ភ្នំពេញ ៖ ដើម្បីបង្កើនភាពកក់ក្ដៅជូនប្រជាពលរដ្ឋ ក៏ដូចអ្នកដំណើររួមនឹងភ្ញៀវជាតិអន្តរជាតិនោះកងកម្លាំងទាំងអស់របស់អាវុធហត្ថរាជធានីភ្នំពេញបានត្រៀមរៀបចំភារកិច្ចក្នុងការទប់ស្កាត់ ការពារ និង សង្គ្រោះរួចជាស្រេចដោយប្រចាំបញ្ជាគ្រប់ពេលវេលារយៈពេល២៤ម៉ោងលើ២៤ម៉ោង។
នេះជាការលើកឡើងរបស់មន្ត្រីអាវុធហត្ថរាជធានី ខណៈពេលដែលត្រៀមប្រចាំការគ្រប់ពេលនៅទូទាំងរាជធានីភ្នំពេញ។ ជាក់ស្ដែងសកម្មភាព កម្លាំងកងរាជអាវុធហត្ថរាជធានីភ្នំពេញ ថ្ងៃសុក្រ ៩រោច ខែអស្សុជ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០២ ខែវិច្ឆិកា ឆ្នាំ២០១៨ថ្មីៗកម្លាំងកងរាជអាវុធហត្ថរាជធានីភ្នំពេញ កាលពីម៉ោង១៥និង៣០នាទី ថ្ងៃទី០១ ខែវិច្ឆិកា ឆ្នាំ២០១៨ បានចេញប្រតិបត្តិការបន្ទាន់ខណៈពេលមានករណីអគ្គីភ័យកើតទ្បើងនៅចំណុចហាងលក់ បាយ យ៉ាមីម្ហូបលឿន អតីតផ្សារស៊ីដនី ផ្លូវ១២៨ សង្កាត់មិត្តភាព ខណ្ឌ៧មករា។
មន្ត្រីដដែលបន្តថា ម្ចាស់ហាងដែលរងគ្រោះដោយករណីអគ្គីភ័យនោះមានឈ្មោះ វ៉ាង យ៉ុងឃុន ភេទប្រុស អាយុប្រហែល៤០ឆ្នាំ ជនជាតិចិន គេចខ្លួនបាត់។ មូលហេតុបណ្តាលមកពីធ្លាយទុយោធុងហ្គាសធ្វើឲ្យឆាបឆេះខូចខាត សំភារៈផ្ទះបាយ ទាំងស្រុង និង ធុងហ្គាសចំនួន០៤។
ប្រភពបន្តទៀតថា ក្រៅពីភារកិច្ចចំបងខាងលើនោះកម្លាំងអាវុធហត្ថបានក្រោកពីដំណេកពីព្រលឹម ហាត់ប្រាណដើម្បីសុខភាព ធ្វើអនាម័យ និងបោស ជូត សំអាត ក្នុងទីបញ្ជាការ រួចងូតទឹកស្លៀកពាក់ រង់ចាំទទួលបទបញ្ជាជាប្រចាំដើម្បី ចេញបេសកកម្ម ការពារ សន្តិសុខ សុវត្ថិភាព ហើយរួមទាំងជួយសម្រួលចរាចរ ជូនបងប្អូនប្រជាពលរដ្ឋ គណៈប្រតិភូជាតិ និងអន្តរជាតិ នៅតាមដងផ្លូវ និងភូមិសាស្ត្រ សំខាន់ៗ ក្នុងរាជធានីភ្នំពេញ។ សកម្មភាពហាត់តៃក្វាន់ដូ (WTF) គ្រូបង្គោលខណ្ឌ ទាំង១២ នឹងក៏ដូចក្នុងទីបញ្ជាការផងដែរ។
ក្រៅពីបេសកកម្មការងាររបស់កម្លាំងក្នុងទីបញ្ជាការ កម្លាំងមូលដ្ឋានអាវុធហត្ថខណ្ឌទាំង១២ នៃរាជធានីភ្នំពេញ ក៏បានបន្តចេញល្បាតការពារ សន្តិសុខ សុវត្ថិភាព ជូនបងប្អូនប្រជាពលរដ្ឋ ទាំងនៅលើដងផ្លូវ និងទាំងកំពុងនៅសម្រាន្តលង់លក់ក្នុងគេហដ្ឋាន តាមភូមិសាស្ត្រខណ្ឌរៀងៗខ្លួន នាពេលរាត្រីដោយពុំខ្លាចភាពនឿយហត់ក្នុងនាមជាកម្លាំងពិសេសជាអ្នកបំរើប្រជាពលរដ្ឋតែម្ដង៕
Source: Kampuchea Thmey Daily
0 Comments