តាកែវ ៖ កម្លាំងនគរបាលប្រឆាំងបទល្មើសសេដ្ឋកិច្ច នៃស្នងការនគរបាលខេត្តតាកែវ បានចុះបង្ក្រាបទីតាំងដែលស្តុកសាប៊ូនាំចូល និងចែកចាយខុសច្បាប់ពីប្រទេសវៀតណាម តាមពាក្យបណ្ដឹងរបស់ម្ចាស់អាជ្ញាប័ណ្ណសុំសិទ្ធិនាំចូលផ្ដាច់មុខនៅកម្ពុជា បានជាង១៥០កេះធំ លើពីរទីតាំង នៅក្នុងក្រុងដូនកែវ និងស្រុកត្រាំកក់ កាលពីរសៀលថ្ងៃទី១៦ ខែវិច្ឆិកា ឆ្នាំ២០១៨ កន្លងទៅនេះ។
ហេតុការណ៍ចុះបង្ក្រាបនៅតាមទីតាំងស្តុកទំនិញនេះដែរ គឺមានការចូលរួម សម្របសម្រួលនីតិវិធីពីលោក ឃុន ភឿន ព្រះរាជអាជ្ញារងអមសាលាដំបូងខេត្តកែវ និងលោកឧត្ដមសេនីយ៍ត្រី វង្ស ហុកលី ស្នងការរងទទួលផែនប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តតាកែវ រួមជាមួយនឹងកងកម្លាំង និងបុគ្គលិករបស់ក្រុមហ៊ុនប៊ី ឌី ស៊ី លីមីតធីត ដែលជាដើមបណ្ដឹងផងដែរ។
លោក វង្ស ហុកលី ស្នងការរងទទួលផែនប្រឆាំងបទល្មើសសេដ្ឋកិច្ច បានប្រាប់ឲ្យដឹងថា ការឈានដល់ការចូលទៅឆែកឆេរនៅទីតាំងស្តុកទំនិញដែលនាំចូល និងចែកចាយខុសច្បាប់ខាងលើ ជាប្រភេទសាប៊ូយីហោម៉ាក LIXនេះ គឺធ្វើទៅតាមពាក្យបណ្ដឹងរបស់ក្រុមហ៊ុន ប៊ី ឌី ស៊ី លីមីតធីត ដែលបានដាក់ពាក្យបណ្ដឹងមកសមត្ថកិច្ច ប្ដឹងលើជនមិនស្គាល់ឈ្មោះ ដែលនាំចូលស្តុក និងចែកចាយនូវផលិតផលសាប៊ូម្សៅ និងទឹកលានចានម៉ាក LIX មិនស្របច្បាប់ហើយមិនមានការអនុញ្ញាតពីក្រុមហ៊ុនត្រឹមត្រូវ។
បន្ទាប់ពីទទួលបានពាក្យបណ្ដឹងនេះ មន្ត្រីជំនាញរបស់លោកបានសហការជាមួយនឹងក្រុមហ៊ុនធ្វើការស្រាវជ្រាវជាង១សប្ដាហ៍ ដោយបានធ្វើការស៊ើបអង្កេតនៅតាមទីផ្សារមួយចំនួន ដើម្បីសួរនាំពីផលិតផលសាប៊ូនេះ រកមើលទីតាំងស្តុកធំៗ ហើយមកដល់រសៀលទី១៦វិច្ឆិកានេះ គឺបានចុះឆែកឆេរលើទីតាំងចំនួន២ រួមមាន ទី០១-ម្ចាស់ឈ្មោះ សុខ យាំង ទីតាំងស្តុកទំនិញ នៅខាងកើតផ្សារធំតាកែវ ភូមិថ្នល់បែក សង្កាត់រកាក្រៅ ក្រុងដូនកែវ និងធ្វើការដកហូត ប្រភេទសាប៊ូទឹកលាងចាន ចំនួន១១៤កេះ ប្រភេទសាប៊ូម្សៅ ចំនួន៨កេះ និងទី០២-ម្ចាស់ឈ្មោះ ហាម សុភា ទីតាំង ស្ថិតនៅខាងជើងផ្សារអង្គតាសោម ឃុំអង្គតាសោម ស្រុកត្រាំកក់ ខេត្តតាកែវ ធ្វើការដកហូត ប្រភេទសាប៊ូទឹកលាងចានចំនួន២៩កេះ ប្រភេទសាប៊ូម្សៅចំនួន៣កេះ ដោយក្នុងទីតាំងទាំងពីរខាងលើ គឺបានរកឃើញសាប៊ូ ម៉ាក LIX ដែលមានឈ្មួញខិលខូចលួចនាំចូល និងចែកចាយខុសច្បាប់រំលោភលើកម្មសិទ្ធិបញ្ញារបស់ក្រុមហ៊ុននាំចូលផ្តាច់មុខ ចំនួនជាង១៥០កេះធំ ដែលជាប្រភេទសាប៊ូលាងចាន និងសាប៊ូបោកគក់ខោអាវ។
លោកស្នងការរងបានបន្តថា ក្រោយចុះឆែកឆេរលើទីតាំងខាងលើរួច លោកព្រះរាជអាជ្ញារង បានបញ្ជាឲ្យសមត្ថកិច្ចនគរបាលប្រឆាំងបទល្មើសសេដ្ឋកិច្ច ធ្វើកំណត់ហេតុដកហូតនៅប្រភេទម្សៅសាប៊ូ និងប្រភេទសាប៊ូទឹក ដែលសម្រាប់យកទៅបោកគក់ខោអាវ និងលាងចាននោះ យកមករក្សាទុកនៅស្នងការដ្ឋាននគរបាលខេត្តតាកែវសិន រង់ចាំបន្តនីតិវិធីនៅពេលក្រោយជាបន្តទៀត៕
Source: Kampuchea Thmey Daily
0 Comments