កណ្ដាល ៖ ដោយសារឥទ្ធិពលជាតិសុរា ធ្វើឲ្យបុរសពីរនាក់ ជាភូមិផងរបងជាមួយបានទាស់សំដីគ្នាឈានដល់ការប្រីអំពើហិង្សាកាប់ប្រហារគ្នា បណ្ដាលឲ្យមានរបួសរៀងខ្លួនចុងក្រោយ ត្រូវកម្លាំងសមត្ថកិច្ចចាប់វាយខ្នោះទាំងពីរ។
នគរបាលស្រុកខ្សាច់កណ្ដាលបានឲ្យដឹងថា ហេតុការណ៍នេះបានកើតឡើងនៅថ្ងៃ ព្រហស្បតិ៍ ៨ កើត ខែកត្តិក ឆ្នាំច សំរឹទ្ធស័ក ពុទ្ធសករាជ ២៥៦២ ត្រូវនឹងថ្ងៃទី១៥ ខែវិច្ឆិកា ឆ្នាំ២០១៨ វេលាម៉ោង ២០និង០០នាទី ចំណុចភូមិ ក្នុងឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល។
នគរបាលបានបញ្ជាក់ថា ជនបង្កទាំងពីរត្រូវបានឃាត់ខ្លួនគឺ ១-ឈ្មោះ ដោក ទីន ភេទប្រុស អាយុ ៣២ឆ្នាំ ជនជាតិខ្មែរ មុខរបរ បើករថយន្ត មានទីលំនៅ ភូមិ/ឃុំ កើតហេតុ(មានរបួសក្បាល០១កន្លែង កដៃឆ្វេង០១កន្លែង), ២.ឈ្មោះ ហេង ចាន់ណា ហៅ ញ៉ាញ់ ភេទប្រុស អាយុ២៩ឆ្នាំ ជនជាតិខ្មែរ មុខរបរ កសិករ មានទីលំនៅ ភូមិ/ឃុំ កើតហេតុ(របួសក្បាល០១កន្លែង ពកថ្ងាស០១កន្លែង ជាំភ្នែកទាំងសងខាង)។
នគរបាលបានឲ្យដឹងថា មុនពេលកើតហេតុ បុរសទាំងពីរនាក់ បានផឹកស៊ីកន្លែងផ្សេងគ្នា ដោយផ្ទះនៅជិតគ្នា មានទំនាស់ពាក្យសំដីនឹងគ្នា ពេលនោះឈ្មោះ ហេង ចាន់ណា បានទាញកាំបិតខ្វែវមកកាន់ បន្ទាប់មកឈ្មោះ ដោក ទីន ស្ទុះមកចាប់កាំបិត ព្រមទាំងវាយឈ្មោះ ហេង ចាន់ណា ត្រូវមុខជាច្រើនដៃ ឈ្មោះ ហេង ចាន់ណា បានរត់ទៅយកកាំបិតបុ័ងតោ ពីផ្ទះរបស់ខ្លួន មកកាប់ឈ្មោះ ដោក ទីន ត្រូវក្បាល០១កន្លែង និងត្រូវកដៃឆ្វេង ០១កន្លែង ហើយឈ្មោះ ដោក ទីន ចាប់កាំបិតបានកាប់ទៅឈ្មោះ ហេង ចាន់ណា វិញត្រូវក្បាល០១កន្លែង។
ពេលនោះ ឈ្មោះ ប៊ន វិបុល និងឈ្មោះ មឿន ថា ចូលចាប់បំបែក ក្រោយមកកម្លាំង ប៉ុស្តិ៍ព្រែកតាមាក់ និងកម្លាំងផ្នែកយុត្តិធម៌ស្រុក បានចុះអន្តរាគមន៍ឃាត់ខ្លួនជនសង្ស័យ បញ្ជូនមកអធិការដ្ឋាននគរបាលស្រុកខ្សាច់កណ្តាល ដើម្បីចាត់ការតាមនីតិវិធី៕
Source: Kampuchea Thmey Daily
0 Comments