សៀមរាប ៖ កម្លាំងនគរបាលខេត្តសៀមរាបបានសហការគ្នាធ្វើការ ដេញតាមឃាត់ខ្លួនក្រុមចោរឆក់កាបូបចំនួន៣នាក់ ខណៈពួកគេជិះម៉ូតូទៅឆក់កាបូបភ្ញៀវទេសចរណ៍ ដែលកំពុងជិះកង់ដើរកម្សាន្ត។ហេតុការណ៍ឃាត់ខ្លួននេះធ្វើឡើងនៅវេលាម៉ោង១៧និង១៥នាទីថ្ងៃទី០២ ខែវិច្ឆិកា ឆ្នាំ២០១៨ ត្រង់ចំណុចរង្វង់មូលវត្តដំណាក់ ភូមិវត្តដំណាក់ សង្កាត់សាលាកំរើក ក្រុងសៀមរាប។
លោកឧត្តមសេនីយ៍ត្រី ភឹង ចន្តារ៉េត ស្នងការរង ទទួលផែនកណ្តាលព្រហ្មទណ្ឌ នៃស្នងការដ្ឋាននគរបាលខេត្តសៀមរាប បានឲ្យដឹងថា ដោយទទួលបានបណ្តឹង ពីជនរងគ្រោះ ភ្លាមៗនោះកម្លាំងនគរបាលកម្លាំងការិយាល័យអន្តរាគមន៍ សហការជាមួយកម្លាំងការិយាល័យនគរបាលព្រហ្មទណ្ឌកម្រិតស្រាល បានធ្វើការតាមបង្ក្រាបចាប់បានជនសង្ស័យទាំងបីនាក់ បានជាក់ស្តែងតែម្តង។
លោកបន្តថា ជនសង្ស័យចំនួនបីនាក់មានឈ្មោះ ទី១.ឈ្មោះ មឿន ប៉ាលីណាឃីម ភេទប្រុស អាយុ១៨ឆ្នាំ ទីលំនៅបន្ទប់ជួល ភូមិតាវៀន សង្កាត់សាលាកំរើក ក្រុង/ខេត្តសៀមរាប។ទី២.ឈ្មោះ លន់ វលិស ភេទប្រុស អាយុ១៨ឆ្នាំ ទីលំនៅ ភូមិតាវៀន សង្កាត់សាលាកំរើក ក្រុង/ខេត្តសៀមរាប។
ទី៣.ឈ្មោះ សុខ ផានិត ភេទប្រុស អាយុ១៨ឆ្នាំ ទីលំនៅ ភូមិចុងកៅស៊ូ សង្កាត់ស្លក្រាម ក្រុង/ខេត្តសៀមរាប។ លោកបន្ថែមថា ដំណើររឿង នៅថ្ងៃទី០២ ខែវិច្ឆិកា ឆ្នាំ២០១៨ វេលាម៉ោង១៧និង១៥នាទី មានភ្ញៀវជនជាតិអាល្លឺម៉ង់ម្នាក់ភេទស្រី ជិះកង់មកដល់ចំណុចផ្លូវឧកញ៉ាអ៊ុឆាយ មុខរូបសំណាកគ្រុឌ កងរាជអាវុធហត្ថខេត្តសៀមរាប ភូមិមណ្ឌល២ សង្កាត់ស្វាយដង្គំ ក្រុង/ខេត្តសៀមរាប ក៏មានជនសង្ស័យចំនួន០២នាក់ជិះម៉ូតូមួយគ្រឿងម៉ាក Hinda Beat ពណ៌ខៀវលាយស ស៊េរីឆ្នាំ២០១៨ គ្មានស្លាកលេខ បានធ្វើសកម្មភាពលួចលូកឆក់កាបូបស្ពាយពណ៌ក្រហមលាយខ្មៅ ដែលភ្ញៀវទុកនៅកន្ត្រកកង់ ហើយជិះគេចខ្លួនបាត់។
លោកបន្តទៀតថា ជាក់ស្តែងនៅថ្ងៃខែឆ្នាំ ដដែល កម្លាំងការិយាល័យអន្តរាគមន៍នៃស្នងការដ្ឋាននគរបាលខេត្តសៀមរាប សហការជាមួយកម្លាំងការិយាល័យនគរបាលព្រហ្មទណ្ឌកម្រិតស្រាល បានធ្វើការតាមបង្ក្រាបចាប់បានជនសង្ស័យទាំងបីនាក់ នៅចំណុចរង្វង់មូលវត្តដំណាក់ ភូមិវត្តដំណាក់ សង្កាត់សាលាកំរើក ក្រុង/ខេត្តសៀមរាប។
លោកបញ្ជាក់ថា តាមចម្លើយសារភាពរបស់ជនសង្ស័យទាំងបីនាក់ បានឆ្លើយសារភាពថាពិតជាបានធ្វើសកម្មភាពប្រព្រឹត្តដូចអង្គហេតុខាងលើប្រាកដមែន។ ករណីនេះកម្លាំងនគរបាលជំនាញកំពុងរៀបចំសំណុំរឿងបញ្ជូនតាមនីតិវិធី៕
Source: Kampuchea Thmey Daily
0 Comments