កណ្ដាល ៖ ដើម្បីចូលរួមចំណែកអភិវឌ្ឍវិស័យពុទ្ធចក្រ គឺផ្នែកព្រះពុទ្ធសាសនា ដែលជាសាសនារបស់រដ្ឋ និងមើលឃើញពីតម្រូវការចាំបាច់ ក្នុងការសាងសង់សាលាពុទ្ធិកបឋមសិក្សាក្នុងវត្តកោះចូរ៉ាម ដែលកំពុងដំណើរការសាងសង់ផងនោះ លោកហ៊ុន ម៉ាណែត ក្នុងនាម សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែនបានប្រគេនសម្ភារៈសំណង់ និងសម្ភារៈការិយាល័យផ្សេងទៀត តបតាមការបិណ្ឌបាតរបស់ព្រះសង្ឃនិងពុទ្ធបរិស័ទចំណុះជើងវត្ត។
ជាមួយគ្នានោះ លោក ហ៊ុន ម៉ាណែត ក៏បានប្រកាសផ្ដល់ជូនម៉ាស៊ីនcopy ចំនួន០១គ្រឿង តាមការស្នើសុំរបស់សាលាឃុំកោះចូរ៉ាម កាលពីថ្ងៃទី១០ ខែវិច្ឆិការឆ្នាំ២០១៨ ក្នុងពិធីសម្ពោធសមិទ្ធផលនានា និងបញ្ចុះបឋមសិលា សាងសង់សាលាពុទ្ធិកបឋមសិក្សាក្នុងវត្តកោះចូរ៉ាមកន្លងទៅ។
ជំនួសមុខឲ្យរដ្ឋបាលឃុំ និងប្រជាពលរដ្ឋឃុំកោះចូរ៉ាម លោក ឈុំ ចាន់ បានថ្លែងអំណរគុណយ៉ាងជ្រាលជ្រៅចំពោះ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំង លោកហ៊ុន ម៉ាណែត ដែលបានយកចិត្តទុកដាក់កសាងសមិទ្ធផលជាច្រើននៅក្នុងឃុំកោះចូរ៉ាម និងស្រុកកខ្សាច់កណ្ដាលទាំងមូល និង គិតគូរពីសុខទុក្ខចំពោះការងាររបស់មន្ត្រីរាជការ។
លោកក៏បានសម្ដែងនូវអារម្មណ៍សប្បាយរីករាយ ដែលអំណោយដ៏ថ្លៃថ្លានេះ គឺជាប្រយោជន៍រួមក្នុងការប្រតិបត្តិសាសនា ធ្វើបុណ្យកសាងអំពើជាកុសល និងជាកេរមរតកសម្រាប់កូនចៅជំនាន់ក្រោយ។ ម្យ៉ាងវិញទៀត សម្ភារៈរដ្ឋបាលនេះ នឹងជួយសម្រួលក្នុងកិច្ចការងារទូទៅ ក៏ដូចជាសម្រួលក្នុងការផ្ដល់សេវាសាធារណៈជូនប្រជាពលរដ្ឋផងដែរ។
សូមបញ្ជាក់ថា ស៊ីម៉ងត៍៦០តោន ដែក៥តោន ឥដ្ឋ៩ម៉ឺនដុំ ម៉ាស៊ីនcopy ចំនួន០១គ្រឿង ដែលជាអំណោយដ៏ថ្លៃថ្លារបស់ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន តាមរយៈលោក ហ៊ុន ម៉ាណែត ត្រូវបានក្រុមការងារយកមកប្រគេនដល់វត្តកោះចូរ៉ាម និងសាលាឃុំកោះចូរ៉ាម ស្រុកខ្សាច់កណ្ដាល ខេត្តកណ្ដាលនៅព្រឹកថ្ងៃទី១៨ ខែវិច្ឆិកា ឆ្នាំ២០១៨ ដែលពិធីនេះបានធ្វើឡើងនៅក្នុងវត្តកោះចូរ៉ាម ដែលមានការចូលរួមពីសំណាក់ លោក នួន ចន្ទរិទ្ធ ប្រធានក្រុមការងារចុះជួយឃុំកោះចូរ៉ាម និងសហការី ក្រុមការងារលោក ហ៊ុន ម៉ាណែត ព្រះគ្រូចៅអធិការ និងអាជ្ញាធរឃុំកោះចូរ៉ាមផងដែរ៕
Source: Kampuchea Thmey Daily
0 Comments