ស្ទឹងត្រែង ៖ ផ្ទះឈើចំនួន២ខ្នង ដោយមួយខ្នងប្រក់ក្បឿង ដែលមានទំហំធំ ម្ចាស់ផ្ទះរវល់លក់នៅសាលារៀន ត្រូវបានអគ្គិភ័យធ្វើការឆាបឆេះផ្ទះ និងទ្រព្យសម្បត្តិគ្មានសល់ កាលពីវេលាម៉ោង២និង៣០នាទីរសៀល ថ្ងៃទី០៧ ខែវិច្ឆិកា ឆ្នាំ២០១៨ នៅចំណុចខាងក្រោយសាលាខេត្តស្ទឹងត្រែង ស្ថិតក្នុងភូមិត្រពាំងព្រីង សង្កាត់/ក្រុង/ខេត្តស្ទឹងត្រែង។
សមត្ថកិច្ចបានឲ្យដឹងថា ម្ចាស់ផ្ទះដែលត្រូវបានអគ្គិភ័យឆាបឆេះនោះមានឈ្មោះ វង ភេទប្រុស អាយុ ៥៥ឆ្នាំ និងប្រពន្ធឈ្មោះ ឈុន ធា ភេទស្រី អាយុ៤៥ឆ្នាំ មានទីលំនៅភូមិត្រពាំងព្រីង សង្កាត់/ក្រុង/ខេត្តស្ទឹងត្រែង។
ប្រភពពីប្រជាពលរដ្ឋនៅជិតកន្លែងកើតហេតុបានឲ្យដឹងថា នៅមុនកើតហេតុគេបានឃើញមានផ្សែងតិចតួចទេ មើលទៅមិនសមជាឆេះផ្ទះនោះទេ គេសង្ស័យថាអាចជាដុតកង់ឡាន បន្ទាប់មកក៏មានការផ្អើលឆោឡោថាឆេះផ្ទះទៅវិញ។
បន្ទាប់ពីមានការឆាបឆេះអ្នកឃើញហេតុការណ៍ក៏បានគេរាយការណ៍ទៅកាន់នគរបាលផ្នែកពន្លត់អគ្គិភ័យ នៃស្នងការដ្ឋាននគរបាលខេត្តស្ទឹងត្រែង យកឡានទឹកចំនួន៣គ្រឿងចុះអន្តរាគមន៍ភ្លាមៗផងដែរ។ តែទោះជាយ៉ាងណានោះ គឺផ្ទះនោះ បានត្រូវឆាបឆេះស្ទើរតែទាំងស្រុងទៅហើយ ចំណែកទ្រព្យសម្បត្តិវិញឆេះខ្ទេចគ្មានសល់។
ផ្ទះដែលឆេះនោះ ត្រូវបានសមត្ថកិច្ចសន្និដ្ឋានជំហានដំបូងថា អាចមកពីទុស្សេចរន្តអគ្គិសនី បណ្ដាលឲ្យឆេះតែម្ដង ផ្ទះដែលឆេះនោះមានទំហំ៨ម៉ែត្រគុណនឹង១១ម៉ែត្រ ធ្វើពីឈើប្រក់ក្បឿង និងមួយខ្នងតូចប្រក់ស័ង្កសី។
ផ្ទះដែលឆេះនោះ បានប្រើរថយន្តអគ្គិភ័យចំនួន៣គ្រឿង ទឹកចំនួន៤ឡាន ទើបធ្វើការអន្តរាគមន៍បានទាន់ពេលវេលាមិនមានការឆ្លងទៅផ្ទះផ្សេងនោះទេ។
ចំណែកឯទំហំខូចខាត ទ្រព្យសម្បត្តិផ្ទះ២ខ្នងនោះមិនត្រូវបានគេរាយការណ៍ថា មានទំហំទឹកប្រាក់ប៉ុន្មាននៅឡើយទេ៕
Source: Kampuchea Thmey Daily
0 Comments