ភ្នំពេញ ៖ ស្ត្រីម្នាក់បានរងរបួសធ្ងន់បាក់ជើងឆ្វេងម្ខាង ខណៈដែលជិះម៉ូតូឆ្លងផ្លូវផុតទៅហើយបែរជាត្រូវបានម៉ូតូមួយគ្រឿងទៀតបើកបុកពេញទំហឹងតែម៉ូតូបង្កមិនខូចខាត ទើបមានឱកាសជិះគេចខ្លួនបាត់ស្រមោលកាលពីវេលាម៉ោង៦និង៤០នាទីព្រឹក ថ្ងៃទី០៥ ខែវិច្ឆិកា ឆ្នាំ២០១៨ស្ថិតនៅតាមផ្លូវជាតិលេខ៤ភូមិព្រៃស្វាយ សង្កាត់ចោមចៅ៣ ខណ្ឌពោធិ៍សែនជ័យ។
ស្ត្រីរងគ្រោះ ឈ្មោះ ស៊ុំ ណាត អាយុ៥០ឆ្នាំ បម្រើការងារ នៅរោងចក្រសាប្រ៊ីណា ស្នាក់នៅ ភូមិកន្ទោកជើង សង្កាត់កន្ទោក ខណ្ឌពោធិ៍សែនជ័យ មានស្រុកកំណើត ភូមិក្រាំងទំនប់ ឃុំចាន់សែន ស្រុកឧដុង្គ ខេត្តកំពង់ស្ពឺ។
តាមសម្តីជនរងគ្រោះ បានឲ្យដឹងថា មុនកើតហេតុ គាត់ជិះម៉ូតូ ចេញពីផ្ទះឆ្លងផ្លូវជាតិលេខ៤ពីត្បូងទៅជើងក្នុងបំណងទៅធ្វើការងារ ហើយខណៈដែលកំពុងឆ្លងផ្លូវ ផុតទៅហើយបត់ទៅលិច ស្រាប់តែមានម៉ូតូហុងដាឌ្រីមសេ១២៥មួយគ្រឿង បើកក្នុងល្បឿនលឿនពីកើតទៅលិចមកបុកពេញទំហឹងបណ្តាលដួលរងរបួស រីឯម៉ូតូបង្កមិនដួលគ្មានរបួស បានបើករត់គេចទៅបាត់តែម្ដង។
ក្រោយពេលកើតហេតុជនរងគ្រោះ ត្រូវបានរថយន្តសង្គ្រោះ របស់អង្គភាព ៧១១ដឹកបញ្ជូនទៅមន្ទីរពេទ្យព្រះកុសុមៈដើម្បីជួយសង្គ្រោះ ចំណែកម៉ូតូត្រូវបានក្រុមគ្រួសារយកទៅទុកនៅផ្ទះជួសជុលដោយខ្លួនឯង ខណៈដែលភាគីខាងទៀត គេចទៅចោលបាត់ទៅហើយនោះ៕
Source: Kampuchea Thmey Daily
0 Comments