ភ្នំពេញ ៖ ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី បានអះអាងថា អ្នកស្រី រ៉ូណា ស្មីត (Rhona Smith ) មិនបានលើកឡើងពីបញ្ហាលោក កឹម សុខា អតីតមេដឹកនាំគណបក្សប្រឆាំងទេ នៅក្នុងជំនួបពិភាក្សាការងារជាមួយថ្នាក់ដឹកនាំគណៈកម្មាធិការសិទ្ធិមនុស្សកម្ពុជា ប៉ុន្តែលោកបានប្រាប់ពីករណីនេះ ទៅលោកស្រី Rhona Smith ផងដែរ។
កាលពីរសៀលថ្ងៃច័ន្ទ ទី០៥ ខែវិច្ឆិកា ឆ្នាំ២០១៨ ថ្នាក់ដឹកនាំគណៈកម្មាធិការសិទ្ធិមនុស្សកម្ពុជា ដឹកនាំដោយលោក កែវ រ៉េមី បានទទួលជួបពិភាក្សាការងារជាមួយអ្នកស្រី រ៉ូណា ស្មីត (Rhona Smith) អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា នៅក្នុងដំណើរទស្សនកិច្ចរយៈពេល១១ថ្ងៃនៅប្រទេសកម្ពុជា ដែលជំនួបនេះបានធ្វើឡើងនៅទីស្នាក់ការគណៈកម្មាធិការសិទ្ធិមនុស្សកម្ពុជា នាសង្កាត់ទួលសង្កែ ខណ្ឌឫស្សីកែវ។
លោក កែវ រ៉េមី បានថ្លែងប្រាប់អ្នកសារព័ត៌មានក្រោយពីជំនួបពិភាក្សានោះថា នៅក្នុងជំនួបនោះលោកស្រី Rhona Smith បានលើកទឹកចិត្តឲ្យគណៈកម្មាធិការសិទ្ធិមនុស្សកម្ពុជា ដើម្បីចុះពិនិត្យមើលស្ថានភាពអ្នកជាប់ពន្ធនាគារនៅទូទាំងប្រទេស ដើម្បីដឹងពីស្ថានភាពនៃការរស់នៅរបស់ពួកគេយ៉ាងណាខ្លះ ដែលការងារនេះ លោក ជិន ម៉ាលីន បានដឹកនាំដោយផ្ទាល់ ហើយលោកក៏បានចុះទៅតាមបណ្តាពន្ធនាគារចំនួន២កន្លែងផងដែរ គឺពន្ធនាគារនៅខេត្តពោធិ៍សាត់ និងមជ្ឈមណ្ឌលសំចតព្រៃស្ពឺ។ ក្រោយពីទទួលព័ត៌មានថា ស្ថានភាពអ្នកជាប់ពន្ធនាគារមានភាពល្អប្រសើរ លោកស្រី រ៉ូណា ស្មីត ក៏បានលើកទឹកចិត្តឲ្យគណៈកម្មាធិការសិទ្ធិមនុស្សកម្ពុជា បន្តការងារនេះតទៅទៀត និងជំរុញឲ្យចុះទៅកាន់ទីតាំងបន្សាបគ្រឿងញៀន និងទីតាំងជនអន្តោប្រវេសន៍ ដែលត្រូវបានឃាត់ខ្លួន ក្រោយការរស់នៅប្រទេសកម្ពុជាដោយខុសច្បាប់ជាដើម។
តាមលោក កែវ រ៉េមី ក្រៅពីបញ្ហាខាងលើនេះ លោកស្រី Rhona Smith ក៏បានស្នើឲ្យគណៈកម្មាធិការសិទ្ធិមនុស្សកម្ពុជា យកចិត្តទុកដាក់ពិនិត្យទៅលើការធ្វើសេចក្តីព្រាងច្បាប់នានា ក្រែងមានផលប៉ះពាល់ និងការរំលោភសិទ្ធិមនុស្សផ្សេងៗ ហើយដោយសារតែគណបក្សប្រជាជនកម្ពុជាបានឈ្នះឆ្នោតដឹកនាំរាជរដ្ឋាភិបាលតែឯង លោកស្រី រ៉ូណា ស្មីត បានជំរុញឲ្យគណៈកម្មាធិការសិទ្ធិមនុស្សកម្ពុជា ដើរតួនាទីឲ្យបានខ្លាំង ដើម្បីជៀសវាងផលប៉ះពាល់សិទ្ធិរបស់ប្រជាពលរដ្ឋ នៅពេលអនុម័តច្បាប់ផ្សេងៗ។ ទាក់ទងការអនុវត្តច្បាប់នេះដែរ លោក កែវ រ៉េមី បានអះអាងថា កម្ពុជាមានស្ថានភាពល្អប្រសើរជាងបណ្តាប្រទេសផ្សេងៗ ហើយចំពោះបញ្ហានេះអ្នករាយការណ៍ពិសេសអ.ស.បក៏បានឯកភាពផងដែរ។
