កំពង់ធំ ៖ ក្រោមការយកចិត្តទុកដាក់ដ៏ខ្ពង់ខ្ពស់ពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានគិតគូរពីជីវភាពរស់នៅរបស់អតីតយុទ្ធជន និងអតីតយុទ្ធជនពលី ដែលកន្លងមកធ្លាប់បូជា សាច់ស្រស់ ឈាមស្រស់ ដើម្បីបុព្វហេតុជាតិ មាតុភូមិ និងបានផ្តល់នូវភាពកក់ក្តៅដល់អតីតយុទ្ធជនទូទាំងព្រះរាជាណាចក្រកម្ពុជា ជាពិសេសអតីតយុទ្ធជនដែលកំពុងតែរស់នៅក្នុងទឹកដីខេត្តកំពង់ធំ។
ជាក់ស្ដែង នៅរសៀលថ្ងៃទី១៨ ខែវិច្ឆិកា ឆ្នាំ២០១៨ សម្ដេចតេជោ ហ៊ុន សែន ប្រធានសមាគមអតីតយុទ្ធជន បានមើលឃើញពីសកម្មភាពរបស់សមាគមអតីតយុទ្ធជនកម្ពុជា ខេត្តកំពង់ធំ មមាញឹកក្នុងការងារមនុស្សធម៌ជួយដល់អតីតយុទ្ធជន និងប្រជាពលរដ្ឋ ដែលជួបការលំបាកនៅក្នុងខេត្តកំពង់ធំ បានផ្តល់ សម្ភារៈ និងគ្រឿងឧបភោគ បរិភោគ ដល់លោកឧត្ដមសេនីយ៍ទោ សោម ស៊ុន មេបញ្ជាការរង យោធភូមិភាគទី៤ មេបញ្ជាការ តំបន់ប្រតិបត្តិការសឹករងកំពង់ធំ ប្រធានសមាគមអតីតយុទ្ធជនកម្ពុជា ខេត្តកំពង់ធំ រួមជាមួយថ្នាក់ដឹកនាំនៃបញ្ជាការដ្ឋាន តំបន់ប្រតិបត្តិការសឹករងកំពង់ធំ តាមរយៈ លោកឧត្ដមសេនីយ៍ឯក បណ្ឌិត ហ៊ុន ម៉ាណែត អគ្គលេខាធិការរងសមាគមអតីតយុទ្ធជនកម្ពុជា ប្រគល់ជូនសមាគមអតីតយុទ្ធជនកម្ពុជា ខេត្តកំពង់ធំ ដើម្បីបន្តធ្វើសកម្មភាពមនុស្សធម៌ ជួយដល់បងប្អូនអតីតយុទ្ធជន និងប្រជាពលរដ្ឋ ដែលមានជីវភាពលំបាកខ្វះខាតនៅខេត្តកំពង់ធំបន្តទៀត។
អំណោយដែលត្រូវផ្តល់ជូននៅពេលនេះ រួមមាន ៖ អង្ករចំនួន០៣តោន , មីយើងចំនួន៣០០កេស , រទេះរុញសម្រាប់ជនពិការ ចំនួន២០រទេះ និងឈើច្រត់សម្រាប់ជនពិការចំនួន១០គូរ។
លោក សោម ស៊ុន មេបញ្ជាការរង យោធភូមិភាគទី៤ មេបញ្ជាការ តំបន់ប្រតិបត្តិការសឹករងកំពង់ធំ ប្រធានសមាគមអតីតយុទ្ធជនកម្ពុជា ខេត្ត បានបញ្ជាក់ផងដែរថា នេះជាលើកទី៥ហើយ ដែលលោក ឧត្ដមសេនីយ៍ឯក បណ្ឌិត ហ៊ុន ម៉ាណែត អគ្គលេខាធិការរង សមាគមអតីតយុទ្ធជនកម្ពុជា បានពាំនាំនូវអំណោយដ៏ថ្លៃថ្លារបស់ សម្តេចអគ្គមហាសេនាបតីតេជោ ហ៊ុន សែន ប្រធានសមាគមអតីតយុទ្ធជនកម្ពុជា មកផ្តល់ជូនក្រុមការងារសមាគមអតីតយុទ្ធជនកម្ពុជា ខេត្តកំពង់ធំ៕
Source: Kampuchea Thmey Daily
0 Comments