ប្រដាល់ ៖ អ្នកប្រដាល់ជើងខ្លាំងកម្ពុជា ឃុន ឌីម៉ា ក្លិបរស្មីភូមិគាបខេត្តបន្ទាយមានជ័យ ត្រូវជួបប្រកួតជាមួយអ្នកប្រដាល់ថៃKhum Phit លើសង្វៀនSEATV នារសៀលថ្ងៃសៅរ៍ ទី១០ ខែវិច្ឆិកា ឆ្នាំ២០១៨នេះ។
Khum Phit នេះ គេធ្លាប់មកប្រកួតនៅស្រុកខ្មែរពីរលើកហើយ ដោយមកលើកទី១ គេវាយស្មើពិន្ទុជាមួយ ឡៅ ចន្ទ្រា អ្នកប្រដាល់ក្លិបកងពលតូចទ័ពឆ័ត្រយោង៩១១(០៦តុលា) និងមកលើកទី២ វាយចាញ់ពិន្ទុ មឿន សុខហ៊ុច អ្នកប្រដាល់ក្លិបពុទ្ធសេរីវង្សកីឡាដោយពិន្ទុ(២៧តុលា២០១៨)។ យ៉ាងណា Khum Phit ជាជើងខ្លាំងមួយរូបនៅស្រុកថៃ និងជាម្ចាស់ខ្សែក្រវាត់ផងដែរ។ នេះបើតាម លោក ថៃ អ៊ូ អ្នកដឹកនាំកីឡាករថៃមកប្រកួតឲ្យដឹង។
ទោះជាយ៉ាងណា ការប្រកួតលើកនេះ ឃុន ឌីម៉ា មិនអាចធ្វេសប្រហែសនឹង Khum Phit បានឡើយ ព្រោះអ្នកប្រដាល់ថៃរូបនេះ មិនសាមញ្ញនោះទេ ឆ្លងតាមការប្រកួតជាមួយ មឿន សុខហ៊ុច និង ឡៅ ចន្ទ្រា កន្លងមកនោះ។
លោក ញាណ សុធី អ្នកចាត់ចែងកម្មវិធីប្រដាល់ប្រចាំនៅSEATV បានឲ្យដឹងថា Khum Phitនេះ មានប្រវត្តិប្រកួតតែចំនួន៧០លើកប៉ុណ្ណោះ ក្នុងនោះវាយឈ្នះ៥៧លើក ចាញ់១១លើក និងស្មើ០៣លើក ។ ចំណែក ឃុន ឌីម៉ា មានកំណត់ត្រាប្រកួតចំនួន១០០លើក ឈ្នះ៨៦លើក ចាញ់១២លើក និងស្មើ០២លើក។
យ៉ាងណាសម្រាប់ការជួបគ្នារវាង ឃុន ឌីម៉ា និង Khum Phit នេះ គេរំពឹងថា ឃុន ឌីម៉ា នឹងឈ្នះការប្រកួតនេះ។ ដូច្នេះចាំមើល តើ ឃុន ឌីម៉ា អាចយកឈ្នះKhum Phit បានមែនឬអត់សម្រាប់ជំនួបលើកដំបូងនេះ?។
ចំពោះ យុគ យក្សផ្លែ អ្នកប្រដាល់ក្លិបបូរីរាជសីហ៍មានរិទ្ធ នឹងត្រូវជួបសងសឹកជាមួយអ្នកប្រដាល់ថៃចំណូលថ្មីឈ្មោះOp Sai ដោយប្រកួតក្នុងប្រភេទទម្ងន់៥៧គ.ក្រ។ ការជួបគ្នាលើកមុន(០៦តុលា២០១៨)យក្សផ្លែវាយចាញ់ Op Sai ដោយពិន្ទុ។
អ្នកប្រដាល់ថៃ ដែលយុគ យក្សផ្លែ ត្រូវសងសឹកវិញនេះ ជាជើងខ្លាំងស្រករក្រោយមួយរូបនៅស្រុកថៃ។ Op Sai គេមានជំនាញប៉ិនប្រសប់ក្នុងការប្រើកណ្ដាប់ដៃ។ គេមានប្រវត្តិប្រកួត៥៩លើក ដោយវាយឈ្នះ៥១លើក ចាញ់០៨លើក មិនដែលស្មើ ខណៈដែល យុគ យក្សផ្លែ គេមានប្រវត្តិប្រកួតចំនួន១៦២លើក ឈ្នះ១៣២លើក ចាញ់២៦លើក និងស្មើ០៤លើក។
Op Sai ដែលធ្លាប់ជួប យុគ យក្សផ្លែ ម្ដងហើយនោះ សម្រាប់ការជួបលើកនេះ គេមិនមានការព្រួយបារម្ភទេ ព្រោះគេស្គាល់ពីថ្វីដៃរបស់ យក្សផ្លែ ហើយនោះ។
យក្សផ្លែ ការប្រកួតចុងក្រោយរបស់គេ គឺវាយឈ្នះអ្នកប្រដាល់ថៃMoeung Phit ក្នុងទឹកទី៣ កាលពីថ្ងៃទី១២តុលាកន្លងមកនេះ។
ទោះជាយ៉ាងណា ការឈ្នះចាញ់រវាងយុគ យក្សផ្លែ និង Op Sai នេះ ពុំមាននរណាហ៊ានទាយមុនថាអ្នកណាឈ្នះនោះទេ សម្រាប់ការជួបគ្នាលើកទី២នេះ?។
ដោយឡែក ការប្រកួតរវាងអ្នកប្រដាល់រួមជាតិវិញ លន បញ្ញា អ្នកប្រដាល់សមាគមកីឡាប្រដាល់ក្រសួងការពារជាតិ ត្រូវគេផ្គូឲ្យជួបប្រកួតជាមួយ សូត្រខេវិន អ្នកប្រដាល់ក្លិបបក្សីស្លាបដែក។ ពីរនាក់នេះជួបគ្នាក្នុងប្រភេទទម្ងន់៦០គីឡូក្រាម។ រវាងអ្នកប្រដាល់ទាំង ពីរនាក់នេះ តាមការកត់សម្គាល់ សូត្រ ខេវិន ប្រហែលជាមិនអាចឈ្នះ លន បញ្ញា នោះទេ៕
Source: Kampuchea Thmey Daily
0 Comments