ភ្នំពេញ ៖ ជនសង្ស័យម្នាក់ មានបំណងធ្វើសកម្មភាពលួចទ្រព្យសម្បត្តិប្រជាពលរដ្ឋ និង២នាក់ទៀតប្រើប្រាស់ថ្នាំញៀន ត្រូវសមត្ថកិច្ចឃាត់ខ្លួនបានជាបន្តបន្ទាប់ រួមទាំងវត្ថុតាងមួយចំនួនផងដែរ។
ហេតុការណ៍នេះបានកើតឡើងលើកទី១ កាលពីវេលាម៉ោង១១និង៣០នាទីថ្ងៃត្រង់ ថ្ងៃទី០៦ ខែវិច្ឆិកា ឆ្នាំ២០១៨ ចំណុចផ្ទះគ្មានលេខ ក្រុម៥ ភូមិខ.២ សង្កាត់ច្រាំងចំរេះទី២ ខណ្ឌឫស្សីកែវ ករណីប៉ុនប៉ងលួចទ្រព្យ។ ក្នុងហេតុការណ៍ខាងលើនោះដែរ ជនរងគ្រោះឈ្មោះ លី ស្រីពៅ ភេទស្រី អាយុ៤៨ឆ្នាំ ជនជាតិខ្មែមានទីលំនៅកន្លែងកើតហេតុ មុខរបរលក់ដូរ។
ចំណែកជនសង្ស័យឈ្មោះ យ៉ាម៉ូស្តាហ្វាកាម៉ាល់ ភេទប្រុស អាយុ២៤ឆ្នាំ ជនជាតិខ្មែរឥស្លាម មានទីលំនៅស្នាក់នៅផ្ទះលេខគ្មានក្រុមទី៣ ភូមិ ខ.,២ សង្កាត់ច្រាំងចំរេះទី២ ខណ្ឌឫស្សីកែវ មុខរបរមិនពិតប្រាកដ ប្រើប្រាស់គ្រឿងញៀនអស់រយៈពេល០៣ខែ។
សមត្ថកិច្ចបានឲ្យដឹងថា មុនពេលកើតហេតុនៅថ្ងៃខែឆ្នាំខាងលើ ជនរងគ្រោះជាម្ចាស់ផ្ទះកំពុងតែហូបបាយនៅខាងក្រោមផ្ទះ ស្រាប់តែលឺសំឡេងស័ង្កសីដែលជនសង្ស័យជាន់ ពេលនោះម្ចាស់ផ្ទះក៏មានការសង្ស័យរត់ទៅបើកភ្លើង ស្រាប់តែឃើញជនសង្ស័យកំពុងបើកទ្វារបន្ទប់ខាងលើផ្ទះ ក៏ស្រែកផ្អើលឆោឡោ ភ្លាមៗនោះកម្លាំងសមត្ថកិច្ចដែលល្បាតនៅជិតកន្លែងកើតហេតុក៏ចុះអន្តរាគមន៍ឈានដល់ឃាត់ខ្លួនជនសង្ស័យម្នាក់តែម្ដង។
ហេតុការណ៍ទី២ នៅវេលាម៉ោង១រំលងអធ្រាត្រ ឈានចូលថ្ងៃទី០៧ ខែវិច្ឆិកា ឆ្នាំ២០១៨ ត្រង់ចំណុចក្រុម៨ ផ្លូវរថភ្លើង ភូមិចុងខ្សាច់ សង្កាត់ទួលសង្កែ១ ខណ្ឌឫស្សីកែវ។
សមត្ថកិច្ចបានឲ្យដឹងបន្តថា ក្នុងកិច្ចប្រតិបត្តិការនេះ កម្លាំងបានឃាត់ខ្លួនជនសង្ស័យចំនួន២នាក់
ទី១-ឈ្មោះ ជា វ៉ាន់ នី ភេទប្រុស អាយុ១៨ឆ្នាំ ជនជាតិខ្មែរ មុខរបរកម្មករ ស្នាក់នៅផ្ទះជួល សង្កាត់បឹងកេងកង ខណ្ឌចំការមន។ ទី២-ឈ្មោះ យ៉ុន តាន់ ភេទប្រុស អាយុ២០ឆ្នាំ ជនជាតិខ្មែរ មុខរបរសន្តិសុខក្រុមហ៊ុន ស្នាក់នៅបុរីកីឡា សង្កាត់វាលវង់ ខណ្ឌ៧មករា អ្នកទាំង២សមត្ថកិច្ចឃាត់ខ្លួនករណីប្រើប្រាស់គ្រឿងញៀន។
សម្ភារៈដកហូតបានរួមមាន ក្រាមពណ៌សថ្លាចំនួន០១កញ្ចប់តូច ម៉ូតូ០១គ្រឿងម៉ាកSUZUKI LETS ពណ៌ស ពាក់ស្លាកលេខ ភ្នំពេញ 1CA.1729។
ក្រោយឃាត់ខ្លួន ជនសង្ស័យទាំង៣នាក់ខាងលើ និងវត្ថុតាង ត្រូវបានបញ្ជូនទៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងចាត់ការតាមនីតិវិធី៕
Source: Kampuchea Thmey Daily
0 Comments