បាត់ដំបង ៖ យុវជនម្នាក់ ដែលជាប់ពាក់ព័ន្ធនឹងករណីឃាតកម្ម គិតទុកជាមុន ត្រូវបានកម្លាំងសមត្ថកិច្ច នៃការិយាល័យព្រហ្មទណ្ឌកម្រិតធ្ងន់ សហការជាមួយកម្លាំងអធិការដ្ឋាន នគរបាលស្រុកសង្កែ តាមប្រមាញ់ និងឈានដល់ការឃាត់ខ្លួនភ្លាមៗ ក្រោយពេលកើតហេតុផងដែរ បន្ទាប់ពីយុវជនរូបនេះ បានធ្វើសកម្មភាពយកចបជីកដែក សំពងទៅលើតារបស់ខ្លួន បណ្តាលឲ្យស្លាប់រួចមក ។
យោងតាមរបាយការណ៍របស់សមត្ថកិច្ចបានឲ្យដឹងថា មានករណីឃាតកម្មមួយបានកើតឡើង កាលពីថ្ងៃទី១៨ ខែវិច្ឆិកា ឆ្នាំ២០១៨ វេលាម៉ោង១២និង៣០នាទី ចំណុចក្រុម២ ភូមិអន្លង់វិល ឃុំអន្លង់វិល ស្រុកសង្កែ ខេត្តបាត់ដំបង ដែលបង្កឡើងដោយជនសង្ស័យឈ្មោះ ភឹម សុធា ហៅក្រត ភេទប្រុសអាយុ២៧ឆ្នាំ មានទីលំនៅភូមិ/ឃុំ ខាងលើ។
របាយការណ៍បានបន្តថា នៅពេលកើតហេតុនោះ យុវជនខាងលើ ដែលត្រូវជាចៅ បានយកចបជីកដងដែកវាយទៅលើឈ្មោះ អ៊ឹម ឆើយ ភេទប្រុស អាយុ៦៦ឆ្នាំ មុខរបរជាគ្រូហោ រស់នៅក្រុម១ ភូមិ អន្លង់វិល ឃុំអន្លង់វិល ចំពីក្រោយជាច្រើនដង បណ្ដាលឲ្យផុងលលាដ៍ក្បាលស្លាប់តែម្ដង រួចហើយជនសង្ស័យបានរត់គេចខ្លួនបាត់ស្រមោល។
បើតាមមជ្ឈដ្ឋានមួយចំនួនបាននិយាយថា យុវជនរូបនេះមិនមានជាប់ពាក់ព័ន្ធសាច់ញាតិជាមួយនឹងជនរងគ្រោះឡើយ ហើយក៏ជាមនុស្សដែលញៀនថ្នាំរហូតបែកថ្នាំផងដែរ ទើបក្លាយទៅជាមនុស្សប្រភេទនេះ។
ក្រោយពេលកើតហេតុ កម្លាំងការិយាល័យ ព្រហ្មទណ្ឌកម្រិតធ្ងន់ បានសហការជាមួយកម្លាំងអធិការដ្ឋាន នគរបាលស្រុកសង្កែ ដែលដឹកនាំដោយ លោកឧត្ដមសេនីយ៍ ជេត វណ្ណនី ស្នងការរង ទទួលផែនយុត្តិធម៌ បានចុះឃាត់ខ្លួនជនសង្ស័យបាននៅវេលាម៉ោង០៣និង២០នាទីរសៀល ក្នុងថ្ងៃដដែល ខណៈដែលជនសង្ស័យរូបនេះបានរត់ទៅសំងំក្នុងផ្ទះពូ នៅភូមិអន្លង់វិល។
នៅចំពោះមុខសមត្ថកិច្ច ជនសង្ស័យដែលមានសភាពបែកថ្នាំ បាននិយាយថា ការធ្វើបែបនេះដោយសារតែខ្លួនមានការខឹងទៅនឹងលោកតា ដែលហ៊ានធ្វើអំពើដាក់មកលើខ្លួន។ បច្ចុប្បន្នជនសង្ស័យត្រូវបានកម្លាំងសមត្ថកិច្ចជំនាញ រៀបចំសំណុំរឿងដើម្បីបញ្ជូនទៅសាលាដំបូងហើយ ក្នុងការចាត់វិធានការតាមផ្លូវច្បាប់៕
Source: Kampuchea Thmey Daily
0 Comments