Grab ដាក់​ឲ្យ​ដំណើរការ​មុខងារ​សម្រាប់​ការគ្រប់គ្រង​ចំណាយ​ ក្នុង​ការ​ធ្វើដំណើរ​ទៅ​បំពេញការងារ​នៅ​កម្ពុជា ដែល​មាន​ឈ្មោះថា “Grab for Business”

​ភ្នំពេញ ​៖ Grab ដែលជា​ក្រុមហ៊ុន​ផ្ដល់​សេវា​កក់​ការ​ធ្វើ​ដំណើរ​ឈានមុខ​គេ​នៅ​ក្នុង​តំបន់​អាស៊ីអាគ្នេយ៍ កាលពី​ថ្ងៃទី​១៥ ខែ​វិច្ឆិកា ឆ្នាំ​២០១៨ បាន​ដាក់​ចេញ​នូវ​ដំណោះស្រាយ​ថ្មី​សម្រាប់​ក្រុមហ៊ុន​នានា ជា​មួយ​នឹង​កម្មវិធី​ឈ្មោះថា Grab for Business ជា​កម្មវិធី​គ្រប់គ្រង​ការ​ចំណាយ​ក្នុង​ការ​ធ្វើ​ដំណើរ ដែល​ត្រូវ​បាន​បង្កើត​ឡើង​សម្រាប់​អ្នកប្រើប្រាស់​ក្នុង​បំណង​ធ្វើដំណើរ​ទៅ​បំពេញការងារ នៅ​ក្នុង​រាជធានី​ភ្នំពេញ​។
​
តាម​សេចក្ដីប្រកាស​ព័ត៌មាន​របស់ Grab បាន​ឲ្យ​ដឹងថា ការ​ដាក់​សម្ពោធ​ឲ្យ​ប្រើប្រាស់​កម្មវិធី​នេះ បាន​ធ្វើឡើង​បន្ទាប់ពី​ការសាកល្បង ដោយ​ជោគជ័យ​រយៈពេល​៥​ខែ ជាមួយនឹង​ក្រុមហ៊ុន​ចំនួន​៣០ ក្នុង​រាជធានី​ភ្នំពេញ ដោយ​ក្នុង​នោះ Grab ជួយ​ដឹកជញ្ជូន​ប្រកបដោយ​សុវត្ថិភាព និង​ភាព​ងាយ​ស្រួល​ដល់​បុគ្គលិក​ក្នុង​បំណង​ចុះ​បំពេញការងារ និង​សរុប​ជារួម​ គឺ​ធ្វើដំណើរ​បាន​ជាង​១០.០០០​គីឡូម៉ែត្រ ទៅ​កាន់​ទីតាំង​ចំនួន​ជាង​៦០០​កន្លែង​ផ្សេងៗ ​គ្នា​ ក្នុង​រាជធានី​។
​
កម្មវិធី Grab for Business ជា​មធ្យោបាយ​កាន់តែ​មាន​ផលិតភាព​សម្រាប់​ក្រុមហ៊ុន​នានា​ក្នុង​ការ​គ្រប់​គ្រង​ការចំណាយ​លើ​ការធ្វើដំណើរ​។

កម្មវិធី​នេះ​ ជួយ​លុបបំបាត់​នូវ​ការងារ​រៀបចំ​ឯកសារ សង​ថ្លៃ​ចំណាយ​ធ្វើដំណើរ និង​ការ​ធ្វើ​របាយ​ការណ៍​ទូទាត់​ទៅ​ឲ្យ​បុគ្គលិក និង​ជួយ​ឲ្យ​ក្រុមហ៊ុន​នានា​អាច​គ្រប់គ្រង​កាន់តែ​ប្រសើរ​តាមរយៈ​ការ​កំណត់​គោលនយោបាយ​ធ្វើដំណើរ​តាម​តម្រូវការ ហើយ​ធានាបាន​នូវ​គណនេយ្យ​ភាព​តាមរយៈ​របាយ​ការណ៍​ទិន្នន័យ​មាន​តម្លាភាព ដើម្បី​ការពារ​គោលនយោបាយ​ក្រុមហ៊ុន ជុំវិញ​ការ​ធ្វើ​ដំណើរ​ចុះ​បំពេញការងារ​។​
​
អ្នកស្រី ហេង សុធាវី នាយក​ប្រចាំ​ប្រទេស​ស្ដីទី ប្រចាំ​ប្រទេស​កម្ពុជា​បាន​មានប្រសាសន៍ថា​ “​ក្រុម​ហ៊ុន​នានា​គួរ​ផ្ដោត​ការប្រើប្រាស់​ធនធាន​របស់​ខ្លួន​សម្រាប់​កំណើន​អាជីវកម្ម និង​ការបម្រើ អតិថិជន​របស់​ខ្លួន​។ យើង​បាន​មើល​ឃើញ​ពី​ឱកាស​ក្នុង​ការ​ផ្ដល់​នូវ​សេវា​ដឹកជញ្ជូន​ពីមួយ​កន្លែង ​ទៅ​មួយ​កន្លែង​សម្រាប់​ក្រុមហ៊ុន​នានា ដើម្បី​ជួយ​ឲ្យ​ក្រុមហ៊ុន​ទាំងនោះ​ធ្វើ​ទំនើបកម្ម និង​រៀបចំ​ដំណើរការ គ្រប់​គ្រង​ការ​ចំណាយ​លើ​ការដឹកជញ្ជូន​តាមរយៈ​បច្ចេកវិទ្យា​របស់ Grab។

