បន្ទាយមានជ័យ ៖ ប្ដីចិត្តខ្លាំងម្នាក់ មិនគិតរកស៊ីចិញ្ចឹមប្រពន្ធ គិតតែជួបជុំគ្នាផឹករាល់ថ្ងៃ ស្រាប់តែពេលថ្មីៗនេះ មកពីផឹកស្រវឹង មិនដឹងថាខឹងប្រពន្ធពីរឿងអី ស្រាប់តែមកដល់ផ្ទះ វាយប្រពន្ធធាក់ផងទាត់ផង ទាំងកូនខ្ចី បណ្ដាលឲ្យប្រពន្ធរបួសយ៉ាងធ្ងន់ ក្រោយពីបញ្ជូនទៅដល់មន្ទីរពេទ្យបានស្លាប់ចោលកូន ទើបតែកើតបាន៣ខែ។ ចំណែកប្ដី ពេលធ្វើសកម្មភាពរួច កម្លាំងសមត្ថកិច្ចបានចុះមកឃាត់ខ្លួនភ្លាមៗផងដែរ។
អំពើឃោរឃៅនេះបានកើតឡើងនៅវេលាម៉ោង១២ព្រឹក ថ្ងៃទី១៧ ខែវិច្ឆិកា ឆ្នាំ២០១៨ នៅភូមិគីឡូលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
សមត្ថកិច្ចមូលដ្ឋានក្រុងប៉ោយប៉ែតបានប្រាប់អ្នកយកព័ត៌មានឲ្យដឹងថា ជនដៃដល់ដែលជាប្ដីនោះមានឈ្មោះថា ឈឿន ហៃ អាយុ៣៩ឆ្នាំ រស់នៅភូមិគីឡូលេខ៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។
សមត្ថកិច្ចបានបញ្ជាក់ឲ្យដឹងទៀតថា នៅមុនពេលកើតហេតុនោះ ជនសង្ស័យប្ដីចិត្តសាហាវឃោរឃៅមនុស្សប្រមឹក មិនដែលសូវជួយរកស៊ីចិញ្ចឹមក្រុមគ្រួសារប៉ុន្មាននោះទេ គិតតែពីជុំគ្នាផឹកស្រាហើយនៅពេលស្រវឹងមកដល់ផ្ទះរករឿងប្រពន្ធ ដោយសារតែទាស់ពាក្យសម្ដីគ្នាខ្លាំង ធ្វើឲ្យប្ដីទ្រាំលែងបាន ក៏បានបញ្ចេញកំហឹងទាត់ផង ធាក់ផង បណ្តាលឲ្យប្រពន្ធរបួសធ្ងន់ ទើបនឹងកូនខ្ចីបាន៣ខែ ក៏ធ្វើឲ្យស្ត្រីនោះស្លាប់តែម្ដង ខណៈក្រុមគ្រួសារបញ្ជូនដល់មន្ទីរពេទ្យចោលកូនទើបតែអាយុបាន៣ខែ។
បច្ចុប្បន្ន ប្ដី ក្រោយពីធ្វើសកម្មភាពហើយ សមត្ថកិច្ចចុះមកដល់កន្លែងកើតហេតុឃាត់ខ្លួនបានភ្លាមៗហើយបញ្ជូនមកក្រុមជំនាញ និងកសាងសំណុំរឿងបញ្ជូនទៅតុលាការ ដើម្បីដាក់ទោសទៅតាមផ្លូវច្បាប់៕
Source: Kampuchea Thmey Daily
0 Comments