រតនគិរី ៖ កម្លាំងអធិការដ្ឋាននគរបាលស្រុកបរកែវ បានចុះបង្ក្រាបករណីជួញដូរ និងប្រើប្រាស់នូវសារធាតុញៀនខុសច្បាប់ ដោយធ្វើការឃាត់ខ្លួនជនសង្ស័យចំនួន២នាក់ កាលពីល្ងាចថ្ងៃអង្គារ ១៣រោច ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៦ ខែវិច្ឆិកា ឆ្នាំ២០១៨។
នគរបាលស្រុកបរកែវបានឲ្យដឹងថា ជនសង្ស័យទាំង២នាក់ ទី១-ឈ្មោះ សេង ប៊ុនា អាយុ៣២ឆ្នាំ ជនជាតិឡាវ សញ្ជាតិខ្មែរ មុខរបរមិនពិតប្រាកដ មានស្រុកកំណើត ភូមិលំផាត់ ឃុំជ័យឧត្ដម ស្រុកលំផាត់ ខេត្តរតនគីរី មានទីលំនៅសព្វថ្ងៃភូមិស៊ើង ឃុំស៊ើង ស្រុកបរកែវ ខេត្តរតនគីរី។ និង២-ឈ្មោះ ប៉ុច ផល្លា ភេទប្រុស អាយុ៣៦ឆ្នាំ ជនជាតិខ្មែរ សញ្ជាតិខ្មែរ មុខរបរមិនពិតប្រាកដ មានស្រុកកំណើត ភូមិបុសខ្នោ ឃុំបុសខ្នោ ស្រុកចំការលើ ខេត្តកំពង់ចាម មានទីលំនៅសព្វថ្ងៃ ភូមិជ្រុង ឃុំ កក់ ស្រុកបរកែវ ខេត្តរតនគិរី។
ក្នុងនោះ សមត្ថកិច្ចបានដកហូតសម្ភារៈមួយចំនួនដូចខាងក្រោម ម្សៅថ្លាស ដែលសង្ស័យថាជាសារធាតុញៀនចំនួន២៤កញ្ចប់តូច និង ១កញ្ចប់ធំល្មម។ សម្ភារៈសម្រាប់សេព និងវេចខ្ចប់គ្រឿងញៀនមួយចំនួនធំ។
បច្ចុប្បន្នជនសង្ស័យ រួមទាំងវត្ថុតាង បានឃាត់ខ្លួន និងរក្សាទុកបណ្ដោះអាសន្ន នៅអធិការដ្ឋាននគរបាលស្រុកបរកែវ ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី៕
Source: Kampuchea Thmey Daily
0 Comments