កម្មវិធី Grab for Business ជួយ​រៀបចំ​តាំងពី​ការ​ធ្វើដំណើរ​បង្កាន់ដៃ​បង់​ប្រាក់ និង​ការ​សង​ថ្លៃ​ចំណាយ ដូច្នេះ​កម្មវិធី​នេះ ផ្ដល់នូវ​ភាពងាយស្រួល​សម្រាប់​អ្នកប្រើប្រាស់ ហើយ​ផ្ដល់​លទ្ធភាព​ឲ្យ​ផ្នែក​ធនធានមនុស្ស និង​ហិរញ្ញវត្ថុ អាច​សន្សំសំចៃ​ពេលវេលា​ក្នុង​ការ​គ្រប់គ្រង​ការ​ចំណាយ​សម្រាប់​ការ​ធ្វើ​ដំណើរ​ប្រចាំថ្ងៃ​នៅ​ក្នុង​ក្រុមហ៊ុន​”​។​

ការធ្វើដំណើរ​ដែល​កក់​ជាមួយ Grab អាច​ត្រូវបាន​ដាក់​ថា ជា​ការ​ធ្វើដំណើរ​ក្នុង​បំណង​បំពេញ ការងារ ហើយ​ត្រូវ​បាន​កំណត់​ដាក់​ជា​ក្រុម​នៅ​ក្នុង​កម្មវិធី Grab។

រាល់​ការធ្វើដំណើរ​ទាំងអស់​ នឹង​ត្រូវ​បាន​បញ្ចូល​ទៅ​ក្នុង​គេហទំព័រ Grab for Business ដែល​ជា​ឧបករណ៍​មួយ​សម្រាប់​ឲ្យ​ក្រុមហ៊ុន​នានា​រៀបចំ និង​គ្រប់គ្រង​លើ​ការធ្វើដំណើរ​របស់​បុគ្គលិក​។

មុខងារ​ នៃ​កម្មវិធី​នេះ​រួមមាន តាមដាន និង​គ្រប់គ្រង​ការ​ចំណាយ​លើ​ការ​ធ្វើ​ដំណើរ ដោយ​ផ្នែក​ចំណាយ ផ្នែក​/​នាយកដ្ឋាន​ផ្សេងៗ និង​ក្រុមការងារ​គម្រោង​, កំណត់​យក​ជម្រើស​ទូទាត់​តាម​តម្រូវការ​, កំណត់​គោលនយោបាយ​ នៃ​ការធ្វើដំណើរ និង​ភាពងាយស្រួល​ក្នុង​ការ​អនុវត្ត​គោលនយោបាយ​នោះ​, សន្សំសំចៃ​ពេលវេលា​តាមរយៈ​ការកាត់បន្ថយ​លិខិតស្នាម​, បែងចែក​ដោយ​ងាយស្រួល​រវាង​ការ​ធ្វើ​ដំណើរ​ក្នុង​បំណង​ការងារ និង​ក្នុង​បំណង​ផ្ទាល់ខ្លួន​, បញ្ចូល​រាល់​បង្កាន់ដៃ​សម្រាប់​ងាយស្រួល​ក្នុង​ការ​សង​លើ​ថ្លៃ​ចំណាយ​។​

Grab for Business បាន​បម្រើ​ជូន​ដល់​អតិថិជន​ជា​ក្រុមហ៊ុន​នៅតាម​បណ្ដា​ប្រទេស​ចំនួន​៨ ដែល Grab ធ្វើ​ប្រតិបត្តិការ ដែល​ក្នុង​នោះ​មាន សិង្ហ​បុរី ឥណ្ឌូណេស៊ី ហ្វីលីពីន ម៉ាឡេស៊ី ថៃ វៀតណាម កម្ពុជា និង​មីយ៉ាន់ម៉ា​។ ក្រុមហ៊ុន​នានា​ អាច​ទទួលបាន​ព័ត៌មាន​បន្ថែម និង​ចុះឈ្មោះ​នៅត្រង់​តំណ​នេះ ​៖ www.grab.com/kh/business/៕


​

Source: Kampuchea Thmey Daily