អ្នកប្រដាល់ សូត្រ ប៊ុនធី ក្លិបបក្សីស្លាបដែក បានក្លាយជាម្ចាស់ជើងឯកខ្សែក្រវាត់Carabao ទម្ងន់៦០គីឡូក្រាម បន្ទាប់ពីគេប្រកួតឈ្នះអ្នកប្រដាល់ថៃPhat Thana ដោយពិន្ទុក្នុងការប្រកួតផ្ដាច់ព្រ័ត្រ កាលពីល្ងាចថ្ងៃទី១៧វិច្ឆិកា នៅលើសង្វៀនSEATV នោះ។
សូត្រ ប៊ុនធី និង Phat Thana បានឡើងមកដល់វគ្គផ្ដាច់ព្រ័ត្រដណ្ដើមតំណែងជើងឯកខ្សែក្រវាត់Carabaoនេះ បន្ទាប់ពីពួកគេទាំង២ រូបនេះ បានឆ្លងកាត់ក្នុងការប្រកួតជម្រុះ៤ប្រកួតកន្លងមកនោះ។
នៅក្នុងការប្រកួតដណ្ដើមតំណែងជើងឯកខ្សែក្រវាត់នេះ សូត្រ ប៊ុនធី ប្រកួតឈ្នះPhat Thana ដោយពិន្ទុដាច់តែម្ដង ពោលគឺ៥ទល់ និង០ គឺចៅក្រមទាំង៥រូប បានផ្តល់ពិន្ទុឲ្យ សូត្រ ប៊ុនធី ឈ្នះទាំងអស់គ្នា។
Phat Thana ត្រូវបានគេរំពឹងទុកមុនការប្រកួតថា នឹងអាចឈ្នះ សូត្រ ប៊ុនធី នោះ។ ក្រុមអ្នកលេងល្បែងភ្នាល់ក្រៅសង្វៀនសុទ្ធតែចាប់យកខាងPhat Thana ឈ្នះ តែទីបំផុតPhat Thana ចាញ់ សូត្រ ប៊ុនធី ដាច់ទៅវិញ។
សូត្រ ប៊ុនធី បានទទួលតំណែងជាម្ចាស់ខ្សែក្រវាត់ ដែលបានទទួលខ្សែក្រវាត់មួយ ពាន ១ និងប្រាក់រង្វាន់២០.០០០.០០០រៀល ប្រហាក់ប្រហែលនឹង៥.០០០ដុល្លារអាមេរិក។ ចំពោះPhat Thana ដែលបានលេខ២ នោះ បានទទួលពានមួយ និង ប្រាក់រង្វាន់១២.០០០.០០០រៀល ប្រហាក់ប្រហែល៣.០០០ដុល្លារអាមេរិក។
គួរបញ្ជាក់ថា ព្រឹត្តិការណ៍ខ្សែក្រវាត់Carabao រដូវកាលទី៧ ទម្ងន់៦០គីឡូក្រាម ដែលប្រកួតលើសង្វៀនSEA-TV នេះ មានអ្នកប្រដាល់ចូលរួមចំនួន៨រូប ក្នុងនោះខ្មែរ៤រូប និងថៃ៤ រូប ហើយបានដំណើរការប្រកួតអស់រយៈពេលជាង២ខែ ដោយចាប់ផ្ដើមពីថ្ងៃទី០៨ ខែកញ្ញា ឆ្នំា២០១៨ ហើយបានមកបញ្ចប់នៅថ្ងៃទី១៧ ខែវិច្ឆិកា ឆ្នាំ២០១៨។
ចំពោះគូដែលប្រកួតអមគូខ្សែក្រវាត់នេះ ជាការប្រកួតលក្ខណៈអន្តរជាតិនោះ ម៉ន សាម៉េត អ្នកប្រដាល់ក្លិបកងចក្ររាជសីហ៍មានរិទ្ធ បានប្រកួតវាយឈ្នះអ្នកប្រដាល់ថៃTy Sa ឲ្យសន្លប់ក្នុងទឹកទី៤ ។
ចំណែក ចាន់ វ៉ារិទ្ធ អ្នកប្រដាល់ក្លិបនិរោធមានជ័យ គេបានផ្ដួលយកឈ្នះ លីន វិរៈ អ្នកប្រដាល់ក្លិបបូរីរាជសីហ៍មានរិទ្ធ ដោយពិន្ទុ បន្ទាប់ពីប្រកួតគ្នា៥ទឹកពេញនោះ៕
•ជម្រុះជុំទី២ ដណ្ដើមប្រាក់លានទម្ងន់៦៥គ.ក្រ ៖ ឡុង ខេត្ត ចាញ់ ជី ឆៃលី ខណៈ ម៉ន វ៉ាន្នី ឈ្នះវ៉ន វ៉ុន ក្នុងទឹកទី២
ព្រឹត្តិការណ៍ប្រកួតប្រដាល់ជម្រុះដណ្ដើមប្រាក់១០លានរៀល របស់ក្រុមហ៊ុនស្រាបៀGanzberg ក្នុងប្រភេទទម្ងន់៥៤គីឡូក្រាម នៅលើសង្វៀនទូរទស្សន៍អាស៊ីអាគ្នេយ៍សប្ដាហ៍ទី៣ កាលពីយប់ថ្ងៃទី១៧ខែវិច្ឆិកា ឆ្នាំ២០១៨នោះ លទ្ធផល គឺ ឡុង ខេត្ត អ្នកប្រដាល់ក្លិបខ្លារខិនមានរិទ្ធ បានប្រកួតចាញ់ជី ឆៃលី អ្នកប្រដាល់សមាគមកីឡាប្រដាល់ក្រសួងការពារជាតិដោយពិន្ទុ ហើយមួយគូទៀត ម៉ន វ៉ាន្នី អ្នកប្រដាល់ក្លិបការិយាល័យទី៥ កងទ័ពជើងគោក បានវាយឈ្នះ វ៉ន វ៉ុន អ្នកប្រដាល់ក្លិបអេភូថងកីឡា ក្នុងទឹកទី៤។
ចំពោះការប្រកួតជាលក្ខណៈមិត្តភាពអន្តរជាតិកម្ពុជា-ថៃនិងម៉ាឡេស៊ីវិញ ឌុន រដ្ឋា អ្នកប្រដាល់ជើងខ្លាំងកម្ពុជា ក្លិបអេភូថងកីឡា បានវាយស្មើពិន្ទុជាមួយ អ្នកប្រដាល់ម៉ាឡេស៊ី Majid Hossei បន្ទាប់ពីប្រកួតគ្នា៥ទឹកពេញនោះ។ ពួកគេប្រកួតគ្នាក្នុងប្រភេទទម្ងន់៧១ គីឡូក្រាម។
ឯ ផល សោភ័ណ្ឌ អ្នកប្រដាល់ជើងខ្លាំង នៃក្លិបតាឡីដំរីមានរិទ្ធ បានផ្ដួលអ្នកប្រដាល់ថៃLek Phit អោយសន្លប់ក្នុងទឹកទី២ ក្នុងការជួបប្រកួតគ្នាទម្ងន់៦៣,៥០០គ.ក្រ។ Lek Phit ត្រូវ ផល សោភ័ណ្ឌ ទាត់ឲ្យខូចជើងខាងឆ្វេង បណ្ដាលឲ្យLek Phit ដួល និងបោះបង់ចោលការប្រកួត៕
Source: Kampuchea Thmey Daily
0 Comments