបានជម្រុះយកតែ៦ស្នាដៃប៉ុណ្ណោះ ដើម្បីឈានទៅវគ្គផ្ដាច់ព្រ័ត្រហើយក្នុងចំណោម៦ស្នាដៃនេះ នឹងត្រូវជ្រើសយកតែ៣ស្នាដៃទេ។

លោក ប៉ុក បូរក្ស បានឲ្យដឹងទៀតថា ការជ្រើសរើសស្នាដៃខ្សែភាពយន្ដទាំង៣រឿងនេះត្រូវបានគណៈកម្មការចំនួន៧រូប សុទ្ធសឹងតែជាអ្នកមានបទពិសោធន៍ច្រើនឆ្នាំលើវិថីសិល្បៈ ធ្វើការដាក់ពិន្ទុប្រកបដោយសុក្រិតភាព និងយុត្តិធម៌ជាទីបំផុត។

គួរបញ្ជាក់ថា ការប្រកួតមហោស្រពភាពយន្ដខ្នាតខ្លីកម្ពុជាលើកទី២នេះ ធ្វើឡើងក្រោមពាក្យស្លោក «ភាពយន្ដខ្នាតខ្លីជាជំហានឆ្ពោះទៅរកភាពយន្ដខ្នាតវែង» ក្នុងគោលបំណងជំរុញលើកទឹកចិត្តយុវជន ក្នុងការអភិវឌ្ឍសមត្ថភាព និងការបង្កើតគំនិតច្នៃប្រឌិតដើម្បីរួមចំណែកអភិវឌ្ឍន៍វិស័យភាពយន្ដជាតិ ឲ្យតែល្អប្រសើរ និងល្បីល្បាញលើឆាកជាតិ និងអន្ដរជាតិ៕