អ្នកប្រដាល់ ចាន់ ប៊ុនហឿន ក្លិបនិរោធមានជ័យ បានវាយឈ្នះអ្នកប្រដាល់ថៃនុត ករ.កេសានុន (Nuth Kor. Kesanon) ក្នុងទឹកទី៣ ហើយអ៊ូច ធារិទ្ធ អ្នកប្រដាល់ក្លិបអាណាចក្រគុនខ្មែរ បានវាយស្មើពិន្ទុជាមួយ អ្នកប្រដាល់ថៃ ឃុមពីជិត ប៉ាយ៉ាកណុងហ៊ីន (Khumpichit Payaknonghin) ដោយពិន្ទុ ក្នុងការជួបប្រកួតជម្រុះជុំទី៤ ដណ្ដើមខ្សែក្រវាត់ខារ៉ាបាវរដូវកាលថ្មី ទម្ងន់៦០គីឡូក្រាម នៅសង្វៀនបាយ័នស្ទឹងមានជ័យ កាលពីយប់ថ្ងៃអាទិត្យ ទី១៨ ខែវិច្ឆិកា ឆ្នាំ២០១៨។
ចាន់ ប៊ុនហឿន បានផ្ដួលឲ្យ នុត ករ.កេសានុន សន្លប់នៅក្នុងទឹកទី៣ ដោយសារអុកជង្គង់ចូលចុងដង្ហើមរបស់ នុត ករ.កេសានុន បណ្ដាលឲ្យអ្នកប្រដាល់ថៃរូបនេះ ដួលសន្លប់លែងក្រោក បើទោះបីជាអាជ្ញាកណ្ដាលរាប់ដល់ដប់ហើយក្តី។
នុត ករ.កេសានុន នៅក្នុងទឹកទី១ និងទឹកទី២ គេក៏ត្រូវ ចាន់ ប៊ុនហឿន វាយសន្ធាប់ដោយកណ្ដាប់ដៃ ទាត់ និងកែង សឹងតែគាំងម្តងៗទៅហើយ តែអ្នកប្រដាល់ថៃរូបនេះគេរឹងមាំ តស៊ូបន្តការប្រកួតមកដល់ទឹកទី៤បានទៀត ប៉ុន្តែ នុត ករ.កេសានុន ចៀសមិនផុតពីសន្លប់ដោយជង្គង់របស់ ចាន់ ប៊ុនហឿន ដដែល។
អ្នកប្រដាល់ថៃនុត ករ.កេសានុន ចាញ់ក្នុងការប្រកួតជុំទី៤នេះ គឺត្រូវចប់ធ្លាក់ពីការប្រកួតនេះហើយ ព្រោះនុត ករ. ក្នុង៤ប្រកួតគេវាយឈ្នះតែ១ ប្រកួតប៉ុណ្ណោះ ឯ៣ប្រកួតទៀតគឺចាញ់ទាំងអស់។
ចំណែក ចាន់ ប៊ុនហឿនវិញ ទោះជាគេឈ្នះ ឬចាញ់ការប្រកួតជុំចុងក្រោយនេះក្ដី ក៏គេនៅតែបានឡើងទៅប្រកួតពាក់កណ្ដាលផ្ដាច់ព្រ័ត្រដែរ តែជាក់ស្ដែង គឺគេឈ្នះទៀតដែលធ្វើឲ្យ៤ ប្រកួត គេឈ្នះទាំង៤ប្រកួត។ ប៉ុន្តែ ចាន់ ប៊ុនហឿន ថិតក្នុងលំដាប់លេខ២ប៉ុណ្ណោះ ឯលេខ១ នោះ គឺជា ឡៅ ចិត្រា ក្លិបកងពលតូចទ័ពឆ័ត្រយោង៩១១។
ចំពោះអ្នកប្រដាល់ អ៊ូច ធារិទ្ធ វិញ គេប្រកួតស្មើពិន្ទុមួយអ្នកប្រដាល់ថៃ ឃុមពីជិត ប៉ា យ៉ាកណុងហ៊ីន បន្ទាប់ពីវាយគ្នា៥ទឹកពេញនោះ។
យ៉ាងណា អ៊ូច ធារិទ្ធ នេះ គេគ្រាន់តែឡើងប្រកួតជំនួស រិទ្ធ ភូលូ មិត្តរួមក្លិបរបស់គេប៉ុណ្ណោះ ដោយសារ រិទ្ធ ភូលូ បានបោះបង់ការប្រកួតតាំងពីជុំទី៣មកម្ល៉េះ។ ដូច្នេះ ឃុម ពីជិត គេបានឈ្នះដោយស្វ័យប្រវត្តិហើយក្នុងព្រឹត្តិការណ៍ជម្រុះខ្សែក្រវាត់នេះ។
ជាការស្មើ លើកទី២ហើយ សម្រាប់ការប្រកួតរវាង អ៊ូច ធារិទ្ធ និង ឃុម ពីជិត នេះ ព្រោះក្នុងការជួបគ្នាកន្លងមកនោះ ក៏លទ្ធផលស្មើគ្នាដែរ។
ចំពោះការប្រកួតដណ្ដើមប្រាក់លានបាយ័នទម្ងន់៥៧គីឡូក្រាម រវាងអ្នកប្រដាល់រួមជាតិ កាលពីល្ងាចថ្ងៃទី១៧វិច្ឆិកា នៅសង្វៀនបាយ័នស្ទឹងមានជ័យនេះដែរ អេ រដ្ឋា អ្នកប្រដាល់ក្លិបអេភូថងកីឡា បានក្លាយជាម្ចាស់ប្រាក់លាននេះ បន្ទាប់ពីគេបានយកឈ្នះ សៀវ ង៉ុយ អ្នកប្រដាល់ក្លិបកងពលធំអន្តរាគមន៍លេខ២ ដោយពិន្ទុក្នុងវគ្គផ្ដាច់ព្រ័ត្រនោះ។
អេ រដ្ឋា ក្នុងការប្រកួតជម្រុះ គេបានវាយឈ្នះ ស៊ឹម ប៊ុនឆៃ អ្នកប្រដាល់ក្លិបព្រៃទទឹង ខេត្តបាត់ដំបង ដោយពិន្ទុ។ រីឯ សៀវ ង៉ុយ ក្នុងជម្រុះគេវាយឈ្នះ ឯម សុធី អ្នកប្រដាល់ក្លិបថ្មគោលពោធិ៍សែនជ័យដោយពិន្ទុ។
សៀវ ង៉ុយ ឡើងមកជួប អេ រដ្ឋា ក្នុងវគ្គផ្ដាច់ព្រ័ត្រ គេបានប្រកួតចាញ់ អេ រដ្ឋា ដោយពិន្ទុ ដែលធ្វើឲ្យ អេ រដ្ឋា ក្លាយជាម្ចាស់ពានរង្វាន់ប្រាក់លានបាយ័ន ទម្ងន់៥៧គីឡូក្រាម។ រីឯ គង់ សំបូរ អ្នកប្រដាល់ក្លិបអាណាចក្រប្រយុទ្ធខេត្តសៀមរាប បានផ្ដួល សោម វិឆ័យ អ្នកប្រដាល់ក្លិបវិបុលដារិទ្ធពោធិសែនជ័យ ឲ្យសន្លប់ក្នុងទឹកទី៥៕
Source: Kampuchea Thmey Daily
0 Comments