ទាក់ទងការប្រកាសទ្រព្យសម្បត្តិ លោក កែវ រ៉េមី បានអះអាងថា ក្រុមប្រឹក្សាប្រឆាំងអំពើពុករលួយ ដែលមានទេសរដ្ឋមន្ត្រី ឱម យ៉ិនទៀង ជាប្រធាន នៅពេលមានកិច្ចប្រជុំម្តងៗ បានលើកឡើងពីការប្រកាសទ្រព្យសម្បត្តិ ដោយពិភាក្សាវែកញែកយ៉ាងតឹងតែង ពីព្រោះមានបុគ្គលខ្លះ ដែលត្រូវបានតែងតាំងដោយព្រះរាជក្រឹត្យ ប៉ុន្តែពួកគាត់មិនបានប្រកាសទ្រព្យសម្បត្តិឡើយ ហើយតាមច្បាប់ការមិនប្រកាសទ្រព្យសម្បត្តិត្រូវតែទទួលទោស ប៉ុន្តែនៅក្នុងកិច្ចប្រជុំក្រុមប្រឹក្សា បានពិភាក្សាគ្នាស្វែងរកការយោគយល់ណាមួយ ដូចពាក្យចាស់និយាយថា “មិនឲ្យប៉ះដៃយកដៃ ប៉ះជើងយកជើង”។ លោកបញ្ជាក់ថា កម្ពុជាជាប្រទេសមួយមានភាពងាយស្រួលក្នុងការរស់នៅ។
ហេតុនេះហើយទើបលោកអញ្ជើញលោកស្រី រ៉ូណា ស្មីត នៅពេលចូលនិវត្តន៍ គឺអាចមកចូលនិវត្តន៍នៅប្រទេសកម្ពុជាបាន ពីព្រោះបើតាមរបាយការណ៍ប្រទេសកម្ពុជា គឺជាប្រទេសទីពីរ ដែលមានស្ថានភាពល្អសម្រាប់អ្នកចូលនិវត្តន៍។
ទាក់ទងបញ្ហាអតីតមេដឹកនាំគណបក្សសង្គ្រោះជាតិ លោក កឹម សុខា លោក កែវ រ៉េមី បានអះអាងថា នៅក្នុងជំនួបពិភាក្សានោះ លោកស្រី Rhona Smith មិនបានលើកឡើងពីបញ្ហានេះទេ ប៉ុន្តែលោកបានជម្រាបជូនលោកស្រី រ៉ូណា ស្មីត អំពីបញ្ហានេះ ដោយបានបញ្ជាក់ថា ករណីដែលលោក កឹម សុខា មកស្នាក់នៅក្នុងផ្ទះនេះ គឺជារឿងល្អប្រសើរ ហើយគណៈកម្មការសិទ្ធិមនុស្សអបអរសាទរចំពោះបញ្ហានេះ ដោយសារតែសុខភាពគាត់មិនល្អ ដូច្នេះតាមការស្នើសុំ និងតាមឆន្ទានុសិទ្ធិរបស់ចៅក្រម បានអនុញ្ញាតឲ្យគាត់មកនៅផ្ទះវិញ ដែលជាបញ្ហាមួយល្អប្រសើរយ៉ាងខ្លាំង ដើម្បីទទួលបានការថែទាំពីក្រុមគ្រួសារ ក៏ដូចជាគ្រូពេទ្យ។
លោកបញ្ជាក់ថា “នៅក្នុងច្បាប់យើងកុំនិយាយថា ឃុំនៅក្នុងផ្ទះ នៅក្នុងច្បាប់យើងអត់មាននិយាយការឃុំខ្លួននៅក្នុងផ្ទះទេ ដូច្នេះនេះ ទាក់ទងទៅនឹងជំងឺរបស់គាត់ ដូច្នេះខ្ញុំគិតថា ជារឿងល្អប្រសើរជាការគោរពសិទ្ធិមនុស្សពីព្រោះសុខភាពរបស់គាត់ មិនល្អ គេអនុញ្ញាតឲ្យជួបប្រពន្ធកូន ក្រុមគ្រួសារ ខ្ញុំថា ល្អមែនទែន”៕
Source: Kampuchea Thmey Daily
0 Comments