ភ្នំពេញ ៖ នេះជាការបញ្ជាក់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅឯកិច្ចប្រជុំគណៈរដ្ឋមន្ត្រី នៅព្រឹកថ្ងៃចន្ទ ទី១៩ ខែវិច្ឆិកា ឆ្នាំ២០១៨។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានឲ្យដឹងថា នៅក្នុងកិច្ចប្រជុំគណៈរដ្ឋមន្ត្រីនោះ សម្ដេចតេជោ ហ៊ុន សែន បានបានមានប្រសាសន៍ថា "តើកម្ពុជា មានការចាំបាច់រំលោភរដ្ឋធម្មនុញ្ញខ្លួន អនុញ្ញាតឲ្យមានមូលដ្ឋានយោធាបរទេសលើទឹកដីកម្ពុជាឬទេ? តើកម្ពុជា ត្រូវការកងទ័ពបរទេសដើម្បីច្បាំងជាមួយអ្នកណា? ហើយខ្ញុំ មិនត្រូវការឲ្យបរទេសមកច្បាំងគ្នានៅលើទឹកដីកម្ពុជា ដូចកាលពីអតីតកាលទេ ក៏ដូចជាមិនត្រូវការឲ្យកម្ពុជាជាទីលានសាកល្បងមនោគមន៍វិជ្ជា ឬអាវុធឡើយ ។ យើងចង់ចងមិត្តជាមួយគ្រប់ប្រទេសលើសកលលោក។ កងទ័ពកម្ពុជា ដាច់ខាតមិនចូលរួមក្នុងកិច្ចប្រតិបត្តិការយោធាជាមួយប្រទេសណាទាំងអស់ លើកលែងតែក្រោមឆត្ររបស់អង្គការសហប្រជាជាតិ"។
សូមបញ្ជាក់ថា កិច្ចប្រជុំគណៈរដ្ឋមន្ត្រី នាព្រឹកថ្ងៃចន្ទ ទី១៩ ខែវិច្ឆិកា ឆ្នាំ២០១៨ នេះ ក្រោមអធិបតីភាពសម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា ហើយមានរបៀបវារៈសំខាន់ៗចំនួន៤រួមមាន ៖ ១-សេចក្ដីព្រាងច្បាប់ ស្ដីពីបរធនបាលកិច្ច។ ២-សេចក្តីព្រាងក្របខ័ណ្ឌគោលដៅអភិវឌ្ឍន៍ប្រកបដោយចីរភាពកម្ពុជា ឆ្នាំ២០១៦-២០៣០។ ៣-សេចក្តីព្រាងគោលនយោបាយជាតិអេកូទេសចរណ៍ឆ្នាំ២០១៩-២០៣០។ ៤- បញ្ហាផ្សេងៗ៕
Source: Kampuchea Thmey Daily
0 Comments