ក្រុម​ហ្វូ​ត​សាល​កម្ពុជា ធ្លាក់​ចេញពី​ពានរង្វាន់​ជើងឯក​តំបន់​អាស៊ាន ក្រោយ​ចាញ់​ទាំង​៣​ប្រកួត​ក្នុង​វគ្គ​ជម្រុះ​តាម​ពូ​ល

ក្រុម​ហ្វូ​ត​សាល​ជម្រើសជាតិ​កម្ពុជា បាន​ធ្លាក់​ចេញ​ត្រឹម​វគ្គ​ជម្រុះ​តាម​ពូ​ល​នៃ​ព្រឹត្តិការណ៍​ប្រកួត​ជើងឯក​ហ្វ៊ូ​ត​សាល​អាស៊ាន AFF Futsal Championship 2018 ដែល​កំពុង​ធ្វើឡើង​នៅ​ប្រទេស​ឥណ្ឌូណេស៊ី លើ​ទីលាន​GOR UNY ក្នុង​ទីក្រុង Yogyakarta បន្ទាប់ពី​ចាញ់​រង​បរាជ័យ​ទាំង​៣​ប្រកួត​ជាប់ៗ​គ្នា​។



​កាលពី​ប្រកួត​បើកឆាក​កម្ពុជា នៅ​ថ្ងៃទី​៥ ខែវិច្ឆិកា ឆ្នាំ​២០១៨ បាន​ប្រកួត​ចាញ់​ក្រុម​ម៉ាឡេស៊ី ១០​ទល់​០ ហើយ​បាន​បន្ត​ចាញ់​ក្រុម​មី​យ៉ាន់​ម៉ា ដោយ​លទ្ធផល​១២​ទល់​២ នៅ​ព្រឹក​ថ្ងៃ​អង្គារ ទី​៦ ខែវិច្ឆិកា ឆ្នាំ​២០១៨ និង​ចុងក្រោយ​បាន​ប្រកួត​ចាញ់​ក្រុម​ម្ចាស់ផ្ទះ​ឥណ្ឌូណេស៊ី ១៣​ទល់​០ នៅ​ថ្ងៃ​ពុធ ទី​៧ ខែវិច្ឆិកា ឆ្នាំ​២០១៨​។ ចំពោះ​ពានរង្វាន់ AFF Futsal Championship 2018 ចាប់ផ្ដើម​ប្រកួត​ពីថ្ងៃ​ទី​៥ ដល់ ១១ វិច្ឆិកា ឆ្នាំ ២០១៨ នៅ​ប្រទេស​ឥណ្ឌូណេស៊ី ដែលមាន​ក្រុម​៨​ចូលរួម​ចែកជា​២​ពូ​ល​។

សម្រាប់​ពូ​ល A ម៉ាឡេស៊ី និង​ឥណ្ឌូណេស៊ី កក់​កៅអី​ឡើង​ទៅ​លេង​វគ្គ​ពាក់កណ្ដាល​ផ្តាច់ព្រ័ត្រ ក្រោយ​រកបាន​ពិន្ទុ​ច្រើនជាងគេ ខណៈ​ក្រុម​មី​យ៉ាន់​ម៉ា និង​កម្ពុជា ធ្លាក់​ត្រឹម​វគ្គ​ចែក​ពូ​ល​។ ចំណែក​ពូ​ល B វិញ​ថៃ និង​វៀតណាម កក់​កៅអី​ឡើងទៅ​វគ្គ​បន្ត​ក្រោយ​មាន​៦​ពិន្ទុ​ស្មើគ្នា ខណៈ​ក្រុមទី​ម័​រ​ខាងកើត និង​ប្រ៊ុយណេ មិនទាន់មាន​ពិន្ទុ​កាន់​ក្នុង​ដៃ​ដូចគ្នា ទោះបីជា​ក្រុម​ទាំង​៤​នៅ​ដល់​ម្នាក់​១​ប្រកួត​ទៀត​ក៏ដោយ​។



​កីឡាករ​ដែល​សហព័ន្ធ​កីឡាបាល់ទាត់​កម្ពុជា កោះហៅ​ទៅ​ប្រកួត​លើ​ឆាក​អន្តរជាតិ​លើក​នេះ​មាន​ចំនួន​១៦​នាក់ ដែលមាន​ដូចជា​កីឡាករ សឹង ចាន់​វ៉ាន់​ណូ​, តា​ត់ ផាត់​ឌី​,​ញឹក ថា​លីដា​,​ហូរ អាត្រា​,​សេដ្ឋា សច្ចៈ​បុត្រ​, ចន្ថា ចន្ទាកា​,​គន្ធ លន់​ដា​រ៉ូ​ត​, គឹម សុខ​យុទ្ធ​,​រស់ ស៊ី​ចំរើន​,​ហេង សុខលី​,​រស់ រតនៈ​,​ឡាក់ ភីរុណ​,​អ៊ុក សេរី​រតនៈ​,​គីម ហាប់​,​កែវ ជា​តួ​,​ផុន ចាន់​ឧ​ត្ត​ម​។ ក្រុម​នេះ​ដឹកនាំ​ដោយ​លោក ផាន សុផាន់​ណា​រ៉ា ជា​គ្រូបង្វឹក​។

សូម​បញ្ជាក់​ថា មុន​ចេញទៅ​ប្រកួត​នៅ​ប្រទេស​ឥណ្ឌូណេស៊ី ក្រុម​ជម្រើសជាតិ​ហ្វូ​ត​សាល​កម្ពុជា​ធ្លាប់​បាន​ចេញទៅ​ហ្វឹកហាត់​និង​ប្រកួត​មិត្តភាព​នៅ​ប្រទេស​ថៃ មួយរយៈ​ខ្លី​ផង​ដែរ ដោយ​ក្នុង​នោះ​បាន​ប្រកួត​ចាញ់​ក្រុម​ម្ចាស់​ស្រុក Rachanavy FC ៥​ទល់​១ ថ្ងៃ​ពុធ ទី​២៤ ខែតុលា ឆ្នាំ​២០១៨ លើ​ទីលាន​កីឡដ្ឋាន Phutianan Stadium ខណៈ​នៅ​ថ្ងៃ​ព្រ​ហ​ស្ប​ត្តិ៍ ទី​២៥ ខែតុលា ឆ្នាំ​២០១៨ បាន​ប្រកួត​ចាញ់​ក្រុម Samutsakhon University ៤​ទល់​១ លើ​ទីលាន​ជាមួយគ្នា​។ ចំណែក​ប្រកួត​ចុងក្រោយ​កម្ពុជា ត្រូវ​បន្ត​ចាញ់​ក្រុម Bangkok City ៩​ទល់​១ ថ្ងៃ​សុក្រ ទី​២៦ ខែតុលា ឆ្នាំ​២០១៨ ដែលជា​ប្រកួត​ចុងក្រោយ​៕

Source: Kampuchea Thmey Daily