ភ្នំពេញ ៖ បុរសវ័យ៣៧ឆ្នាំម្នាក់ ដើរឆ្លងផ្លូវ ត្រូវម៉ូតូបុកបាក់ជើងម្ខាង ហើយត្រូវបានសមត្ថកិច្ចប៉ុស្តិ៍ទួលសង្កែទី២ ជួយហៅរថយន្តដឹកយកទៅសង្គ្រោះ កាលពីវេលាម៉ោងជាង១២រំលងអធ្រាត្រឈានចូលថ្ងៃទី១៧ ខែវិច្ឆិកា ឆ្នាំ២០១៨ ចំណុចតាមបណ្ដោយផ្លូវបុរីអង្គរ ភូមិពោងពាយ សង្កាត់ទួលសង្កែទី២ ខណ្ឌឫស្សីកែវ។ បុរសរងគ្រោះ ឈ្មោះស្នា អាយុ៣៧ឆ្នាំ មុខរបរ និងទីកន្លែងស្នាក់នៅមិនពិតប្រាកដ(ជាជនអនាថា)។
បុរសខាងលើបានឲ្យដឹងថា នៅមុនពេលកើតហេតុ ខណៈដែលគាត់ដើរឆ្លងផ្លូវ ក៏ត្រូវម៉ូតូមិនចាំម៉ាកបើកពីត្បូងទៅជើង បានបុកគាត់ បណ្តាលឲ្យបាក់ជើងស្ដាំ ហើយជិះគេចខ្លួនបាត់ ទុកឲ្យបុរសខាងលើមើលទៅសង្វេគណាស់ ព្រោះគ្មានឃើញសាច់ញាតិនោះទេ។
ក្រោយពេលកើតហេតុ សមត្ថកិច្ចប៉ុស្តិ៍ទួលសង្កែទី២ បានមកដល់កន្លែងកើតហេតុ និងទាក់ទងរថយន្តសង្គ្រោះដឹកទៅមន្ទីរពេទ្យកាល់ម៉ែត្រដើម្បីព្យាបាល៕
Source: Kampuchea Thmey Daily
0 Comments