រតនគិរី ៖ ទំនប់វារីអគ្គិសនី១ និង២ ដែលមានទីតាំងស្ថិតនៅក្នុងឃុំអូរជុំ ស្រុកអូរជុំ ខេត្តរតនគិរី និងមានវ័យចំណាស់ បានកសាងឡើងមុនដំបូងគេបង្អស់នៅកម្ពុជា រួមជាមួយដៃគូសហការពីទំនប់វារីអគ្គិសនីសេសាន២ និងដៃគូពីប្រទេសជិតខាង មានវិសាលភាពអាចផ្គត់ផ្គង់ថាមពលអគ្គិសនីដល់ពលរដ្ឋដែលជាអ្នកប្រើប្រាស់ បានជាងពាក់កណ្ដាល នៃចំនួនប្រជាពលរដ្ឋសរុបក្នុងខេត្តរតនគិរី។
នេះបើតាមការលើកឡើងរបស់ លោក អ៊ុង ហ៊ួរ ប្រធានមន្ទីរស្ដីទី រ៉ែ និងថាមពលខេត្តរតនគិរី ដែលបានផ្តល់សម្ភាសន៍ដល់អ្នកសារព័ត៌មានក្នុងខេត្ត នាថ្ងៃទី០៥ ខែវិច្ឆិកា ឆ្នាំ២០១៨នេះ។
លោក អ៊ុង ហ៊ួរ ប្រធានមន្ទីរស្ដីទីរ៉ែ និងថាមពលខេត្ត បានឲ្យដឹងថា ទំនប់វារីអគ្គិសនីអូរជុំ១ គឺជាទំនប់វារីអគ្គិសនីដែលបានកសាងឡើងដំបូងគេបង្អស់ក្នុងប្រទេសកម្ពុជា ដែលមានផ្ទៃបឹង១,៦ គីឡូម៉ែត្រការ៉េ និងមានសមត្ថភាពផ្ទុកទឹកបានចំនួន១២,៦លានម៉ែត្រគីប រួមទាំងខ្នងទំនប់ មានកម្ពស់ ៦០ម៉ែត្រ និងបណ្ដោយ៨,៥០ម៉ែត្រ ដែលអាចផលិតថាមពលអគ្គិសនីបានចំនួន១គីឡូវ៉ាត់ម៉ោង។
លោកប្រធានមន្ទីរស្ដីទីរូបនេះបានឲ្យដឹងថា ទំនប់វារីអគ្គិសនីអូរជុំ១ បច្ចុប្បន្ននេះពុំទាន់មានលទ្ធភាពគ្រប់គ្រាន់ក្នុងការផ្គត់ផ្គង់ដល់អតិថិជនទូទាំងខេត្តនៅឡើយទេ ដោយសព្វថ្ងៃ អគ្គិសនីខេត្ត បានទិញបន្ថែមថាមពលអគ្គិសនីពីប្រទេសវៀតណាមចំនួន៧គីឡូវ៉ាត់ និង ពីវារីអគ្គិសនីសេសាន២ ចំនួន៧ គីឡូវ៉ាត់បន្ថែមទៀតផងដែរ ទើបអាចផ្គត់ផ្គង់ការប្រើប្រាស់សម្រាប់អតិថិជនជាង៥០ភាគរយ ក្នុងខេត្តរតនគិរី ដែលមានបណ្ដាញអគ្គិសនីតភ្ជាប់ទៅដល់មូលដ្ឋានរបស់ពួកគាត់។
លោក គឹម កុសល មន្ត្រីជំនាញផ្នែកផលិតកម្ម នៃអគ្គិសនីខេត្តរតនគិរី បានឲ្យដឹងដែរថា ទំនប់វារីអគ្គិសនីអូរជុំ១នេះ គឺបានប្រភពទឹកពីបឹងអូរជុំ១ ដែលជាប្រភពទឹក បានមកពីបណ្ដាអូរធម្មជាតិនានា ក្នុងខេត្តរតនគិរីហូរចូលមក។
មន្ត្រីជំនាញផ្នែកផលិតកម្ម នៃអគ្គិសនីខេត្តរតនគិរីរូបនេះបានឲ្យដឹងអំពីសង្វាក់ផលិតកម្ម និងសមត្ថភាពក្នុងការផលិតអគ្គិសនី ដើម្បីផ្គត់ផ្គង់ដល់ពលរដ្ឋក្នុងខេត្ត ។
លោកស្រី ហឿង ឃឿង អភិបាលស្រុកអូរជុំ បានឲ្យដឹងដែរថា ទំនប់វារីអគ្គិសនីអូរជុំ១នេះ បានចាប់ផ្ដើមកសាងឡើងក្នុងឆ្នាំ១៩៩១ ក្រោមការផ្ដួចផ្ដើមឡើងដោយ លោកព្រឹទ្ធាចារ្យ ប៊ូ ថង ហើយបានសម្ពោធដាក់ឲ្យដំណើរការប្រើប្រាស់ក្នុងឆ្នាំ១៩៩៣។
លោកស្រីអភិបាលស្រុកអូរជុំរូបនេះ បានឲ្យដឹងទៀតថា តាមរយៈការបង្កើតឲ្យមានទំនប់វារីអគ្គិសនីអូរជុំនេះឡើង គឺបានផ្តល់អត្ថប្រយោជន៍ជាច្រើនដល់ពលរដ្ឋមូលដ្ឋានក្នុងខេត្ត ទាំងបងប្អូនជនជាតិខ្មែរ និងជនជាតិដើមភាគតិច ហើយចាប់តាំងពីខេត្តរតនគិរី មានទំនប់វារីអគ្គិសនីអូរជុំនេះឡើង ឃើញថាខេត្តរតនគិរីមានការអភិវឌ្ឍរីកចម្រើនបានយ៉ាងឆាប់រហ័សលើគ្រប់វិស័យ។
បន្ថែមពីនេះ លោកស្រីអភិបាលស្រុកបានឲ្យដឹងទៀតថា មូលហេតុដែលថ្នាក់ដឹកនាំខេត្ត កាលពីជំនន់នោះ ជ្រើសរើសយកទីតាំងស្រុកអូរជុំ ក្នុងការកសាងទំនប់វារីអគ្គិសនីអូរជុំនេះឡើង គឺដោយសារទីតាំងភូមិសាស្ត្រស្រុកមួយនេះ ស្ថិតនៅចំកណ្ដាលបណ្ដាស្រុក-ក្រុងទាំង៩ ក្នុងខេត្តដែលហ៊ុំព័ទ្ធជុំវិញ លើកលែងតែស្រុកលំផាត់ និងស្រុកអូរយ៉ាដាវតែប៉ុណ្ណោះ។
លោកស្រីបន្ថែមទៀតថា ទន្ទឹមនឹងទីតាំងភូមិសាស្ត្រនេះ ចំណុចសំខាន់១ទៀត គឺស្រុកអូរជុំ ក៏ជាទីកន្លែងដែលសម្បូណ៌ទៅដោយបងប្អូនជនជាតិដើមភាគតិចគ្រប់ជាតិសាសន៍រស់នៅ ដូច្នេះហើយទើបថ្នាក់ដឹកនាំខេត្តគ្រប់ជំនាន់ចង់លើកស្ទួយជីវភាពរស់នៅរបស់បងប្អូនជនជាតិដើមភាគតិច ឲ្យមានជីវភាពរស់នៅ និងការអប់រំយល់ដឹងកាន់តែល្អប្រសើរជាងនេះបន្ថែមទៀត៕
Source: Kampuchea Thmey Daily
0 Comments