រតនគិរី ៖ មានករណីគួរឲ្យភ្ញាក់ផ្អើលមួយ ខណៈយុវជនវ័យក្មេងម្នាក់ បានដើរទៅមើលអង្គុបដាក់សត្វក្នុងព្រៃជាមួយឪពុករបស់ខ្លួន ក៏ត្រូវបានសត្វខ្លាឃ្មុំខាំបណ្ដាលឲ្យរងរបួសធ្ងន់។
ហេតុការណ៍នេះ បានកើតឡើងកាលពីវេលាម៉ោង២រសៀល ថ្ងៃអង្គារ ១៣រោច ខែអស្សុជ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី០៦ ខែវិច្ឆិកា ឆ្នាំ២០១៨ ស្ថិតនៅចំណុចក្នុងព្រៃ ភូមិទំពួនរឺងតូច ឃុំតាវែងក្រោម ស្រុកតាវែង ខេត្តរតនគិរី។
នគរបាលស្រុកតាវែងបានឲ្យដឹងថា យុវជនដែលត្រូវខ្លាឃ្មុំខាំរងរបួសធ្ងន់នោះមានឈ្មោះ ណយ សឺ អ៊ី អាយុ១៦ឆ្នាំ ជនជាតិទំពួន រស់នៅភូមិទំពួនរឺងតូច ឃុំតាវែងក្រោម ស្រុកតាវែង ខេត្តរតនគិរី។
នគរបាលបានឲ្យដឹងទៀតថា មូលហេតុដែលយុវជនខាងលើត្រូវសត្វខ្លាឃ្មុំខាំនោះ ដោយសារតែយុវជនរូបនេះបានដើរទៅក្នុងព្រៃជ្រៅជាមួយឪពុករបស់ខ្លួនដើម្បីមើលអង្គុបដាក់សត្វ ក៏ប្រទះឃើញសត្វខ្លាឃ្មុំក្នុងព្រៃនោះ ហើយក៏ត្រូវបានសត្វខ្លាឃ្មុំខាំបណ្ដាលឲ្យរងរបួសធ្ងន់តែម្ដង។ រួចឪពុកជនរងគ្រោះក៏បាននាំកូនមកផ្ទះ និងរាយការណ៍ទៅសមត្ថកិច្ចស្រុកតាវែងឲ្យជួយអន្តរាគមន៍ផងដែរ។
បច្ចុប្បន្ន ជនរងគ្រោះដែលត្រូវខ្លាឃ្មុំខាំបណ្ដាលឲ្យរងរបួសធ្ងន់នោះត្រូវបានកម្លាំងប៉ុស្តិ៍រដ្ឋបាលឃុំតាវែងក្រោមដឹកយកមកសម្រាកព្យាបាលនៅមណ្ឌលសុខភាពស្រុកតាវែងផងដែរ៕
Source: Kampuchea Thmey Daily
0 Comments