ភ្នំពេញ ៖ លោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅបានជំរុញដល់អាជ្ញាធរតាមបណ្តាសង្កាត់ទាំង៨ឲ្យចុះធ្វើសៀវភៅស្នាក់នៅដែលត្រូវផ្លាស់ប្តូរពីខណ្ឌមានជ័យមកខណ្ឌច្បារអំពៅវិញ។
លោកចេង មុនីរ៉ា បានមានប្រសាសន៍សព្វថ្ងៃនេះប្រជាពលរដ្ឋដែលរស់នៅក្នុងខណ្ឌច្បារអំពៅភាគច្រើនពុំទាន់ធ្វើការផ្លាស់ប្តូរសៀវភៅស្នាក់នៅពីខណ្ឌមានជ័យមកខណ្ឌច្បារអំពៅនៅឡើយទេ។ ការយឺតយ៉ាវក្នុងការធ្វើការផ្លាស់ប្តូរសៀវភៅស្នាក់នៅ គឺប្រជាពលរដ្ឋយើងមួយចំនួនលោកខ្លាចអាជ្ញាធរនិងនគរបាលមណ្ឌលទាមទារថ្លៃសេវាច្រើនហើយដោយសារពួកគាត់ពុំមានលទ្ធភាពក៏ខកខានមកធ្វើសៀវភៅ ដូច្នេះទេលោកអភិបាលខណ្ឌបានជំរុញឲ្យលោកចៅសង្កាត់ដឹកនាំមន្ត្រីនគរបាលប៉ុស្តិ៍សហការជាមួយមេភូមិចុះទៅធ្វើជូនប្រជាពលរដ្ឋតាមខ្នងផ្ទះហើយមិនត្រូវទាមទារលុយពីគាត់ឡើយ។
លោកអភិបាលខណ្ឌច្បារអំពៅបានបញ្ជាក់ទៀតថា ចំពោះសៀវភៅស្នាក់នៅគឺលោកចេញថវិកាផ្ទាល់ខ្លួនដើម្បីទិញយកមកឲ្យនគរបាលតាមមណ្ឌលធ្វើជូនប្រជាពលរដ្ឋដល់ផ្ទះតែម្តង។
ក្នុងនោះលោកអភិបាលខណ្ឌបានឧបត្ថម្ភថវិកាដល់នគរបាលមណ្ឌលដែលចុះទៅធ្វើតាមខ្នងផ្ទះប្រជាពលរដ្ឋទៀតផង។ លោកអភិបាលខណ្ឌបានបញ្ជាក់ទៀតថា ចំពោះប្រជាពលរដ្ឋដែលរស់នៅក្នុងសង្កាត់ចំនួន៤ ដែលកាត់ចេញពីការគ្រប់គ្រងស្រុកកៀនស្វាយ ខេត្តកណ្តាល មករាជធានីភ្នំពេញដែលមួយចំនួនមិនទាន់ប្តូរសៀវភៅពីស្រុកកៀនស្វាយមកខណ្ឌមានជ័យតែឥឡូវត្រូវប្តូរមកខណ្ឌច្បារអំពៅវិញផង។ ដូច្នេះហើយទើបលោកអភិបាលខណ្ឌច្បារអំពៅជំរុញដល់អាជ្ញាធរតាមសង្កាត់ក្នុងមូលដ្ឋានខណ្ឌច្បារអំពៅត្រូវចុះទៅធ្វើការផ្លាស់ប្តូរសៀវភៅជូនប្រជាពលរដ្ឋឲ្យបានរួចរាល់ទាំងអស់ ដើម្បីទុកជូនប្រជាពលរដ្ឋលោកបានប្រើប្រាស់តាមផ្លូវច្បាប់៕
Source: Kampuchea Thmey Daily
0 Comments