លទ្ធផល​នៃ​ការបោះឆ្នោត​បំពេញ​បន្ថែម​នៅ​មីយ៉ាន់ម៉ា​ បង្ហាញ​ពី​ឧបសគ្គ​សម្រាប់​គណបក្ស​របស់លោក​ស្រី​ស៊ូ​ជី

មេដឹកនាំ​រដ្ឋ​មី​យ៉ាន់​ម៉ា​ដែល​កំពុង​ប្រឈម​នឹង​បញ្ហា​គឺ​លោកស្រី អ៊ួ​ង​សាន ស៊ូ​ជី បាន​និយាយ​កាលពី​ថ្ងៃអាទិត្យ​ថា ពួកគេ​បាន​ចាញ់​នៅក្នុង​មណ្ឌលបោះឆ្នោត​ចំនួន​ប្រាំមួយ​ក្នុងការ​បោះឆ្នោត​បំពេញបន្ថែម​ថ្នាក់ជាតិ​មួយ​ដែល​នេះ​ជាការ​បង្ហាញ​អំពី​ការគាំទ្រ​មិន​ស្មើភាព​គ្នា​សម្រាប់​រដ្ឋាភិបាល​របស់​លោកស្រី​បន្ទាប់ពី​មាន​ជម្លោះ​ជាច្រើន​។​
​
លោកស្រី ស៊ូ​ជី និង​គណបក្ស​សម្ព័ន្ធភាព​ជាតិ​ដើម្បី​លទ្ធិប្រជាធិបតេយ្យ (NLD) របស់លោក​ស្រី​បាន​ដណ្ដើម​អំណាច​នៅ​ឆ្នាំ​២០១៥​ក្នុង​ជ័យជំនះ​ភ្លូកទឹកភ្លូកដី​មួយ​ដោយ​បញ្ចប់​ការគ្រប់គ្រង​ដោយ​យោធា​អស់​រយៈពេល​ជាច្រើន​ទសវត្សរ៍​។​
​
ប៉ុន្តែ​ការកាន់កាប់​របស់លោក​ស្រី​គឺ​ពោរពេញ​ដោយ​ភាពច្របូកច្របល់​ជាពិសេស​ជាមួយ​ក្រុម​ជនជាតិភាគតិច​ដែល​ចូលរួម​ក្នុង​កិច្ចចរចា​សន្តិភាព​ជាមួយ​យោធា​ដែល​ត្រូវបាន​បំផ្លិចបំផ្លាញ​ដោយ​ការប៉ះទង្គិច​គ្នា​និង​សង្គ្រាមស៊ីវិល​កំពុង​បន្ត​នៅក្នុង​រដ្ឋ​នានា​ដូចជា​កា​ឈី​ន​និង​សាន​ជាដើម​។​
​
ភាពមិន​ពេញចិត្ត​នេះ​បានបង្ហាញ​នៅក្នុង​លទ្ធផល​នៃ​ការបោះឆ្នោត​កាលពី​ថ្ងៃ​សៅរ៍​ដែល​ក្នុងនោះ​អាសនៈ​ចំនួន​១៣​នៅក្នុង​សភា​ជាន់​ទាប​និង​សភា​ជាន់ខ្ពស់​និង​សភា​ក្នុង​តំបន់​ត្រូវបាន​គេ​យកឈ្នះ​។​
​
អ្នកនាំពាក្យ NLD លោក Myo Nyunt បាន​ប្រាប់ AFP ថា “​បច្ចុប្បន្ន​យើង​បានឈ្នះ​អាសនៈ​ចំនួន​ប្រាំពីរ​ហើយ​បាន​ចាញ់​ប្រាំមួយ​អាសនៈ​”​។​
​បួន​នៃ​អាសនៈ​ទាំង​ប្រាំមួយ​គឺ​ពីមុន​ត្រូវបាន​កាន់កាប់​ដោយ​បេក្ខជន NLD ។​
​
ថ្វីបើ​សន្លឹកឆ្នោត​ជា​ផ្លូវការ​មិនទាន់​ត្រូវបាន​បញ្ចេញ​ដោយ​គណៈកម្មាធិការ​បោះឆ្នោត​សហជីព​នៅឡើយ​ក៏ដោយ លទ្ធផល​បឋម​បាន​បង្ហាញថា គណបក្ស​សម្ព័ន្ធភាព​សាមគ្គី​និង​អភិវឌ្ឍន៍​ដែលជា​សម្ព័ន្ធមិត្ត​យោធា​បាន​ទម្លាក់ NLD ចេញពី​៣​អាសនៈ​។​
​
នៅក្នុង​មណ្ឌលបោះឆ្នោត​ខ្លះ អ្នកបោះឆ្នោត​បាន​ចូលរួម​ជាមួយ​គណបក្ស​នយោបាយ​ជនជាតិភាគតិច​ខណៈដែល​ប្រជាជន​នៅក្នុង​ទីក្រុង Yathedaung របស់​រដ្ឋ​រ៉ា​ក់​ឃី​ន​បាន​គាំទ្រ​ដល់​កូនប្រុស​របស់​អ្នកនយោបាយ​ដ៏​លេចធ្លោ​ម្នាក់​ដែល​កាលពីមុន​បានបង្ហាញ​អំពី​ការមិន​ពេញចិត្ត​របស់​ពុទ្ធសាសនិក​ក្នុង​រដ្ឋ​រ៉ា​ក់​ឃី​ន​ជាមួយ​សហគមន៍​មូស្លីម​។​
​បណ្ឌិត Myo Nyunt បាន​និយាយថា ការបាត់បង់​អាសនៈ​ទាំង​ប្រាំមួយ​នេះ​គឺ​ដោយសារតែ​ភាព​គ្មាន​ប្រជាប្រិយ​របស់​គណបក្សរ​បស់​គាត់​ជាមួយ​ក្រុម​ជនជាតិភាគតិច​និង​ប្រជាជន​ដែល​ធ្វើការ​ឲ្យ​រដ្ឋាភិបាល​។ លោក​និយាយថា “​យើង​ដឹងថា ក្រុម​ជនជាតិភាគតិច​មិន​ពេញចិត្ត​ចំពោះ​ការអនុវត្ត​របស់​យើង​ពាក់ព័ន្ធ​នឹង​ដំណើរការ​សន្តិភាព​”​។​
​
អ្នកវិភាគ​នយោបាយ​ឈ្មោះ Maung Maung Soe បាន​ប្រាប់ AFP ថា ចំនួន​បោះឆ្នោត​តិច​នៅក្នុង​មណ្ឌលបោះឆ្នោត​ភាគច្រើន​គឺ​បាន​ប៉ះពាល់​ដល់​គណបក្ស NLD ហើយ​ភាព​ព្រងើយកន្តើយ​របស់​អ្នកបោះឆ្នោត​អាចមាន​ឥទ្ធិពល​លើ​ពួកគេ​នៅក្នុង​ការបោះឆ្នោត​លើក​ក្រោយ​នៅ​ឆ្នាំ​២០២០៕ AFP

​

Source: Kampuchea Thmey Daily