ភ្នំពេញ ៖ ដើម្បីចូលរួមថែរក្សាសណ្ដាប់ធ្នាប់ សោភ័ណភាព អនាម័យ និងបរិស្ថាន ក្នុងឱកាសព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក រដ្ឋបាលរាជធានីភ្នំពេញ បានស្នើឲ្យបងប្អូន ជាម្ចាស់ស្តង់លក់ទំនិញ ម្ចាស់ទីតាំងប្រគំតន្ត្រី និងអ្នកលក់ដូរទាំងអស់ ត្រូវមានធុង ឬថង់សម្រាប់ទុកដាក់សំរាម ដែលកើតមានពីអាជីវកម្មរបស់ខ្លួនឲ្យបានត្រឹមត្រូវ។
តាមសេចក្ដីជូនដំណឹងរបស់រដ្ឋបាលរាជធានីភ្នំពេញ ចុះថ្ងៃទី១៦ ខែវិច្ឆិកា ឆ្នាំ២០១៨នេះ បានបញ្ជាក់ទៀតថា ដោយឡែកចំពោះបងប្អូន ដែលជាកីឡាករប្រណាំងទូក និងប្រជាពលរដ្ឋ ដែលមកលេងកម្សាន្តទាំងអស់ ក៏សូមមេត្តាជួយថែរក្សាអនាម័យ ដោយត្រូវវេចខ្ចប់ទុកដាក់សំណល់សំរាមរបស់ខ្លួន នៅក្នុងធុងសំរាមឲ្យបានត្រឹមត្រូវផងដែរ។
គួរបញ្ជាក់ថា ក្នុងព្រះរាជ ពិធីបុណ្យអុំទូក អកអំបុក បណ្ដែតប្រទីប និងសំពះព្រះខែ រយៈពេល៣ថ្ងៃ ខាងមុខនេះក្រុមហ៊ុនស៊ីនទ្រី បានត្រៀមរថយន្តដឹកសំរាមចំនួន៤៩គ្រឿង និងកម្មករចំនួន៤៨៩នាក់ និងសម្ភារៈមួយចំនួន សម្រាប់ដឹកជញ្ជូនសំរាម ក្នុងព្រះរាជពិធីបុណ្យ អុំទូក ថ្ងៃទី២១ ២២ និងថ្ងៃទី ២៣ ខែវិច្ឆិកា ឆ្នាំ២០១៨នេះ ដើម្បី ចូលរួមធ្វើការសំអាតឲ្យបានទាន់ពេល។
ដើម្បីរក្សាសន្តិសុខសណ្ដាប់ធ្នាប់ជូនប្រជាពលរដ្ឋ ក្នុងព្រះរាជពិធីបុណ្យអុំទូកឆ្នាំនេះដែរ សមត្ថកិច្ច
នឹងប្រើកម្លាំងសរុបចំនួន១២៧៥៤នាក់ ក្នុងនោះសម្រាប់កម្លាំងរបស់ គណៈបញ្ជាការឯកភាពរាជធានីភ្នំពេញ មានរហូតដល់៨៦២៥នាក់ ដោយឈជើងនៅតាមតំបន់សំខាន់ៗចំនួន៣គឺ តំបន់A,B,C និងចែកជាគោលដៅតូចៗផងដែរ។
ដោយឡែក សម្រាប់ទូកង ដែលត្រូវចូលរួមប្រកួតនៅឆ្នាំនេះ មានចំនួន២៩៨ទូក ខណៈដែលឆ្នាំ២០១៧ មានទូក ង ត្រឹមតែ២៧០ទូក និង មានកីឡាករជិត២ម៉ឺននាក់ ហើយតាមការប៉ាន់ប្រមាណនិងមានប្រជាពលរដ្ឋរាប់ម៉ឺននាក់មកដើរលេងកម្សាន្តនៅក្នុងព្រះរាជពិធីនេះផងដែរ៕
Source: Kampuchea Thmey Daily
0 Comments