ភ្នំពេញ ៖ នៅក្នុងសន្និសីទថ្នាក់តំបន់ស្តីពី "ការប្រយុទ្ធប្រឆាំងឱសថក្លែងក្លាយ និង អន់គុណភាព "នៅសណ្ឋាគារសូហ្វីតែល ភូគៅត្រា ភ្នំពេញ នាព្រឹកថ្ងៃទី ៥ ខែ វិច្ឆិកានេះ ប្រមុខរាជរដ្ឋាភិបាលកម្ពុជាបានមានប្រសាសន៍ថា ជារួមកម្ពុជាយល់ច្បាស់ថា ការងារប្រយុទ្ធ ប្រឆាំង និង ទប់ស្កាត់ផលិតផលការចរាចរណ៍ការ ជួញដូរឱសថក្លែងក្លាយនេះមិនអាចប្រទេសណាមួយធ្វើតែម្នាក់ឯងហើយទទួលបានជោគជ័យទាំងស្រុងនោះទេ។ គឺត្រូវមានកិច្ចសហប្រតិបត្តិការឲ្យបានជិតស្និទ្ធ ជាលក្ខណអន្តរជាតិ ទាំងការផ្លាស់ប្ដូរព័ត៌មានឲ្យគ្នាទៅវិញទៅមក ការអនុវត្តច្បាប់តឹងរ៉ឹង និងការទទួលខុសត្រូវ រវាងប្រទេសដែលជាប្រភពផលិត និងការឆ្លងកាត់នៅប្រទេសដែលមានការប្រើប្រាស់ឱសថក្លែងក្លាយ និង អន់គុណភាព។
ដើម្បីទប់ស្កាត់និងលុបបំបាត់សកម្មភាពអវិជ្ជមានទាំងអស់នេះឲ្យមានប្រសិទ្ធភាពខ្ពស់សម្តេចតេជោនាយករដ្ឋមន្ត្រីបានផ្តល់អនុសាសន៍៦ចំណុចដល់អង្គសន្និសីទដើម្បីធ្វើជាទុនសម្រាប់ធ្វើការពិចារណា។
ទី១.រៀបចំចាត់វិធានការកែទម្រង់ច្បាប់និងបទដ្ឋានគតិយុត្តិនានាតាមការចាំបាច់របស់ប្រទេសរៀងខ្លួនដើម្បីធានាថា ក្របខ័ណ្ឌច្បាប់នៅក្នុងយុត្ថាធិការរបស់ខ្លួនមានលក្ខណៈស្របជាមួយនឹងយន្តការអន្តរជាតិ ។
ទី២.អនុវត្តន៍វិធានការប្រយុទ្ធ ប្រឆាំងនឹងបទល្មើសឱសថក្លែងក្លាយនិងអន់គុណភាពជាពិសេសត្រូវផ្ដន្ទាទោសយ៉ាងតឹងរ៉ឹងចំពោះជនល្មើសនិងជនទាំងឡាយណា ដែលមានការពាក់ព័ន្ធ។
ទី៣.ប្រទេសនីមួយៗគួររៀបចំក្រុមជំនាញទាក់ទងការងារប្រយុទ្ធ ប្រឆាំងនឹងបទល្មើសឱសថក្លែងក្លាយនិងអន់គុណភាព ក្នុងគោលដៅសម្របសម្រួល បញ្ជូនព័ត៌មាននិងផ្សព្វផ្សាយអំពីហានិភ័យនិងគ្រោះថ្នាក់ផ្សេងៗដល់សាធារណជននិងកិច្ចសហប្រតិបត្តិការខ្ពស់ក្នុងតំបន់ដើម្បីប្រយុទ្ធប្រឆាំងនិងទប់ស្កាត់ការផលិត ការចរាចរណ៍ឱសថក្លែងក្លាយនិងអន់គុណភាពឲ្យមានប្រសិទ្ធភាពខ្ពស់និងបានទាន់ពេលវេលា។
ទី៤.អាជ្ញាធរគ្រប់លំដាប់ថ្នាក់នៅតាមព្រំដែននៃប្រទេសនីមួយៗត្រូវផ្ដល់កិច្ចសហប្រតិបត្តិការជិតស្និទ្ធជាមួយគ្នាក្នុងការស្វែងរកបទល្មើសពាក់ព័ន្ធនឹងឱសថក្លែងក្លាយនិងអន់គុណភាពហើយត្រូវបង្កើតកម្មវិធីផ្លាស់ប្ដូរព័ត៌មានដើម្បីស៊ើបអង្កេតរកខ្សែចង្វាក់ផលិតចែកចាយនិង អត្តសញ្ញាណឧក្រិដ្ឋជនទាំងនោះ។
