ភ្នំពេញ ៖ រដ្ឋមន្ត្រីក្រសួងសុខាភិបាលបានអំពាវនាវដល់ប្រជាពលរដ្ឋឲ្យមានការប្រុងប្រយ័ត្នខ្ពស់ចំពោះបញ្ហាពុលចំណីងាហារនៅក្នុងពិធីបុណ្យអុំទូកបណ្តែតប្រទីបសំពះព្រះខែនិងអកអំបុកដែលនឹងឈានចូលមកដល់នៅថ្ងៃទី២១វិច្ឆិកាដ៏ខ្លីខាងមុខនេះ។
លោក សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលបានមានប្រសាសន៍ថា ការជំរុញនេះដោយសារតែព្រះរាជពិធីបុណ្យអុំទូកតែងតែមានប្រជាពលរដ្ឋរាប់លាននាក់ចូលរួមទស្សនាការប្រណាំងទូកនិងបរិភោគចំណីអាហារផ្សេងៗហើយមានចំណីអាហារខ្លះមិនមានអនាម័យដែលធ្វើឲ្យប្រជាពលរដ្ឋជួបបញ្ហាសុខភាពដូចជាឈឺពោះក្អួតចង្អោរ ឬជំងឺរាករូសជាដើម។
លោក សាស្ត្រាចារ្យ ម៉ម ប៊ុនហេង បានជំរុញឲ្យប្រជាពលរដ្ឋដែលមកកំសាន្តនៅក្នុងពិធីបុណ្យអុំទូកខាងមុខនេះត្រូវអនុវត្តវិធានការអនាម័យឲ្យបានខ្ជាប់ខ្ជួនដូចជាត្រូវពិសារទឹកស្អាត ឬ ទឹកដាំពុះនិងបរិភោគចំណីអាហារដែលមានអនាម័យដើម្បីបញ្ចៀសកុំឲ្យមានការពុលចំណីអាហារនិងជំងឺដង្កាត់ផ្សេងៗដែលបណ្តាលមកពីការបរិភោគចំណីអាហារដែលមិនមានអនាម័យ។
លោករដ្ឋមន្ត្រីក៏បានណែនាំឲ្យប្រជាពលរដ្ឋត្រូវលាងដៃនឹងសាប៊ូអំឡុងពេល ឬ មុនពេលរៀបចំអាហារ មុនបរិភោគ និងក្រោយបន្ទោបង់។ លាងសំអាតបន្លែផ្លែឈើមុនពេលបរិភោគឲ្យបានស្អាត លាងសំអាតសម្ភារៈប្រើប្រាស់សម្រាប់ចំអិនអាហារឲ្យបានត្រឹមត្រូវ ចំអិនអាហារឲ្យបានឆ្អិនល្អពិសេសសាច់ សត្វស្លាប ស៊ុតនិងអាហារសមុទ្រ។
ជាមួយគ្នានេះដែរ លោករដ្ឋមន្ត្រីបានណែនាំដល់ប្រជាពលរដ្ឋកុំច្រាន ឬ ប្រជ្រៀតគ្នាដើម្បីទប់ស្កាត់នូវការដួលសន្លប់ដែលអាចកើតមានជាយថាហេតុហើយក្នុងករណីមានអាការៈវិលមុខ ឈឺក្បាល ឬ ស្រវាំងភ្នែកត្រូវអង្គុយចុះនិងហៅរកអ្នកជួយសង្គ្រោះ ឬ អាចធ្វើការទំនាក់ទំនងទៅកាន់លេខ១១៩សម្រាប់សេវារថយន្តសង្គ្រោះបន្ទាន់។
លោករដ្ឋមន្ត្រីបានឲ្យដឹងទៀតថា សម្រាប់ពិធីបុណ្យអុំទូកឆ្នាំនេះក្រសួងសុខាភិបាលគ្រោងនឹងដាក់ពង្រាយគ្រូពេទ្យនិងរថយន្តសង្គ្រោះជិត៧០គ្រឿងព្រមទាំងស្តង់ពិនិត្យសុខភាពចំនួន១២កន្លែងនៅតាមគោលដៅនីមួយៗទាំងនៅត្រើយខាងកើតនិងខាងលិចដើម្បីត្រៀមជួយសង្គ្រោះដល់ប្រជាពលរដ្ឋដែលមានបញ្ហាសុខភាពស្រាលៗ។
លោក រដ្ឋមន្ត្រីបានបញ្ជាក់ថា ក្នុងករណីធ្ងន់ធ្ងរក្រសួងបានត្រៀមមន្ទីរពេទ្យចំនួន៤រង់ចាំសង្គ្រោះ២៤ម៉ោងលើ២៤ម៉ោងដល់ពលរដ្ឋដូចជាមន្ទីរពេទ្យកាល់ម៉ែត ព្រះកុសុមៈ អង្គឌួងនិងមន្ទីរពេទ្យមិត្តភាពខ្មែរសូវៀតដោយការពិនិត្យព្យាបាលទាំងនៅតាមស្តង់និងតាមមន្ទីរពេទ្យគឺមិនគិតថ្លៃឡើយ។
ទន្ទឹមនឹងនេះដែរ ក្រសួងបានត្រៀមក្រុមគ្រូពេទ្យចល័តក្នុងហ្វូងប្រជាពលរដ្ឋដើម្បីជួយដល់ប្រជាពលរដ្ឋនៅពេលមានបញ្ហាសុខភាពហើយមិនអាចមករកគ្រូពេទ្យនៅតាមតង់សុខភាព ឬរថយន្ដសង្គ្រោះបានផងដែរ។
លោករដ្ឋមន្ត្រីក៏បានអំពាវនាវដល់ប្រជាពលរដ្ឋដែលទៅកំសាន្ត នៅក្នុងពិធីបុណ្យអុំទូកត្រូវបរិភោគគ្រឿងស្រវឹងដោយការទទួលខុសត្រូវខ្ពស់បំផុតនិងហាមពិសាគ្រឿងស្រវឹងក្នុងពេលបើកបរនិងបញ្ជាម៉ាស៊ីនដើម្បីបញ្ចៀសកុំឲ្យមានករណីគ្រោះថ្នាក់ចរាចរណ៍៕
Source: Kampuchea Thmey Daily
0 Comments