បន្ទាយមានជ័យ ៖ បាតុភូតធម្មជាតិ បង្កឲ្យបង្គោលភ្លើងតង់ស្យុងខ្ពស់ពីខេត្តបន្ទាយមានជ័យ ទៅខេត្តសៀមរាប ដួលទ្រេតដាច់ចរន្តអគ្គិសនីខេត្តសៀមរាប និងរលំដើមឈើ រលំផ្ទះពលរដ្ឋជាច្រើនខ្នងសង្កត់ពលរដ្ឋម្នាក់របួសធ្ងន់ កាលពីម៉ោង៤និង៤៥នាទី នៅភូមិ-ឃុំរហាល ស្រុកព្រះនេត្រព្រះ ខេត្តបន្ទាយមានជ័យ។
យោងតាមរបាយការណ៍ លោក ស៊ិន រ៉ាស៊ី មេបញ្ជាការកងរាជអាវុធហត្ថស្រុកព្រះនេត្រព្រះប្រាប់អ្នកសារព័ត៌មានឲ្យដឹងថា ខ្យល់កន្ត្រាក់នោះ បង្កឲ្យខូចខាតផ្ទះពលរដ្ឋ៤ខ្នង ក្នុងនោះខូចធ្ងន់២ខ្នង និងរបួសបុរសម្នាក់ ឈ្មោះ យាំង សេត ភេទប្រុស អាយុ៣៧ឆ្នាំ រងរបួសស្រាល។
ជាមួយគ្នានោះ ក៏បង្កឲ្យទ្រេតបង្គោលបញ្ជូនចរន្តតង់ស្យុងខ្ពស់១១៥គីឡូវ៉ុល តាមបណ្ដោយផ្លូវជាតិលេខ៦ ខាងកើតស្ពានរហាល ចំនួន១ដើម បង្កឲ្យកាត់ផ្ដាច់ចរន្តអគ្គិសនី ស្រុកព្រះនេត្រព្រះ១កំណាត់យប់ និងដើមឈើ ស្លាកយីហោមួយចំនួនក៏ត្រូវដួលរលំផងដែរ។
ជុំវិញហេតុការណ៍នេះ លោកវរសេនីយ៍ មាស រឹទ្ធី អធិការនគរបាលស្រុកព្រះនេត្រព្រះបានដឹកនាំកម្លាំងនគរបាលចុះជួយជួសជុលផ្ទះជូនពលរដ្ឋរងគ្រោះនាព្រឹកថ្ងៃទី១៩វិច្ឆិកានេះ ពលរដ្ឋរងគ្រោះរបួសស្រាល បានទទួលការសង្គ្រោះ ព្យាបាលនៅមន្ទីរពេទ្យបង្អែក ស្រុកព្រះនេត្រព្រះ ហើយជិតធូរស្បើយហើយ។
លោក មាស រិទ្ធី បន្តថា ចរន្តអគ្គិសនីដែលកាត់ផ្ដាច់នៅ១ចំហៀង ស្រុកព្រះនេត្រព្រះ និង១ខេត្តសៀមរាប ១កំណាត់យប់នោះ ត្រូវបានក្រុមការងារ នៃក្រុមហ៊ុនផៅវ័រ ត្រែនមីសិនឡាញ និងអគ្គិសនីកម្ពុជាអនុស្ថានីយខេត្តបន្ទាយមានជ័យ ជួសជុលតម្រង់បង្គោល និងដោះស្រាយទាំងយប់ ហើយភ្ជាប់ចរន្តអគ្គិសនីបានប្រើប្រាស់វិញនៅជាងម៉ោង១១យប់ នាថ្ងៃដដែល៕
Source: Kampuchea Thmey Daily
0 Comments