ទី៥.បង្កើនកិច្ចសហប្រតិបត្តិការរវាងស្ថាប័នរដ្ឋនិងវិស័យឯកជនពិសេសម្ចាស់ក្រុមហ៊ុនដើមដែលផលិតឱសថដើម្បីស្រាវជ្រាវរកឱសថក្លែងក្លាយនិងអន់គុណភាពដែលកំពុងចរាចរណ៍លើទីផ្សារហើយត្រូវរាយការណ៍ទៅអាជ្ញាធរមានសមត្ថកិច្ចដើម្បីចាត់វិធានការតាមផ្លូវច្បាប់។
ទី៦.ត្រូវពង្រីកវិសាលភាពនៃសេចក្តីថ្លែងការណ៍ទីក្រុងភ្នំពេញឲ្យបានទូលំទូលាយ និង អំពាវនាវឲ្យដៃគូនានាគាំទ្រនូវសេចក្តីថ្លែងការណ៍ពីក្រុងភ្នំពេញនេះ។
សម្តេចតេជោបានបានបន្តថា គោលគំនិតទាំងអស់នេះគឺជាការផ្ដួចផ្ដើមនូវទស្សនទានដែលសម្តេចជឿជាក់ថា នឹងរួមវិភាគទានមួយចំនួនសម្រាប់អង្គសន្និសីទយកទៅត្រិះរិះពិចារណាបន្ថែមនិងជាទុនសម្រាប់ប្រើប្រាស់ក្នុងការរៀបចំគោលនយោបាយសុខាភិបាលនិងផែនការសកម្មភាពដែលជាវិធានការជាក់ស្ដែងក្នុងការប្រយុទ្ធ ប្រឆាំងឱសថក្លែងក្លាយនិងអន់គុណភាព។
សម្តេចតេជោបន្តថា វិសាលភាពនៃគ្រោះថ្នាក់និងផលប៉ះពាល់ជាវិជ្ជមានដែលកើតចេញពីការប្រើប្រាស់ឱសថក្លែងក្លាយបានជំរុញឲ្យកម្ពុជាកាន់តែយកចិត្តទុកដាក់ខ្ពស់នឹងរៀបចំឡើងនូវយន្តការនិងវិធានការនានាសំដៅថែរក្សាសុខុមាលភាពប្រជាជននិងកាត់បន្ថយគ្រោះថ្នាក់ដែលបណ្ដាលមកពីកាចរាចរឱសថក្លែងក្លាយនិងអន់គុណភាព។
ជាក់ស្តែងនៅក្នុងនីតិកាលទី ៦ នៃរដ្ឋសភារាជរដ្ឋាភិបាលបានបន្តអនុវត្តកិច្ចការសំខាន់ៗមួយចំនួនរួមមាន ១.ជំរុញការអនុវត្តនិងធ្វើបច្ចុប្បន្នកម្មផែនការសុខាភិបាល២០១៦-២០២០ ដើម្បីលើកកម្ពស់គុណភាព ប្រសិទ្ធភាព និងសមធម៌នៃសេវាសុខភាព។ ២.ជំរុញវិសាលភាពគ្របដណ្តប់សុខភាពសកលនៅកម្ពុជា។ ៣.លើកកម្ពស់គុណភាពសុវត្ថិភាពនិងប្រសិទ្ធភាពសេវាសុខភាពពិសេសសេវាសង្គ្រោះបន្ទាន់ដែលបង្កើនការវិនិយោគលើហេដ្ឋារចនាសម្ព័ន្ធសុខាភិបាលនិងបច្ចេកវិទ្យាវិទ្យាសាស្ត្រ និង ៤.ការអនុវត្តនច្បាប់និងបទប្បញ្ញត្តិពាក់ព័ន្ធនឹងការគ្រប់គ្រងត្រួតពិនិត្យគុណភាពផលិតផលឱសថ ការប្រើប្រាស់ឱសថដោយគ្មានវេជ្ជបញ្ជានិងការប្រើប្រាស់គីមីក្នុងចំណីអាហារ គ្រឿងស្រវឹងនិងថ្នាំជក់ជាដើម៕
Source: Kampuchea Thmey Daily
0 Comments