ភ្នំពេញ ៖ កាយវិការសំពះគោរពគ្នាទៅវិញទៅមករបស់សមត្ថកិច្ចកងរាជអាវុធហត្ថរាជធានីភ្នំពេញនិងប្អូនៗសិស្សសាលាតូចៗ ធ្វើឲ្យមហាជន លោកមានការស្ងើចសរសើរ ព្រោះកម្របានឃើញសកម្មភាពបែបនេះនាពេលកន្លងមក។
តាមប្រសាសន៍របស់ លោកតា សឹម ធាន បានប្រាប់កម្ពុជាថ្មីនៅព្រឹកថ្ងៃទី១៦វិច្ឆិកានេះថា លោកតាបានតាមដាននូវសកម្មភាពរបស់ក្មួយៗ ដែលជាសមត្ថកិច្ច នៃកងរាជអាវុធហត្ថរាជធានីភ្នំពេញនៅពេលដែលសមត្ថកិច្ចទាំងនោះបានទៅដឹកដៃសិស្សសាលាតូចៗ ឲ្យឆ្លងផ្លូវជារៀងរាល់ពេលមិនដែលខកខានឡើយ ហើយនៅគ្រប់សាលាទាំងអស់ ទូទាំងរាជធានីភ្នំពេញ។
អ្វីដែលលោកតាសូមស្ងើចសរសើរនោះ គឺនៅពេលដែលសមត្ថកិច្ចកងរាជអាវុធហត្ថរាជធានីភ្នំពេញដឹកដៃសិស្សឆ្លងផុតផ្លូវរួចមក លោកតាបានឃើញសិស្សតូចៗ បានលើកដៃសំពះអរគុណដល់បងៗ សមត្ថកិច្ច ហើយសមត្ថកិច្ចវិញបានលើកដៃសំពះតបមកវិញ គួរឲ្យរំភើប និងស្រឡាញ់ ទាំងភាគីទាំងពីរខ្លាំងណាស់។
សកម្មភាពបែបនេះ បើសិនជាប្រជាពលរដ្ឋខ្មែរអនុវត្តន៍ឲ្យបានគ្រប់ៗគ្នា នៅទូទាំងប្រទេស គឺច្បាស់ជាខ្មែរយើងចេះស្រឡាញ់ជាតិសាសន៍ យើង នឹងលែងមានអំពើហិង្សាកើតឡើងតទៅទៀតហើយ។
ហើយបើខ្មែរយើងចេះគោរព និងស្រឡាញ់គ្នាដូចក្នុងរូបភាពខាងលើនេះ គឺជនបរទេសក៏កោតខ្លាចខ្មែរយើងទៀតផង។
លោកតាបញ្ជាក់ថា មិនថាតែលោកតាទេ ដែលបានកោតសរសើរនូវសកម្មភាពដ៏ល្អកម្របានឃើញបែបនេះគឺសូម្បីតែមហាជនក៏បានលួចសសើរនិងនិយាយតៗគ្នាពីមាត់មួយទៅមាត់មួយថាសកម្មភាពនេះ គឺជាគំរូមួយដ៏ល្អដែលសុំឲ្យខ្មែរយើងត្រូវចេះរួបរួមគ្នា ដើម្បីកសាងជាតិយើងឲ្យបានថ្កុំថ្កើងតរៀងទៅ។
គួរបញ្ជាក់ថា សកម្មភាពដែលកម្លាំងសមត្ថកិច្ចកងរាជអាវុធហត្ថរាជធានីភ្នំពេញចេញទៅជួយធ្វើចរាចរណ៍ និងដឹកដៃសិស្សឆ្លងផ្លូវរាល់ថ្ងៃនេះ គឺអនុវត្តន៍ តាមការបញ្ជារផ្ទាល់ពីលោកឧត្ដមសេនីយ៍ឯក រត្ន័ ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ ដែលជានិច្ចកាល លោកមេបញ្ជាការតែងតែណែនាំដល់មន្ត្រីអាវុធហត្ថទាំងអស់ ត្រូវចុះការពារសន្តិសុខសណ្ដាប់ធ្នាប់នៅតាមបណ្ដាសាលាក្នុងរាជធានីភ្នំពេញ ពិសេសត្រូវដឹកដៃសិស្សឆ្លងផ្លូវឲ្យទាល់តែអស់ មុន នឹងចេញទៅបំពេញការងារនៅតាមបណ្ដាទីតាំងដទៃទៀត។
ទិសដៅរបស់លោកមេបញ្ជាការ គឺការពារមិនឲ្យសិស្សានុសិស្ស និងលោកយាយ លោកតា ជួបគ្រោះថ្នាក់ចរាចរណ៍ពេលឆ្លងផ្លូវចេញពីសាលា និងទីអារាម៕
Source: Kampuchea Thmey Daily
0 Comments