ភ្នំពេញ៖សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីបានសំដែងការព្រួយបារម្ភចំពោះ ឱសថក្លែងក្លាយនិងអន់គុណភាព ដែលកំពុងរីករាលដាលនិងកំពុងធ្វើអាជីវកម្មនៅតាមអនឡាញ ដែលធ្វើឲ្យសមត្តកិច្ចមានការពិបាកក្នុងការទប់ស្កាត់។ ដោយសម្ដេចបានលើកឡើងថា ឱសថក្លែងក្លាយទាំងនោះ គឺមានភាពស្រដៀងគ្នាទៅនិងឱសថពិតប្រាកដ ប៉ុន្តែធាតុពិតនោះវាឱសថក្លែងក្លាយ និង មួយចំនួនហួសការបរិច្ឆេទប្រើប្រាស់។
ប្រមុខរាជរដ្ឋាភិបាលបានថ្លែងបែបនេះនៅក្នុងសន្និសីទថ្នាក់តំបន់ស្តិពី"ការប្រយុទ្ធប្រឆាំងឱសថក្លែងក្លាយនិងអន់គុណភាព"ដែលបានប្រារព្ធធ្វើនាព្រឹកថ្ងៃ ទី ៥ ខែ វិច្ឆិកា នៅសណ្ឋាគារសូហ្វីតែល ភូគីត្រា ភ្នំពេញ។
សម្តេចតេជោនាយករដ្ឋមន្ត្រីបានមានប្រសាសន៍ថា “បច្ចុប្បន្នឱសថក្លែងក្លាយនិងអន់គុណភាពបានបង្កគ្រោះថ្នាក់ដល់សុខភាពនិងសុវត្ថិភាពសង្គម និងធ្វើឲ្យរាំងស្ទះដល់កំណើនសេដ្ឋកិច្ចជាតិផងដែរ ។ បច្ចុប្បន្នបញ្ហាឱសថក្លែងក្លាយនិងអន់គុណភាពកំពុងរីករាលដាលគួរឲ្យព្រួយបារម្ភ ក្នុងនោះផលិតផលឱសថមួយចំនួនកំពុងធ្វើអាជីវកម្មតាមប្រព័ន្ធអនឡាញដែលជាឱសថគ្មានប្រភពច្បាស់លាស់ហើយស្រដៀងទៅនឹងឱសថពិតប្រាកដធ្វើឲ្យអាជ្ញាធរពិបាកក្នុងការធ្វើការកំណត់”។
សម្តេចតេជោបានបន្តថា ការរីករាលដាលនៃឱសថក្លែងក្លាយនិងអន់គុណភាពនេះ អាចបណ្ដាលមកពីកត្តាជាច្រើនរួមមានតម្លៃឱសថពិតប្រាកដ និងត្រឹមត្រូវមានតម្លៃខ្ពស់ យន្តការនៃការគ្រប់គ្រងឱសថនិងចរាចរនៅលើទីផ្សារមិនមានប្រសិទ្ធភាព ការបណ្ដុះបណ្ដាលមន្ត្រីសុខាភិបាលស្ដីពីជំនាញការគ្រប់គ្រងឱសថ និងការផ្សព្វផ្សាយដល់ប្រជាជនឲ្យបានយល់ដឹងអំពីឱសថក្លែងក្លាយ និង ការត្រួតពិនិត្យឱសថ ដោយសមត្ថកិច្ចនៅមានកម្រិត។
សម្តេចតេជោបន្តថា កត្តាទាំងអស់នេះបានផ្ដល់ឱកាសឲ្យពួកឧក្រិដ្ឋជនអាចទាញយកប្រយោជន៍ពីសង្គមជាតិ ហើយបានគំរាមយ៉ាងធ្ងន់ធ្ងរដល់សុខភាព និងអាយុជីវិតរបស់ប្រជាជន។វិសាលភាពនៃគ្រោះថ្នាក់និងផលប៉ះពាល់ជាវិជ្ជមានទាំងអស់នេះបានជំរុញឲ្យកម្ពុជាកាន់តែយកចិត្តទុកដាក់ខ្ពស់នឹងរៀបចំឡើងនូវយន្តការ និងវិធានការនានាសំដៅថែរក្សាសុខុមាលភាពប្រជាជន និងកាត់បន្ថយគ្រោះថ្នាក់ដែលបណ្ដាលមកពីការចរាចរណ៍ឱសថក្លែងក្លាយនិងអន់គុណភាព។ ជាក់ស្តែងនៅក្នុងនីតិកាលទី៦ នៃរដ្ឋសភារាជរដ្ឋាភិបាលបានបន្តអនុវត្តកិច្ចការសំខាន់ៗមួយចំនួនរួមមាន ទី១-ជំរុញការអនុវត្តនិងធ្វើបច្ចុប្បន្នកម្មផែនការសុខាភិបាល ២០១៦-២០២០ ដើម្បីលើកកម្ពស់គុណភាព ប្រសិទ្ធភាព និង សមធម៌នៃសេវាសុខភាព។ ទី២-ជំរុញវិសាលភាពគ្របដណ្តប់សុខភាពសកលនៅកម្ពុជា ។ ទី៣-លើកកម្ពស់គុណភាពសុវត្ថិភាពនិងប្រសិទ្ធភាពសេវាសុខភាព ពិសេសសេវាសង្គ្រោះបន្ទាន់ ដែលបង្កើនការវិនិយោគលើហេដ្ឋារចនាសម្ព័ន្ធសុខាភិបាលនិងបច្ចេកវិទ្យាវិទ្យាសាស្ត្រ និង ទី៤-ការអនុវត្តច្បាប់និងបទប្បញ្ញត្តិពាក់ព័ន្ធនឹងការគ្រប់គ្រងត្រួតពិនិត្យគុណភាពផលិតផលឱសថ ការប្រើប្រាស់ឱសថដោយគ្មានវេជ្ជបញ្ជា និងការប្រើប្រាស់គីមីក្នុងចំណីអាហារ គ្រឿងស្រវឹង និងថ្នាំជក់ជាដើម។
សន្និសីទអន្តរជាតិថ្នាក់តំបន់ជាលើកដំបូងស្តីពី «ការប្រយុទ្ធប្រឆាំងឱសថក្លែងក្លាយ និងអន់គុណភាព»ត្រូវបានបង្កើតឡើងបន្ទាប់ពីមានការផ្តួចផ្តើមគំនិតរវាងសម្តេចតេជោ ហ៊ុន សែន និង លោក ហ្សង់ ឡឺវីត ប្រធានក្រុមប្រឹក្សាភិបាលនៃវិទ្យាស្ថានស្រាវជ្រាវប្រឆាំងឱសថក្លែងក្លាយរបស់ប្រទេសបារាំងកាលពីឆ្នាំ២០១៦ កន្លងទៅនេះ។ សន្និសីទនេះ នឹងធ្វើឡើងរយៈពេលពីរថ្ងៃចាប់ពីថ្ងៃទី ៥-៦ ខែវិច្ឆិកា។ សន្និសីទនេះ ផ្តោតលើកិច្ចពិភាក្សាអំពីការទប់ស្កាត់ និង លុបបំបាត់នូវឱសថក្លែងក្លាយ និង អន់គុណភាព ដោយបង្កើតឲ្យមានយុទ្ធសាស្ត្រយ៉ាងត្រឹមត្រូវក្នុងការបង្កើតទំនាក់ទំនងជាមួយបណ្តាប្រទេសក្នុងតំបន់ និង ពិភាក្សាអំពីការធ្វើវិសោធនកម្មច្បាប់ដើម្បីបន្ថែមទោសឲ្យបានធ្ងន់ចំពោះអ្នកផលិត អ្នកនាំចូលនិង អ្នកចរាចរណ៍ឱសថក្លែងក្លាយ ដើម្បីស្របតាមសន្ធិសញ្ញា PALEMO ដែលព្រះរាជាណាចក្រកម្ពុជា និង បណ្តាប្រទេសជិតខាងបានធ្វើសច្ចាប័នរួចហើយនិងបង្កើតវគ្គហ្វឹកហ្វឺនរួមគ្នាដល់មន្ត្រីអនុវត្តច្បាប់ ដើម្បីផ្លាស់ប្តូរបទពិសោធន៍គ្នាទៅវិញទៅមកឲ្យក្លាយទៅជាមន្ត្រីជំនាញអាចបំពេញការងារយ៉ាងមានប្រសិទ្ធភាពបំផុត។
សន្និសីទនេះធ្វើឡើងដើម្បីរិះរកនូវយន្តការផ្សេងៗដើម្បីរួមចំណែកក្នុងការប្រយុទ្ធប្រឆាំង និង ទប់ស្កាត់ចំពោះការចរាចរណ៍ឱសថក្លែងក្លាយនិង អន់គុណភាព ដែលជាបញ្ហាដ៏បារម្ភមួយសម្រាប់ប្រទេសកម្ពុជានិងប្រទេសក្នុងតំបន់ទន្លេមេគង្គដទៃទៀត។
សន្និសីទនេះមានអ្នកចូលរួមប្រមាណ ៤៥០ នាក់ ដោយមានការអញ្ជើញចូលរួមពីមន្ត្រីពាក់ព័ន្ធថ្នាក់ជាតិ និងមន្ត្រីបរទេសរួមមានប្រទេសបារាំងប្រទេស តំបន់ទន្លេមេគង្គ រួមមាន កម្ពុជា ឡាវ មីយ៉ាន់ ថៃ និងវៀតណាម រួមនឹងចិន ព្រមទាំងអង្គការអន្តរជាតិចំនួន២០ផ្សេងទៀត៕
Source: Kampuchea Thmey Daily
0 Comments