ភ្នំពេញ ៖ បុរសជាអ្នករត់ម៉ូតូឌុបម្នាក់ ត្រូវបានជនសង្ស័យ២នាក់កាប់ប្លន់យកម៉ូតូមួយគ្រឿងទៅបាត់និងបណ្ដាលឲ្យរបួសដៃស្រាល ខណៈដែលរូបគាត់នៅអង្គុយចាំយកលុយពីនារីម្នាក់នៅចំណុចផ្លូវរថភ្លើងសង្កាត់ទួលសង្កែ១។
ហេតុការណ៍នេះបានបង្កឲ្យមានការណ៍ភ្ញាក់ផ្អើលកាលពីវេលាម៉ោង៨ និង៤៥នាទីយប់នៅថ្ងៃទី៣ ខែវិច្ឆិកា ឆ្នាំ២០១៨ ស្ថិតតាមបណ្ដោយផ្លូវទំនប់៧០ កែងផ្លូវរថភ្លើងភូមិចុងខ្សាច់សង្កាត់ទួលសង្កែ១ ខណ្ឌឫស្សីកែវ។
ជនរងគ្រោះមានឈ្មោះ កន នាង ភេទប្រុស អាយុ៤៧ឆ្នាំ មុខរបរអ្នករត់ម៉ូតូឌុប ទីកនែ្លងកំណើត ឃុំព្រែកកុយ ស្រុកកងមាស ខេត្តកំពង់ចាមស្នាក់នៅបន្ទប់ជួលភូមិទ្រុងមាន់សង្កាត់អូបែកក្អម ខណ្ឌសែនសុខ ម៉ូតូដែលក្រុមជនសង្ស័យកាប់ប្លន់យកទៅនោះម៉ាកSUZUKI SMASH ពណ៌ខ្មៅលាយក្រហម ពាក់ស្លាកលេខភ្នំពេញ.2BL-8439។
បើតាមសំដីជនរងគ្រោះបានប្រាប់ឲ្យដឹងថា មុនពេលកើតហេតុគាត់បានឌុបនារីម្នាក់ក្នុងតំលៃ៤០០០រៀលចេញពីវិហារឥស្លាមនៅម្តុំបឹងកក់សង្កាត់ស្រះចក ខណ្ឌដូនពេញ មកចំណុចកើតខាងលើ ខណៈឌុបមកដល់ នារីម្នាក់នោះចុះពីលើម៉ូតូបានប្រាប់គាត់ឲ្យចាំគាត់មួយភ្លែតហើយដើរចូលទៅតាមបណ្តោយផ្លូវរថភ្លើងបាត់មួយសន្ទុះក្រោយមកស្រាប់តែលេចមុខជនសង្ស័យ២នាក់បានធ្វើសកម្មភាពយកកាំបិតកាប់ប្លន់យកម៉ូតូម៉ាកស្មាសវីមួយគ្រឿងបណ្ដាលឲ្យជនរងគ្រោះរងរបួសដៃខាងឆ្វេងស្រាលនៅពេលនោះរូបគាត់ក៏បានស្រែកហៅឲ្យប្រជាពលរដ្ឋនៅទីនោះជួយប៉ុន្តែគ្មានអ្នកហ៊ានចូលជួយទេ ព្រោះជនសង្ស័យមានកាំបិតជាប់ដៃ ក៏បណ្ដាលឲ្យជនសង្ស័យទាំង២នាក់យកម៉ូតូជិះយកទៅគេចខ្លួនបាត់ដោយសុវត្ថិភាព។
ក្រោយកើតហេតុជនរងគ្រោះបានត្រឹមតែទៅដាក់ពាក្យបណ្ដឹងទាំងអស់សង្ឃឹមនៅប៉ុស្តិ៍នគរបាលទួលសង្កែ១ ដើម្បីឲ្យនគរបាលជួយស្រាវជ្រាវរកមុខជនសង្ស័យចាប់មកផ្តន្ទាទោសតាមច្បាប់៕
Source: Kampuchea Thmey Daily
0 Comments